Pensi sovre las penas i el plazer
El dezespero i kuando keremos kreyer
Kuando yegamoz a saver i a entender
A las horas antes del silensyo total ..
Una vida no kualkera en este mundo
Yenna de lavoro, yenna d’amor profundo.
Las lagrimas alimpyan i el ayre seka todo
Kuando s’aserkan las horas de l’olvido total..
Los rekuerdos no tienen ke viajar tan leshos !
Duelen i alegran las personas en sus kuartos
Los rekuerdos baylan delantre de los ojos
Kuando suona la hora del repozo total..
Komo deshamos lo muestro, las yaves ?
Partimos sin keshas, sin yoros, kon kayades !
Ni miramos mizmo a los keridos dulses kantones
Antes de ir a la guerta de la felisitad total..
Pensi a los mios, a eyos a ken apartenesi
A eyos kon ken bivi, me alegri i yori…
Unos ya me asperan… Los ke lo mas ami !
Mis angelos, luzizikas de ande es la Luz total..
Unos estan aki, respiramos el aire de las montanyas
La golor de los pinos siempre vedres i las rozas
Les kero dar mis manos para ke se kayinten en las suyas !
Antes de abrasar mis amados en el karinyo total..
Sharope blanco
Artículos Relacionados: