Diario Judío México - El famozo pintor , konsiderado komo “el padre del impresionismo” era desendiente de una famiya djudia de orijin portugez ke se avia konvertido al kristianismo, todo en manteniendo sekretamente su relijion djudia i transmetiendola de jenerasion en jenerasion durante unos 250 anyos. Su bisnono Pierre Rodriguez Alvarez Pizzarro nasio en la sivdad de Braganza, en Portugal, serka de la frontiera kon Espanya. El nono de Camille. Joseph Gabriel ke nasio en 1776, avia emigrado, verso la metad del siglo 18. a Bordeaux, en Fransia ande ya existian chikas komunidades djudias.

Los djudios konversos ke se avian aresentado en Fransia, prinsipalmente en la sivdad de Bordeaux, i ke eran yamados nouveaux chretiens (kristianos muevos) avian yegado de diversas partes de la Peninsula Iberika en segito a problemas kavzados antes i despues de la Inkizision, i avian formado ayi una mueva komunidad djudia.

En el anyo 1700 el rey Louis XIV avia desidido de rekonoser a estos muevos kristianos komo djudios, aun ke de fakto solo. Es solamente basho el reyno de Louis XV (1723) ke eyos fueron rekonosidos ofisialmente komo djudios. El granpapa de estava entre estos konversos ke avian tornado al djudaizmo de manera ofisiala. Eyos ovraron para el establesimiento de una komunidad djudia prospera ke, entre otras, se okupo de todos los menesteres de sus miembros. La povlasion djudia de Bordeaux ke en 1713 kontava 500 almas ya avia yegado a 1550, a la vilya de la Revolusion Franseza, en 1789.

Joseph Gabriel Pissarro, ke era uno de los miembros mas aktivos de la komunidad de Bordeaux, se kazo en1789, kon Anne Felicité Petit, ermana de Isaac Petit, ke bivia en la izla de St. Thomas, en los Caribes, ke en akeya epoka apartenia a la Korona de Danimarka.

En segito a la muerte de Isaac Petit, uno de los ijos de Joseph Gabriel, Frederic, fue embiado a St. Thomas afin de ayudar a la bivda, Rachel Petit, ke era su tia por aliansa, en los negosios de la famiya. Abraham Gabriel Frederic Pissarro i Rachel Manzana Pomié, ke nos es otra ke Rachel Petit, se namoraron i se kazaron en Charlotte Amalie, en St. Thomas. Es ayi ke nasio, en el 10 de Djulio de 1830, Jacob Abraham .

A la edad de 12 anyos Pissarro fue embiado por su padre a la Pension Savary serka de Paris, ande resivio una edukasion segun la tradision i la kultura fransezas. Despues de un periodo de 6 anyos de estudio i de aver sido graduado, Pissarro torno a St. Thomas para ayudar en los negosios familiales; ma aun ke estava muy bien pagado, a la edad de 20 anyos el entendio ke el komersio no era para el. Djuntos kon el pintor danezo Fritz Melbye, ke fue tambien su maestro, en 1854 partio a Venezuela, onde bivio durante dos anyos la vida de un verdadero artista. Siendo ke su famiya le avia prometido de apoyarlo en su kariera de pintor, el torno a St. Thomas por un kurto tiempo i en fin, en 1855, se aresento en Paris. El estudio ayi en diversas institusiones akademikas, inkluzo la Eskola de Bellas Artes (Ecole de Beaux Arts) i la Akademia Suissa.

Verso la fin del anyo 1859, Camille resive una letra de su padre Frederic, ke entremientres ya avia pasado, el tambien, a bivir en Fransia, djuntos kon su mujer. Esta letra, eskrita a la vilya del Dia de Kipur i en la kuala el akodra a su ijo ke deve vinir a tomar taanit kon eyos i pasar este Dia de Gran Pardon djuntos kon su famiya, mos da una idea de lo ke eran las relasiones entre i su famiya.

Una de la pokas vezes, o puede ser ke la unika vez ke Camille se refero a la relijion, fue kuando, kon okazion de la muerte de su padre, eskrivio a su tio en St. Thomas: “El Dio es grande. El mos tomo lo ke teniamos de mas presiozo en este mundo: devemos enkorvarmos i kreer en Su providensia.”

Pissarro se kazo kon Julie, una de las mosas en la kaza de su madre. Sesh de entre las ocho kreaturas ke nasieron al par Pissarro fueron dotadas kon el talento artistiko de sus padre.

Durante la gerra franko-prusa (1870-1871), Pissarro partio a Ingletierra i torno a Fransia en 1871 afin de topar sus primeras ovras destruidas por los soldados prusos.

El lugar de enkontro de los impresionistas en Paris era el Café de la Nouvelle Athenes en la Plasa Pigalle. Uno de sus amigos, el eskritor George Moore avia dicho, deskriviendo a Pissarro: “El es un muy intelijente i apresiado djudio. Kon su barva blanka i sus kaveyos blankos, mos akodra al patriarka Avraam.”

El pinto prinsipalmente panoramas i aun ke no bivio largos anyos en St. Thomas, parese ke fue enfluensado por su povlasion lokala siendo ke algunas de las figuras en sus pinturas tienen una kolor eskura. Es muy probable ke la enfluensa de Pissarro sovre sus kolegas no fue apresiada a su djusta valor, ma aun kon esto el supo krear relasiones amigavles kon pintores komo Edgar Degas, Paul Cezanne i Paul Gaugin, konsiderados komo personas de karakter bien difisil.

Pissarro fue el uniko ke partisipo a todas las ocho ekspozisiones impresionistas de su epoka. El izo eksperimentos kon el stilo neo-impresionista i investigo tambien el “pointillismo”, antes de retornar al puro impresionismo, una dekada antes de su muerte. El murio el 13 de Novembre 1903.

I por fin: Pissarro, su ovra i el Muzeo de . En el mez de Disiembre de 1952, Mordehay Narkis, el direktor del Muzeo Bezalel ke mas tadre devino parte del Muzeo de , avia eskrito a Paul-Emile Pissarro, el mas djoven ijo de , afin de rengrasiarlo por las eskitsas de su padre i las pinturas pintadas por el mizmo ke fueron donadas al Muzeo. Paul Emile avia prometido a M. Narkis de organizar una ekspozision de las ovras de su padre para markar los 50 anyos de su muerte. Ma esta prometa no fue kumplida. Es solamente 40 anyos mas tadre, en 1994, ke el inyeto del pintor, Joachim, realizo esta prometa i una ekspozision de las ovras de tuvo lugar en el Muzeo de .

En la koleksion del muzeo se topan oy 28 pinturas i 18 litografias de este famozo pintor ke pokos solo saven ke era desendiente de los djudios ekpulsados de Espanya.

FuenteAki-yerushalayim.co.il
Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorTrump afirma que no hay calentamiento global
Artículo siguienteUna agradable manera de escuchar literatura Yiddish
Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.