La izla de Kipros i el puevlo judio

Una dicha vieja mos dize, ke “El judio, ande no lo asembras, ayi se topa”.

Es verdad, ke desde mas de dos mil anyos, muestro puevlo esta dispersado en kaje todos los paizes del mundo, ma la izla de Kipros, siendo una izla serkana a Erets Yisrael, fue konosida por muestros antepasados, kaje desde siempre.

Despues de la salidura de Ayifto (Ejipto), los trivos de Yisrael se instalaron, (antes kaje 3300 anyos), en la tierra de Kenaan.
Al menos uno de estos 12 trivos, el trivo de Zevulun, tuvo un akseso a la mar mediterranea, i al pareser, kolaborava kon los marineros i los komersiantes de los fenisios, (ke bivian en Libano i en el norte de Kenaan/Erets Yisrael), i ke viajavan, no solamente a Kipros, ma yegavan asta las kostas del sud de la Peninsula Iberica.

En la bendision de Yaakov Avinu a sus ijos, topamos eskrito:
“Zevulun en puertos de mares morara; sera por puertos de naves. I su limito asta Siddon”. (Siddon era una de las sivdades de los fenisios).

Segun el mandamiento de la Tora, se uzava en Bet aMikdash en Yerushalayim un saumerio golorozo espesial. La tradision folklorika mos deskrive la intensidad de la aroma, en diziendo, kon un tono de egzajerasion, ke “las ovejas en Jeriho sarnudavan en goliendo el saumerio desde Yerushalayim” (apropo, una distansia de 25 kilometros)…

En el Talmud mos dan las 11 espesias ke komponen el sauemrio, i entre eyas el “vino de Kipros” (“o, si no esta disponivle, tomara un vino blanko antiguo”). Este testimonio de muestros hahamim mos indika ke avian relasiones komersiales entre los reinos de Yisrael i la izla vezina

En el tiempo del dominio romano en Erets Yisrael (desde el anyo 63 antes del kalendario sivil, i asta el anyo 305) okurrieron kuatro revoltas de los judios kontra este imperio poderozo, i kontra el dezeo de los romanos a ovligar a los judios a mesklarsen kon la ideolojia helenistika.

En el anyo 38, en el tiempo del imperador Caligula, se revoltaron los judios de la komunidad de Alexandria (Ejipto).

En Erets Yisrael, en el tiempo del imperador Nero i del Aspasianus ke lo remplaso, okurrio la revolta mas grande, en los anyos 66-73, i lo ke rezulto, malorozamente, fue una destruksion grande del paiz, i del Bet aMikdash.

Otra revolta, (konosida komo la revolta de Bar-Kohva) desbrocho, en el tiempo del imperador Adrianus, en el anyo 132, i turo asta el anyo 135.

En el anyo 115, se revoltaron las komunidades judias en Ejipto, en Cyrenaica (Lybia), i tambien en Kipros. Para represar estas revoltas, tuvo el imperador Trianus de sesar i deshar de gerrear en Mesopotamia i desviar muchas trupas de su armada a Kipros, Ejipto i Lybia.
La revolta aun turo algunos kaje tres anyos.

Pokos judios kedaron a bivir en Kipros, kuando paso la izla al dominio del imperio bizantino (en el anyo 395); despues a las manos de Ingletierra (en 1191), despues basho la Republika de Venezzia (1489), i en el dominio de los otomanos (desde 1591 asta 1878, kuando paso una vez mas al dominio britaniko).

En los anyos 1881-1882, pasaron muchos pogromes sovre la kavesa de los judios en Rusia i Polonia, tambien en 1903 okurrio un pogrom muy brutal kontra los judios de Kishinev (en Bessarabia, Rusia).

Muchos filantropos se “arremangaron” a dar ayuda a los refujiados, ma, mas de todos fue el Baron Maurice Hirsch el ke dyo mano.
Aparte de sus kompras de tierras en Argentina para instalar ayi judios, el merko tambien en la izla de Kipros una azienda grande (30000 dunames) serka de Nikosia. La idea (o, si keresh, la vizion) del Baron fue de fondar una kolonia de agrikultores judios en la izla.

– “Ya ke el imperio otomano no permetiya kolay la imigrasion de judios a Palestina, ma kon el tiempo (ansi pensava i esperava el Baron Hirsch), el sultan se rekonsiliara, i los kolonizadores de Kipros pasaran a bivir en Erets Yisrael, ke es un pais serkano a Kipros (de punta de vista jeografika i klimatika)”.

Durante la Segunda Gerra Mondial, 1942-1945, (los anyos terrvles del Olokausto), el puevlo judio pedriyo 6 miliones almas. Ma, malgrado este fato shokante, el governo del Mandato Britanko echo blokeo sovre las kostas de Palestina (Erets Yisrael) i impedio a los vaporikos de los sovrebivientes de la Shoa a yegar al pais istoriko del puevlo judio, para topar aki talvez un poko de afalago.

Miles de akeyos poveretos refujiados judios fueron arrestados por los askieres inglezes, i fueron yevados a los kampos de detension en Kipros.

Esta falta de konsiderasion umana de parte del governo ingles, izo intensifikar la lucha de los judios, abitantes de Erets Yisrael, kontra el Mandato Britanico.
Despues de mucha pena se termino (en 1948) el mandato britaniko, i Israel gano su independensia.

A mi me parese, ke esta brava lucha de los judios, una vez mas kontra un imperio poderozo, impresiono mucho a los kipriotas, i les dyo la inspirasion de luchar por la independensia de la izla (ke a la fin fue deklarada en 1960).

Yehuda Hatsvi
Erets Yisrael