La “juderia” de Lorca

Por:
- - Visto 1655 veces

Uno de los rezultados del intereso ke se esta konsentiendo agora en Espanya enverso la istoria i la kultura de los sefaradis, i de sus antepasados ke bivieron en este paiz asta 1492, es el esforso ke es echo para deskuvrir, i restorar en la mizura del posible, restos de las antiguas “juderias”, los kuartieres onde bivieron los djudios asta sus ekspulsion.

Pokas solo de estas juderias pudieron ser indetifikadas asta agora – por una sinagoga ke fue transformada en iglezia i kedo mas o menos en su forma orijinala, komo la Sinagoga del Transito i la de Santa Maria la Blanca en Toledo; por algunas kazas ke kontinuaron a servir de morada despues de la ekspulsion tambien; algunas kayes ke ainda yevan los nombres de sus pasado djudio, etc.
Ma en la mayoria de los kavzos estas juderias ya desparesieron, sus kazas derrokadas i remplasadas por edifisios mas grandes i modernos, de manera ke ya es imposible de determinar kon seguridad en ke lugar de una sierta sivdad estava su juderia, onde se topava el kal, o el mikve etc.

Si se puede topar algun resto, no de una kaza izolada o de un kal o otro edifisio semejante, sino ke de una juderia, de un grupo de kazas, mizmo en ruinas, ke puedan ser relasionadas kon la istoria de los djudios de Espanya, es solamente komo konsekuensa de bushkedas arkeolojikas, komo las ke empesaron a ser echas en 2002 en el Kastiyo de Lorca, serka de Murcia.


En las ekskavasiones echas ayi, komo parte de los lavoros para la konstruksion de un “parador”, fueron deskuviertos en efekto los restos de una juderia i su sinagoga, en ruinas es verdad ma en bastante buen estado para ke pudieran ser identifikadas komo los restos de una komunidad ke sus prinsipios datan del primer tersio del siglo 13 i ke enfloresio i se engrandesio sovre todo en el siglo 15.

Anchos detalios sovre lo ke fue deskuvierto en estas ekskavasiones son dados en el livro “Lorca”, publikado en el anyo 2009 por la Komunidad Autonoma de la Rejion de Murcia, kon la kolaborasion de Casa Sefarad-Israel, la munisipalidad de Lorca i la fondasion “Sefarad Beitenu”.

El livro, rikamente ilustrado kon manyifikas fotografias en preto-i-blanko i en kolores, es en reaalidad el katalogo de la ekspozision “Lorca – Luces de Sefarad” en la kuala fueron prezentados por primera vez los rezultados de las ekskavasiones.

En desparte de palavras de introduksion de reprezentantes de los organizmos ke kolaboraron en este proyekto i de los komisarios de la ekspozision, el livro tiene artikolos sovre la istoria del reyno de Murcia i de los djudios ke bivieron ayi, sovre la sivdad de Lorca, su kastiyo, la juderia ke sus restos fueron deskuviertos i su kal, i enfin la muchidumbre de objetos de barro i de seramika, fragmentos de lamparas de vidro i otras kozas mas ke fueron topadas ayi – testigos mudos de la splendor de la komunidad djudia ke existio en Lorca asta la fin del siglo 15.

El livro mos da una informasion bastante detaliada de esta juderia, de sus kazas (de las kualas kedaron naturalmente solo restos de paredes), las kayes i plasas i enfn del impresionante kal, ke sus restos se konservaron en bastante buen estado.

Sigun puede ser visto de la fotografia de este kal i del plano ke fue aprontado por los arkeologos, ay ayi un vestibulo, una “azara” (sektor para mujeres) i la sala de orasion onde se pueden distingir la “bama”, en el sentro, i en la parte de ariva, una nicha en la kuala se topava el “ehal”.

art4036 1

art4036 2

Una idea de la importansia de este kal es dada por sus dimensiones: 19.6 metros de largura sovre 10.4 de anchura, i tambien por los pedasos de “yeserias” (ornamentasiones a baza de gipso de puertas, ventanas i otros elementos arkitekturales en palasios, meshkitas, iglezias i sinagogas, etc.), ke mizmo rotos, al ser restorados mos permeten de imajinarmos la ermozura del interior de esta fragua. Tambien fueron topados ayi restos de kandiles, hanukiyot i vazos diversos i enfin, lo mas importante, mas de 3000 fragmentos de unas kuantas diezenas de lamparas de vidro ke servian para la iluminasion de la sala de orasiones.

art4036 3
Lampara de vidro i pedaso de yeseria de la sinagoga de Lorca restorados en baza de los fragmentos ke fueron topados ayi

art4036 4

Estas lamparas ke sovresalen por sus ermo-zura i la fineza del vidro del kual son echas, son de grande importansia sovre todo para el estudio de la industria del vidro en Espanya, siendo ke nada de semejante no fue topado asta agora en las ekskavasiones echas en otras partes del paiz.

La importansia de todo lo ke fue topado en estas ekskavasiones puede ser vista tambien del esforso ke fue echo por las autoridades de Murcia para kompletar los lavoros de restorasion, i azer del Kastiyo de Lorca i de su juderia un lugar ke pueda atraer i interesar tanto a los turistas komo a los investigadores i estudiantes de la istoria de Espanya i de los djudios ke bivieron ayi.

Pudimos darmos kuento del potensial kultural i turistiko del lugar en una vijita ke izimos ayi, en el kuadro del Enkontro Internasional “Sefarad en la Diaspora 1492 – 2010” ke tuvo lugar en Murcia del 26 al 28 de Avril. Este enkontro, fruto de la vizion del Sr Jose Luis Campoy Rubio i ke fue organizado por la Konsejeria de Kultura de la Komunidad de Murcia, la Universidad de Murcia i Casa Sefarad-Israel, kon la kolaborasion de la Autoridad Nasionala del Ladino, izo sovresalir una vez mas kuanto son ondas las rayizes espanyolas del djudaizmo sefaradi.

Esta es tambien, para todos los ke vijitan este lugar, una prova mas de la prezensia djudia en Espania i de su importante kontribusion a la istoria i kultura de este paiz, no solo en lugares tan konosidos komo Toledo, Cordoba o Zaragoza, sino ke tambien en lugares komo la sivdad de Lorca i su kastiyo, de los kualos se avlo menos, en este konteksto, i ke es agora solo ke mos estamos dando kuento de sus importansia para el estudio i mijor konosimiento de la istoria de Espanya en jeneral i la del djudaizmo espanyol, en partikular.

LA “JUDERIA”
UNA SIVDAD ALIENTRO DE OTRA

Las juderias de Espanya, aun ke no eran getos, eran entornadas kon murayas i tenian su propio mundo. Jeneralmente eyas eran situadas serka del palasio real o de la katedrala de kada sivdad importante.

En desparte de sus propio estatuto legal i sivil, en relasion a los reglamientos de kada sivdad, las juderias tenian sus propios establesimientos komo la sinagoga, sentros para el estudio de la Tora, un ospital, i tambien un mikve para el banyo ritual ansi ke un un matadero para la shehita, la matansa de vakas, bueyes, kodreros i mas, segun los preseptos de la ley djudia.

Los djudios tenian ayi sus ornos ke eran de importansia primordiala i mizmo una prezion para los ke violavan la ley djudia o las leyes siviles.

Los simeterios, segun lo preskrive la Tora, nunka se topavan alientro de la juderia sino ke a su eksterior, ma al tanto ke esto era posible, serka de las murayas.

De mizmo ke oy, en la Espanya Medievala tambien la sena de la tadre de shabat okupava un lugar muy importante en la vida familiala. Shabat demanya-na los ombres ivan al kal para la tefila sabatika a la kuala, a vezes, se djuntavan las mujeres tambien. El resto del dia lo pasavan en la famiya i kon amigos.

En desparte de tener sus kazas en un kuartier djudio, alientro de la sivdad, los djudios no tenian dingun sinyo eksterior ke podia distingirlos de kualkier manera de sus vizinos kristianos o muzulmanos.

Esta situasion troko a partir de los siglos 14 i 15, kuando los reynos kristianos ovligaron a los djudios a metersen, sovre el vistido, un sinyo ke los distingiera del resto de la povlasion. Este fue el prinsipio de un proseso ke estuvo indo i kresiendo i ke, komo ya lo savemos, se termino kon la ekspulsion de los djudios de Espanya, en 1492.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: