Diario Judío México - LA SEGUNDA NOCHE KON LA KANDELIKA BLEU

Esta tadre asyendi la sigunda kandelika de Hanuka.
Tan delgada, fina, portanto tan kerida i ermoza !

La kandelika ke en eya sintiya las kantikas de mi chikez, mi padre tomandome a su lado para azerme dizir los biervos tan no konosidos ma tan dulsez a mi oreja. Mi mamita allado de mozotros kon su soriza de anjelo…

Kandelika de la kolor de la mar !
Kandelika de la kolor de los ojos de mi ijiko presyado !
Kandelika de la kolor de los sielos,
La immensitad i de la buendad sin limitos del Di-o !


Rogi para ke muestros dezeos se realizan i ke sintyemos alegriya en estos dias de fiesta. Rogi para los ke estan leshos de sus kazas, en kantones de hospital o sin razon pudriyendosen en las prizyones, porke no es injustisia lo ke manka en
este mundo ! Dishe ALLELLUIA porke para mi es lo mas ke se puede dizir en una sola palavra.

Ke la “LUZ ” siempre illumine vuestros pasos…

*

EL NES DE HANUKA KON MI HANUKIYA !

Enteresante komo mi Hanukiya vino a kaza….. No leshos de aki tenemos un “eskidji”, palyerohadji komo lo yamavamos antes. Oh no ! No es un antikaryo ma una botika ande se venden kozas viejas, ropa de kazas enteras porke ya se muryeron los viejizikos, o la ropa i los bienes de akeyos ke trokan sivdad o payis
o simplamente lo de la jente ke kere merkar kozas muevas al lugar de estas kozas viejas ke no keren guadrar mas. A mi me plaze muncho ir a esta botika, i el patron, Ibrahim, un manseviko de unos trenta anyos, me kere de vedra komo una madre ! Adoro mirar estas kozikas, testigos de los buenos i negros diyas de la gente i ke por seguro tienen una “Alma” i no asemejlan del todo a los muevos objetos ke se merkan en el merkado……Mismo si estos son mas valorozos, mas modernos i mas apresiados. Para mi, komo ya lo dishe, les manka alma i no tienen memoryas en
eyos, lo ke los amingua a mis ojos !

Al empesijo del enverano, kaminando kon keyf, estava pasando por la kalejika ande se topa “mi eskidji”… Me plaze muncho pasar por aya pormodo de las kazas
ke tienen muy ermozas guertas yennas de flores i de arvoles de fruta. Es kalmo komo en la kampanya. Pasar por esta kaleja i no dizir Merhaba/Hola a Ibrahim nunka afito ! Toko kon kerensya i respekto kada koza, los mueblres, los biblos, unos reelamente muy valorozos ma arrondjados de sus kantones ande kedavan amados, kon trankilitad… Me akodran los gatos i los perros ke gente irresponsavle
i krual echan a la kaye por ke se van a sus vakansyas o al Gehennom ! A vezes los deshan a las puertas de estos sentros de animalitos ke los “durmen” en unos kuantos diyas si no vienen sus patrones a bushkarlos…. Muy triste koza !

Akel diya vide una meza de lavorar/buro por el kual me namori a la primera mirada! Lo keriya i punto ! Ke sharonfonfon iva ser de eskrivir mi novela
ALMENDRA, mis poeziyas o mis artikolos i mis kuentizikos en este buro kon
una etajer i kashonikos en frente i en los lados ! El mueble teniya la mizma kolor de los meubles de mi kamareta i era justamente aya ke teniya lugar para meterlo dospues ke aviya echo trokamientos en kaza, kitando i metyendo muebles, transformando lo todo de manera a ser mas ermozo, mas praktiko i mas komfortavle ! Deviya ser una dekoratrisa porke me plaze muncho okuparme del interyor de las kazas, de la renovasyon, de los almaryos ets…

Pensi, pensi i desidi ! Teniya biblos valorozos en kaza ke me aviyan kedado de mi granmamita. Tantos i tantos anyos aviya gozado de estos i no me iva tuyir si los
trokava kon la mezika de lavoro ! Avli kon Ibrahim ke ya konosiya estos biblos i siempre me diziya ke estava pronto a tomarlos a sus presyos o trokarlos kon kozas
ke me plaziyan en su botika ! El tiempo aviya vinido ! Me troko la meza por dos statuikas de bronza i una frutyera i me disho ke me regalava dos otros biblos ke me aviyan plazido. 2 servos/cerfs/ayalot en porselena fina i NO eskapo ! Me disho ke aviya merkado el kontenido de un kaza de los “judyos” ! Aviya entre la ropa una koza “suyos” ke traye mazal preto a ken lo tiyene ! No lo keriya guadrar en su botika i no le enteresava si era koza valoroza o no ! No keriya dinero para esto porke puediya ser paras “enkonadas” ke se gastan para los doktores o los muertos ! Dingunos lo iva merkar de toda manera porke dinguna kaza ke se respekta no iva kerer ansina de objetos okultos de diavlo i de judyo en su kaza. Puedeser ke yo lo puediya “dar” a alguno ke por seguro iva apresyar el “Ugursuz de koza” . Se fue al fondo del magazen i me trusho emburujado aryento de una gazeta una Hanukiya de plata Rusa, antiko i de grande valor ! Lo kedi mirando ! LE dishe ke esto tiene valor i yo no lo puediya merkar. Me konvensyo dizyendo ke no lo dariya a otros i ke yo me entyendo de kozas okultas, sivilizasyones ansiyanas, historya…. El hombre me tomava por una profesora sharonfonfon ! Me disho ke yo iva saver komo PROTEJARME de KOZAS MALDICHAS ! El buenacho de Ibrahim me trusho las kozas a kaza i le di los tres pedasoz miyos. Los dos estavamos kontentes! No se kere dicho ke la meza topo su lugar en mi kamareta komo si de siempre estava aya i echo por este kantoniko miyo ! Los servizikos se fueron a kedar kon sus muevos amigos en el salon i kada vez ke me ven me soriyen i yo
entyendo ke estan horozos aki. La hanukiya se instalo komo un rey de grande glorya en medyo del bufet/biblioteka de la sala de komer. Solo baylar me mankava de plazer !

Muncho mas bivo i kon grande alegriya se fiesta Hanuka en Israel. Ay mesibot/partis de Hanuka en los salones de los grandes hoteles, las eskolas, los ulpanes ke son grandes sentros de integrasyon para los emigramtes. Grandes Hanukiyot se asyenden en las sivdades i las vitrinas de las “kondituryas” ke son patiseriyas manko luksuozas de las de Istanbul, i ke se inchen de estas “SUFGANYOT” (Sufganya es el pomchik muestro) kon marmelada aryento i asukar en polvo ensima. Es el simbolo del Hanuka en Israel. La jente tan aman esto ke se topa por seguro el anyo entero ma, no se deke, no tienen la savor de las del Hanuka “kayintikas i dulses” komo las yaman aya ” Sufganya hama u metuka”. En munchos lugares se ofren a las personas. Tengo ido munchas vezes a los hospitales i ande los viejizikos para fiestar Hanuka kon los ke mos asperan kon kuatro ojos ! Los mansevos se degizan para los balos maskados no solo en Purim ma en Hanuka tambien. Las tadres si se sale afuera se pueden oyir las kantikas de las ventanas avyertas de las kazas. Se siente ke son diyas de fiesta i de alegriya, de luzes, de kolores, de kantes i de savores…

Ke ayegemos a fiestara kada anyo kon keyf i kon todos muestros keridos enjuntos. Vos suheto a todos una ermoza fiesta de Hanuka kon sanedad i ke tengash
kada anyo vuestras Hanukiyas briyando de luzizikas alegres .

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorPor primera vez -y ahora con nuevo gobierno- México vota contra Hamas
Artículo siguienteEl Euro NCAP Da Cinco Estrellas Al I-Pace, El Automóvil Eléctrico De Jaguar
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.