Diario Judío México
KANDELIKA DE KOLOR NARANDJA POR LA SINKENA NOCHE
” Baruh Ata Adonay, Eloheynu Meleh ha Olam…. ”
son las palavras majikas ke repetimos kada noche de Hanuka en asyendyendo las kandelikas de todas las kolores. Siento una alegriya en el mas profundo de mi alma, komo si dingun mal me puedriya alkansar en este momento.
Esta noche era el torno de la sinkena kandelika. Avagar avagar se esta inchendo la hanukiya ! Me plaze asentarme enfrente de eya i mirarla en arogando al D-io para ke las luzizikas Le yeven todo lo ke sale de mi korason.
Mi kandelika esta tadre era de kolor narandja. La kolor de la kayintor, del sol, de las flamas i de las frutas del invierno komo si D-io mos kijyera kayintar por los ojos en los diyas yelados i grizos del invierno. La kolor kon la kuala la persona se siente bien i refleta la LUZ.
Me akodro de los fuegos ke asyendiyamos las noches freskas, para kayintarmos i pasar una nochada maraviyoza debasho de las estreyas en las arenas al bodre del mar, en las playas asoladas de Ashkelon, Tel Aviv, Herzelia, Natanya, Tantura Mihmoret i Elat. Kantavamos i baylavamos las kantikas hebreas, alegres i tristes, akompanyadas kon las melodias ke salian de las gitaras de muestros amigos. Metiyamos las patatas a la lumbre i las komiyamos kon una savor ke nunka me vo olvidar.
Aya, en frente de las flamas del “kumzits” mos avriyamos los korasones i eramos todos ermanos i mizmo los namorados eran primero mijor amigos… Asperavamos para ke el sol amaneska i ver las maraviyozas kolores del sielo ke se aklarava poko a poko. No me viyene de la mano no dar razon a todos estos puevlos de los tiempos antigos ke adoravan el sol i baylavan en frente de el en el amaneser. Es divino !
Esta tadre rogi solo para mi ijiko. Rogi para ke siempre sienta la KALOR del amor de su mamita i de su papa en todo su ser. Rogi para ke esta kalor le de fuersas en lo ke esta azyendo para salvar las personas de sus dolores i darles vida… Para ke le venga fuersa a sus manos kansadas en los momentos los mas kritikos de las operasyones. Rogi para ke seya sano i rezyo i felis i alegre siempre por ke lo merese mas de todos en este mundo. Le konti a D-io ke buena persona ke es, ke dulse i ke jenerozo… Le dishe ke lo bendiziya, ke lo amava muncho i ke me lo kudye ayi, en Londres por ke yo no esto a su lado… Le mandi bezos kon el ayre ke le va karesar las karikas, de Istanbul fina Inglaterra….
Ke vos yege la LUZ i la KALOR de mi kandelika narandja fina vuestras kazas, en vuestros kantones fina dentro vuestro korason…
Artículos Relacionados: