La konkista otomana de los paizes del Mediano Oriente: Erets Israel Ayifto, Libano i Siria en el 16en sieklo, unos vente anyos despues de la ekspulsion de Espanya, kreo una dependensia entre los djudios de Erets Israel i los de Estambol. El Imperio Otomano aresento a los ekpulsados de Espanya primeramente en la kapitala Estambol, i en sivdades ke fonksionavan komo sentros komersiales komo Saloniko, Edirne ets. Al mezmo tiempo pujo tambien el numero de djudios ke arivaron a la Tierra Santa. Eyos bivieron bastante bien durante un periodo de mas de sien anyos, ma al empesijo del 17en sieklo sus situasion ekonomika empeso a deteriorarse, espesialmente en Tsfat.
Komo konsekuensa de esto Shadarim (Mesajeros) empesaron a salir de Erets Israel a diversas komunitades, para demandar ayudo. La keila de Estambol, uzando su avantaj jeo-politiko, empeso a interesarse i a djugar un rolo importante para ayudar a los ermanos del Yishuv; ma es solo en el 18en sieklo ke eya tomo ofisialmente el rolo de “protektor”, en formando el Va’ad Pekidei Erets Israel Be Kushta (Komite de los Funksionarios de Erets Israel en Estambol).
Este komite era responsable no solamente de arekojer donos en la Diaspora, sino ke tambien de transferar i distribuirlos a los djudios de la Tierra Santa. La influensa de este komite pujo tanto ke kon tiempo empeso a reprezantar delantre la Puerta Sublima los enteresos i las keshas de los djudios de la rejion entera del Oriente Medio. Es enteresante de konstatar ke kuanto mas se adelantava el proseso de dekadensia del Imperio, mas se enfuertesia la influensa de este komite.
Estambol tenia todas las kualidades para krear una enstitusion ke pueda ayudar i apoyar materialmente a los djudios del Yishuv. La mayoria de los imigrantes i pelegrinos ke venian de los payizes Balkanikos i de la Evropa Sentrala i Orientala, pasavan por la kapitala Estambol, ke era una sivdad metropolitana, de komerso aktivo. Los djudios ke okuparon pozisiones yave en la adminsitrasion governamentala otomana, djugaron un rolo sentral en el arekojimiento de fondos de ayudo, en las komunidades djudias evropeas, para los djudios de Erets Israel. Todo el tiempo ke estos donos pujavan, pujavan tambien sus revenidos, i sus enfluensa en la nominasion de funksionarios ofisiales del governo ansi ke de komandantes militares en las rejiones provinsialas.
El fakto ke la komunidad d’Estambol tenia la posibilidad de emprimir pamfletos i mesajes i embiarlos a todas las vandas era un avantaj muy grande. Estos pamfletos tenian mesajes eksplikando la negra situasion i el apreto ekonomiko de los djudios de Yerushalayim en Erets Israel, despertando ansi sintimientos de solidaridad ke ayudavan a arekojer donos.
En los anyos 1701-1702 kuando la komunidad ashkenazi de Yerushalayim tuvo ke enfrentar una kriza ekonomika muy grave, mesajeros d’Estambol salieron al Oksidente i parvinieron a resivir fondos emportantes afilu del Imperio Austriako. Ansi empeso el plano de krear el “Komite de Funksionarios d’Estambol”.
La idea de formar este komite fue probablamente kopiada de un komite semejante fondado por la Patriarchia Ermenia d’Estambol para topar solusion a la kriza ekonomika de la Iglezia Ermenia de Yerushalayim a la fin del 17en i al empesijo del 18en sieklo. Se puede dizir ke la formasion de estos komites djudios i ermenis se realizo kon el konsentimiento del governo otomano, ke su entereso era de mantener la estabilidad en las rejiones provinsialas. La influensia del komite djudio era tan grande ke el reusho a entremeterse entre los djudios i los muzulmanos de Yerushalayim i ser garante por las devdas de los djudios, en sus gran parte devdas de los ashkenazis de la sivdad.
En el anyo 1723, kuando las estrechuras ekonomikas de Yerushalayim s’agravaron, la Keila desido d’embiar a Estambol a Rabbi Moshe Behar Meyuhas. Los djudios de Austria i sus prezidente Shimon Wolf, kontinuaron en sus kontaktos kon la Keila d’Estambol i demandaron el ayudo del Embasador Austriako para ke intervenga i ayude a los djudios de Yerushalayim. El personaje el mas aktivo en esta kriza era Rabi Sabetay Alfandari, uno de los lideres de la komunidad d’Estambol.
Kuatro anyos despues, en 1727, un komite de la komunidad d’Estambol fue embiado a Yerushalayim para estudiar i entender las demandas de los muzulmanos de Yerushalayim i topar una solusion a esta kriza. Este komite era formado por personalidades de las mas influentes i rikas d’Estambol en akeyos anyos. La primera era Rabi David Zonana, reprezentando el Governo Sentral, ke tenia el posto de Bazirgan Bashi de los djenisarios (shefe de la gilda de aprovizionamiento de los “yenicheris”, el kuerpo de elita de la armada otomana). El otro era Rabbi Sabetay Alfandari, “un djudio ke s’entiende de este modo de echos”, reprezentando la Keila djudia. A eyos se adjuntaron los rabinos Moshe Aseo, Moshe Ashkenazi i Yosef Baruh. La formasion de este komite fue aprovada por los rabinos de Yerushalayim Avraam Behmoaras, Yosef Rozanes, Avraam Behar, Yeuda Meyuhas i Yitshak Behar David. En los archivos del Seminario Rabiniko de New York se topan los dokumentos sovre la aktividad de este komite asta el anyo 1770.
Kon su intervension fue proklamado un firman (orden imperial), fiksando ke la devda de 60.000 groshes ke los ashkenazis devian a los muzulmanes de Yerushalayim, sera pagada, sin interesos, en diez anyos i en pagamientos iguales. Este evenemiento yevo a la fondasion del “Komite de Fonksionarios d’Estambol”, sovre la inisiativa de Rabi Mordechay Alfandari, renomado komo uno de los djudios rikos d’Estambol.
La reushitad de este komite enkorajo a formar komites semejantes para apoyar a los djudios de las otras sivdades tambien de Erets Israel. Savemos ke en el anyo 1733 se formo el Komite de Fonksionarios de Hevron, en Estambol, sigun se puede entender de la letra del shaliah Rabbi Gedalia Hayun. Los djudios de Izmir s’adjuntaron a sus ermanos d’Estambol para apoyar a este komite.
El Komite de apoyo a los djudios de Tiberia se formo en 1740. El komite de apoyo a los djudios de Tsfat se formo en 1759 despues del rash (tremblamiento de tierra) ke destruyo la mayoria de las kazas de esta sivdad.
A la fin se formo el Komite de Ayudo Sentral para todas las “Sivdades Santas” de Erets Israel, afin de entremeterse kon esforsos de mediasion, en las diskusiones i los pletos ke salieron entre los diversos komites i ayudarles a rezolver sus problemes.
El Komite de Funksionarios d’Estambol era formado por siete personas ke eran los djudios mas emportantes i mas rikos de la sivdad, ke teniyan grande influensa sovre los fonksionarios del governo. Los otros komites tenian de tres a siete miembros i uvo kavzos ke algunos de los miembros servieron en mas de un komite.
Los Funksionarios d’Estambol tenian una red de informatores en la Komunidad de Yerushalayim ke enformavan a los funksionarios i rabinos sovre el modo ke las diversas komunidades eran rijidas.
Kon la formasion del Komite de Funksionarios de Amsterdam, al empesijo del 19’en sieklo, menguo la enfluensa del Komite d’Estambol. Del momento ke arivaron los primeros imigrantes Hasidim Ashkenazis, en 1777, i asta el arivo de los Prushim al empesijo del 19’en sieklo, s’amenguo la influensia de los djudios d’Estambol, Izmir, Salonik i Edirne. La flakeza de la ekonomia otomana, las gerras entre el Imperio Otomano i la Rusia, las konkistas de Napoleon en el Oriente Medio i Erets Israel, no permetieron a los djudios del Imperio de ayudar i apoyar komo antes a los djudios de Erets Israel. El model kreado en Estambol fue kopiado en otras sivdades de Evropa: Amsterdam, Vilna i Brodi, i la influensa de los djudios d’Estambol paso a estas sivdades.
Artículos Relacionados: