La komunidad djudia de Kirklareli, komo munchas otras en Turkia, era kompuesta de los djudios ke avian sido ekspulsados de Espanya en 1492 i ke se avian aresentado, entre otras, en diversas sivdades i lokalidades ke azian parte del Imperio Otomano.
La prezensia djudia en Kirklareli fue mensionada por primera vez en el diario de un viajador polako yamado Simon ke vijito esta sivdad en el anyo 1603.
Vista del interior del kal de Kirklareli ke estava ainda avierto en los dias de Shabat
kuando vijitaron ayi los autores del livro “Travel in Search of Turkey’s Jews”
Ayşe Gürsan-Salzmann i Laurence Salzmann entre los anyos 1984-1989
En su diario el noto, entre otras, ke la povlasion de Kirkkilise (40 iglesias en turko o “saranda eklisies” en grego, segun era yamada esta sivdad en la antiguidad), es kompuesta de turkos, gregos i djudios sefaradis, ansi ke djudios ke avlavan un dialekto alman. Este dialekto avlado por los djudios eshkenazis de la Evropa Oksidentala, no era otro ke el idish, al kual fueron adjustados kon el tiempo sienes de palavras ebreas. Este viajador konto tambien ke no topo una informasion sovre la data en la kuala los djudios eshkenazis yegaron a Kirklareli por la primera vez. En 1674 yego otrun grupo de eshkenzis de paizes de Evropa Orientala, a la vista, en segito a la gerra ke tuvo lugar entre el reynado de Polonia i el Imperio Otomano.
La okupasion prinsipala de estos djudios era la produksion de manteka i kezo ke eksportavan a la komunidad djudia de Estambol.
El Imperio Otomano konsiderava a los djudios komo un katalizator, en la esperansa ke sus prezensia en siertas rejiones, traeria una prosperidad ekonomika. A la vista, esta fue la razon ke el Imperio Otomano otorizo el aresentamiento de estos djudios en Kirklarerli.
Una otra prova de la prezensia de rayizes eshkenazis fue el lavoro echo por la Prof. Mina Rozen de la Universidad de Haifa, ke topo de entre las 416 piedras tombalas ke investigo en el simeterio djudio de Kirklareli, 20 ke yevavan nombres de orijin eshkenazi, la metad de entre eyas de los prinsipios del siglo 18 i otras kon datas de los prinsipios del siglo 17. Este simeterio es uno de los mas antiguos de Trakia.
La povlasion de esta komunidad pujo i enfloresio gradualmente i atrayo a los djudios de la sivdad vizina Edirne, ke eran de los desendientes de los djudios ekspulsados de Espanya, o sea los sefaradis.
A lo largo de los anyos la komunidad eshkenazi se asimilo a la sefaradi, pedriendo de esta manera su identidad kulturala evropea.
Ay poka informasion sovre los djudios de Kirklareli entre los anyos 1674 a 1879, anyo en el kual se empeso a notar la enfluensa de las eskolas de Alliance Israelite Universelle.
En 1881 la komunidad ya kontava entre 800 a 900 almas. Esta puja de povlasion pudo ser obtenida grasias a los emigrantes’ ke avian yegado de Edirne. Una puja natural de povlasion empeso a ser konsentida a los prinsipios del siglo 20, despues de la I Gerra de los Balkanes en la kuala avian pedrido sus vida munchos djovenes de esta komunidad.
En segito a esta gerra el Imperio Otomano avia pedrido kaji un 95% de sus teritorios en Evropa, por konsekuensa a lo kualo Kirklareli devino una sivdad de frontiera. El estado ekonomiko del Imperio Otomano empeoro de dia en dia
lo ke toko direktamente a la povlasion djudia tambien, i el rezultado fue una emigrasion massiva de estos djudios a destinasiones diversas i prinsipalmente a Estados Unidos i Fransia.
Los pogromes de 1934 en la Trakya kontra la povlasion djudia, en sivdades komo Edirne, Kirklareli i Uzunköprü ansi ke Çanakkale i Gelibolu ovligaron a munchos a fuyirsen de ayi para salvar sus vidas i suvir al primer treno en destinasion de Estambol. Eyos se aresentaron en kuartieres djudios komo Balat, Ortaköy i Kuzguncuk.
Segun los rezultados del resensamiento ke tuvo lugar en Turkia en 1960 el numero de djudios ke bivian en Kirklareli era de 200 almas solamente. En los anyos 60 i 70 la mayoria de los djudios de esta sivdad izieron sus aliya a Erets Israel, i en 1996 fue notado ke avian kedado ayi solo 7 djudios ke sus edad aproksimada era de 70 anyos.
Las organizasiones de bienfezensia de Kirklareli eran el sentro medikal Bikur Holim, ke dava kudios a proves; la organizasion Ozer Dalim, ke en las fiestas despartia produktos de alimentasion a los menesterozos i durante los mezes de invierno vistimienta kaente para las kreaturas. Dos otras organizasiones de bienfezensia mensionadas en los rejistros de la Alliance Israelite Universelle son el Gemilut Hasadim i Yismah Israel. Esta ultima tenia fondos ke sus buto era de ayudar a novias a prepararsen el ashugar i tambien ayudar al par en los gastes de la boda.
Antes de 1911 ya existian en Kirklareli otras sosiedades mas, entre eyas Le Cercle Israelite i la Fraternité. Los miembros de Le Cercle Israelite apoyavan la Benei Brit ke del punto de vista ideolojiko era la rivala de la Alliance. La Benei Brit kedo avierta asta los anyos 20 del siglo pasado.
En desparte de estas organizasiones, munchos de los djudios, en las diversas partes del Imperio Otomano, eran tambien miembros del Ittihad ve Terraki Cemiyeti – La Asosiasion de Progreso i Union, ke eyos konsideravan komo una asosiasion kreadora de una konstitusion multi-etnika.
Despues de la fondasion de la Republika Turka, en 1923, la komunidad de Kirklareli pedrio ainda mas su fuersa, prinsipalmente a kavza de desiziones tomadas por las autoridades del muevo governo turko ke eliminaron lo ke avia
kedado del rejim otomano (ke sus bazas eran la relijion i las komunidades etnikas). Por empesar el antiguo sistema de millet fue abolido. Los djudios no podian mas kovrar sus propias taksas, segun lo era echo kon la gabela. Sovre la demanda de las muevas autoridades la eskola de la Aliansa no pudo ser mas una eskola komunitaria i no teniendo mas fondos de donatores, empeso a deskayer. Aun ke pudo ser obtenido un chiko finansamiento de las muevas autoridades, en fin de kuento la eskola duvo ser serrada.
Tambien por falta de finansamiento todas las organizasiones de bienfezensia, a la eksepsion del Bikur Holim, fueron serradas.
En desparte de su ermozura natural, kon sus sharas i sus numerozos manaderos de agua, Kirklareli ofrese a sus vijitantes una rika arkitektura ke su istoria yega a sienes de anyos atras, kon monumentos de datan de le epoka otomana, entre eyos meshkitas i mizmo el edifisio de un banyo turko de la fin del siglo 17.
Kirklareli es una de las mas importantes sivdades de Trakya en la kuala bivieron largos anyos djudios ke la abandoran por razones ke no dependian de eyos.
Artículos Relacionados: