KOZINAREMOS
Una komida ke puedesh ofrir en una meza de pranso i de fiestas a vuestros envitados, sin del todo pensar si les va plazer o no !
Porke les va plazer por seguro !
Ma… Si envitatesh vejetaryanos… Devrash pensar a otra komida en el menu ! Esto les va vinir komo “kanibalizmo” !
Mis Amigitas keridas, no es difisil de azerlo i koze muy presto !
Mos meteremos una prostela (tablier, onluk) de muestro ashuar…. Kon flores, dantelas, volanes para tener el keyf de kozinar !
Puedesh avrir una muzika ke vos plaze i mizmo kantar o baylar en kozinando ! La komida sale muncho mas savroza… Yo uzo resipientes komikos i kon ermozas kolores para alegrar mi korason. Puedesh meter flores en la kozina i kozikas ke amash.
Las etiketas de las bevyentas sharonfonfon, vinos, likores se pueden despegar de los bokales, deshando estos submersidos en agua.
Dospues se sekan i se apegan a la pared, ensima de las lajas ets… Ay ke sharanfonfon de mupak ke se aze… Adoro… Adoro !
Me vino a la ideya de azer ansina de koza en rekordandome de las kamaretas de echar de mis amigitas kuando eramos adolesentes.
Apegavan a las paredes las fotografiyas de artistos i artistas, ermozos automobiles ets.
I yo keriya muncho tener paredes asemejantes en mi kamareta ma ande mozotros NO era permetido !
No se apegava en las paredes “Suzyedades i Angustyas” ! “Personas ke no tiyenen nada mas ke sus ermozuras i ke no valen nada !”. Agora ke so reyna de mis kantones puedo azer TODO lo ke kero ! I tuve gana de apegar etiketas sharanfonfon en el mupak. En Israel teniya en mi kamareta posteres ke oriyan plazido a los mansevikos ! Ayyyyyyyyy komo los amava !
Me sintiya energetika, horoza i yenna de vida…
No digo ke kozas klasikas son mursas ke se asentan al korason Nooooooo !
Ma kale azer kombinas… Esto i esto, el uno i el otro… Si un kanton ansina, un kanton mas aya ansinaaaaa…
Ke no eskapo yo kuando me meto a avlar bavajadas !
Estava aki para kontar komo se aze el entrecote sharonfonfon. BUYRUN :
ENTRECOTE SHARONFONFON
(Se puede azer kon el filet del poyo tambien)
1 KG de entrecote de vaka kortada en lamellas ( approx. 5 cm de largura i 1 cm de anchura ) i deshada en sal para ke le salga toda la sangre. Lavar dospues.
Meter un poko de azeyte de oliva en un resipyante “teflon” o mijor en un wok para kozer la karne.
Vazyar en el azeyte :
– los pedasos de karne
– ajo kortado finamente
– pimyentones vedres (i kolorados) largos i estrechos (kortar a la largor i kitar las pipitas )
– 1 sevoya kortada en lamellas finas
– sal, pimyenta preta o blanka
Friyir. (no muncho, para ke no se seke la karne), preparar una sauce kon :
——————————–
– 3 domatas rayadas
– kucharika chika de asukar
– kuchara chika de oregano
– kucharika chika de menta seka (si tenesh)
– sal i pimyenta korolada
ajuntar esta sos a la komida ke se esta kozyendo kon – medya kupa de vino korolado Se sierve kon patatas buyidas i prishil ensima o al orno.
Salata vedre de lechua i karota rayada para un poko de kolor en la meza !
Vino kolorado
i muncho karinyo !
Artículos Relacionados: