La Kula de Galata

Por:
- - Visto 944 veces

En desparte del rolo muy importante ke djugo en la konkista d’Estambol por el sultan Fatih (el Konkistador) Mehmet, el 29 de Mayo 1453, la Kula (Torre) de Galata es uno de los simbolos ke karakterizan mas esta sivdad. Eya dio su nombre al kuartier yamado por los turkos Kuledibi i por los djudios la Kula. La torre de Galata es una de las mas antiguas del mundo i por primera vez fue fraguada por el imperador bizantino Anastasius, en el anyo 507 de muestra era.

Kuando en el anyo 1348 la torre paso a manos del prinsipato veneziano eya fue rekonstruida de piedra i yamada la Torre de Cristo. Durante la 4ena Kruzada eya fue danyada seriozamente i restorada entre los anyos 1445-1446, adjustandole unos kuantos metros mas. Despues de la konkista d’Estambol, la Kula fue restorada kada 80-90 anyos. En el siglo 16 eya sirvio de abrigo a los prizioneros de gerra kristianos ke lavoravan en la konstruksion de naves, en la tersana de Kasimpaşa.


Durante el reyno del Sultan Murat III fue avierto ayi un sentro para previziones meteorolojikas ke fue serrado en 1579.

Un evenimiento muy importante ke tuvo lugar en la torre de Galata fue el bolo de Hezarfen Ahmet Çelebi, savio i ombre de sensia ke bivio en Estambol en el siglo 17 i ke entro a la istoria aerea komo la primera persona ke reusho a bolar kon alas artifisiales alkansando su buto.

Enfluensado por las investigasiones ke avia echo Leonardo da Vinci en todo lo ke toka el bolo de los pasharos, i tomando komo exemplo a un otro sientista turko, Imam Cevheri, ke avia pensado siglos antes de Hezarfen a realizar una semejante aventura, el kontinuo a investigar los movimientos de los pasharos. Konstruyendo un aparato semejante a alas de pasharo, Hezarfen suvio a la tarasa de la Kula, i aprovechandose del ayre, se desho kayer a lo vazio i reusho a bolar asta Űsküdar, kuartier en la parte asiatika del Bosfor. En muestros dias uno de los aereportos de Estambol yeva el nombre de Hezarfen.

Durante el Imperio Otomano la Kula de Galata fue kemada en fuegos i rekonstruida varias vezes. Desde 1875 i asta 1964 eya sirivo de posto de observasion para fuegos i 1967 fue avierta al publiko komo sitio turistiko.

La Kula se topa a unos 425 metros del Kuerno de Oro (Haliç), a una altura de 35 metros sovre el nivel de la mar. La espesor de sus paredes es 3.75 ms., su diametro interior es de kaji 9 metros, su diametro eksterior de 16.45 ms, i eya tiene komo 70 metros de altura. Oy, la torre, kon su tarasa i su manyifiko panorama, sus restorantes i klubes de noche es uno de los lugares mas atraktivos, apresiados i vijitados por turistas de todas las partes del mundo i de Turkia tambien.

Asta unos 50-60 anyos atras el kuartier de la Kula era povlado en su mayoria por djudios sefaradis, i el djudeo-espanyol se oyia avlar por las ventanas aviertas de las kazas i en la kaye, a kada paso i paso. Es en este kuartier ke se topava la eskola de l’Aliansa, i entre munchos otros, dos de los mas famozos magazenes de la kaye Büyük Hendek, la kaye prinsipala de la malle: el de Belifante “el shekerdji”, renomado por su masapan i sharope blanko i el de Musyu Pardo, ke alkilava chapeos chilindro i vestidos para los novios i sus padres. Anyos atras se vendian ayi, en la fiesta de Purim, las mavlachas i otras dulserias mas, i antes de la fiesta de Sukot, todos los menesteres para la suka. Ayi se topa asta oy dia el kal Neve Shalom, la mas grande sinagoga de la komunidad djudia d’Estambol

Este kuartier dio tambien su nombre a la piesa muzikala “Kula 1930” prezentada por los miembros del klub Dostluk Yurdu ke konta, de manera autentika i umoristika, la vida de los sefaradis ke bivieron ayi.

En la Kula oy ya no biven mas djudios i el lugar tiene un aspekto muy diferente del de su pasado. En el Kuledibi de muestros dias ay restorantes i kafes de los mas modernos i sus kazas son restoradas i alkiladas a turistos i a sivdadinos estambollis komo artistas, eskritores i mas. Ayi se topa tambien el otel-butik Anemon, en un edifisio ke data del siglo 18.

En sus kalejikas i al deredor de la Kula son organizados espektakulos, komo por exemplo las Jornadas Evropeas de Kultura Djudia ke tuvieron lugar ayi en el mez de Septembre de 2009 i ke fueron dedikadas esta vez a la gastronomia.

La Kula de las ultimas dekadas, kon sus rekuerdos yenos de nostaljia, esta ainda biva en la memoria de munchos de los de entre mozotros ke nasieron i se engrandesieron en esta ermoza sivdad ke es Estambol.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: