La Loteria Turka

Por:
- - Visto 1007 veces

Azriel i Liza bivian en la kazika de Hadji Sali. Una kazika de dos tabakas– abasho un magazen ke lo alkilava a Same el tenekedji, i en el kat de ariva morava Azriel kon su famiya. La kazika no tenia ni agua ni “lugar” (tualet) i los kiradjis se servian de la fuente i del lugar en el kortijo.

La prove Liza, no le abastava el galut de la agua ke la azia abashar i suvir vente vezes al dia, kalia ke tuviera i pachas rezias para ir kon los krios asta el lugar o por otros menesteres. Pensando komo salir de esta angusia Azriel se akodro de la loteria turka. En Filibe unos kuantos ya ganaron buenas paras, porke ke no apreve i el tambien? Puede ser ke el Dio se apiada de esta buena mujer ke ya se kanso de penar para la djente…. Todo akontese, para las maravias del Dio no ay kavo!! Kon esta esperansa Azriel va al adjente de la loteria, paga dos frankos par un bilyeto i se torna a kaza gustozo i alegre.

En los dias ke sigieron asta ke fue travada la loteria, en su kaza no avia otro lakirdi afuera de la loteria. Se azian modos i maneras de planes, komo tenian ke ser la morada, la vistimienta, los mobles i ke echo muevo tomaria Azriel despues de la ganansia.


Vino el dia de la loteria i los dos no se les supo el esfuenyo. Antes de salir de kaza Azriel disho a su mujer:

-Si me ves venir kon payton es ke ya gani la ganansia grande.

Liza le responde ke viendolo vinir kon payton eya se va meter a romper la vidreria i echar del balkon abasho kuanto tiesto burakado ay i no ay.

En la sivdad Azriel fue derecho al adjente de la loteria ke djusto ke venia de la posta kon un telegrafo de Estambol ande estavan asinyados los numeros i las ganasias. El konsulto el telegrama i el bilyeto de Azriel, lo miro otra vez i despues le batio la espalda i le disho ke por esta vez no gano, ma si kontinua a djugar por seguro ke la ganansia no tadrara.

De estas palavras el povereto se entezo. Salio de ayi entontesido, sin mirar ande esta pizando i en sopito aze un paso yerrado i se kaye en un foyo de kanalizasion. A los gritos akudyeron la djente i lo kitaron. Entre la muchidumbre ke se arekojo estava Davi Baruh ke lo konosia. Viendo su estado i ke no podia dar un paso, lo suvieron a un payton i travaron para su kaza.

Por el kamino Azriel ke se muria de las dolores, topo fuersa en si para dizir a su amigo: “Te rogo, Davi, korre i dile a mi mujer ke no este a romper nada, porke las mashallas del payton son ke me kayi i me rompi la pacha.”

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: