Vos kontare !….Un dia estava kaminando en las kayes de New York ke paresen a la persona muy muy estrechas, porke los edifisios son giganteskos de dos partes ! Aayyyyyy ! Estava pensando ke me ivan a kayer ensima de mi kavesika luzya ma no tan yenna ! (en akeyos diyas por seguro ! Porke ya no esto mas luzya, ma un poko mas inchida afilu kon bavajadas !)
Esto es New York ! Nunka se puede saver ! Supito tirguelos i alamparas…se avren los sielos…Ayyyyyy mi madre bendicha ! Mil guerkos del gehinnam ! Ke vo azer yo ? La gente korryendo de todas las partes ! Arrondjandome de uno a l’otro komo un topiziko (ball) de papel ! Topi diya de vistirme el pardessus blanko i muevo ke merki en el merkado de Lod (en Israel) – ke merkado maraviyozo ! Me namoriya irme los martes ayi i gastar todo lo ke puediya en alikas i tumbanikas ! (kozas ke ni se tyenen de menester)
Iva kontar New York, la luvya o el merkado de Lod ? Todo se karishtireyo (se emmlesko) ! Empesar de muevo ? Si !!! No ay remedio ! Se karishtireyo de negra manera ! Si, ke luvya ! Esto es ! El pardesu… Ke pekado ! Eskuriyendo i manchado de lodo. Ke bushko yo aki ? Israel…tu sol.. Ande estas mi amor?
Aspera mujerrr !!! Ke me estas arrondjando ansina ? No lo
puedo kreyer ! En la mas sivilizada de las sivdades te arrondjan, te manchan de lodo, aze luvya !!! Ya estaaa New York entero !
Ke me mankava en Lod ? Es vedra ke mos serraron el uniko
sinema ke teniyamos “ORLY”. Mos esta mankando ! Ke ermozo
ke yoravamos en los filmos turkos, indianos i israelianos a vezes. Yoram Gaon.. Ke lo bueno miyo ! Ke hombre, eh ? Un suenyo! Esto es ser una estreya de sinema ! Komo la abraso a la akeya, ehh ? De selarse la persona por mi vida ! I akel punyo ? Ke maraviya ! Yo le dariya otr’un punyo a este p……. ! No es ke estava ermoza la namorada… No, del todo ! Kero dizir, yo no la topi ermoza ! Ma va demandale a el ! Brigıtte Bardot ! I se la
keriya komer el otro ! Ya meresyo el punyo i komo !
La luvyaaa si si ! Lo mas difisil esta ke estas kalejas no tienen nombres ! Solo numeros ! I yo no era de las mas fuertes en matematika kuando me iva a la skola ! Numeros i yo, ni mos
saludavamos ! Agora kaleja 4, kaleja, 5 kaleja 22 ! Perdon…
Avenidas ! Ma yo les di nombres ke entiyendo ! La 5 es Avenida
Yerushalayim… la 4 es Avenida Gordon.. La 3 es Avenida Shaul Hameleh, la 6 es Avenida Ben Gurion, la 36 es Rehoviko Ben
Eliezer ! Ansina no se karishtereyan mas i son mas simpatikas,
mas konosidas !
Kon el de la lingua no esta muy muy negro komo me imajinava ! Topas uno o una ke esta vistido komo en Mea Shearim (el kartye de los Judyos relijyozos en Yerushalayim) i si esta de buena humor, te va arresponder en Hebreo ….Ma ! Sus Hebreo va
entiendelo ! Angleado, aguado, sin savor, charpeyado i ademas de los akeyos… Los Yiddish!
Ya me rompiya la kavesa kon muestra profesora de Tanah en la eskola, i fina ke me ambezi, por fin, ke keriya de mi, ya me desharon 3 anyos en la mizma klasa! … Mijor de nada kuando te responde el Rabbi o la Rubisa… A lo manko saves ande ir, komo ir, ken topar i ke dizir ! Te ayudan komo pueden negros de eyos! Bendicho el Di-o ke estan ayi i no todos en Lod ! Imajinate si los teniyamos todos en muestras kalejas .. ehhhhhh ? Unos tapados komo las tapadas (un tipo de boreka) , otras aviertas fina la …, flores en el balkon ! De pishar de la riza ! No, ya estan buenikos ande estan i el Di-o ke les de todo lo bueno. Eyoz mos estan aparejando el Ganeden ! Te eskondes debasho del fostaniko i tienes el mijor passe partout ke puede egzistir para Aya ! Ya no te demandaran nada a la entrada porke estas buen akompanyado. Aze dikkat (be careful) solo de no riyirte ! Esto no kale !
Ayyyyyyy ke luvya ke estava ! El pardesu…
Karinyooooooooos a todos
Sharope blanco en Istanbul
Artículos Relacionados: