La Mujer Deve Saver I Deve Tener..

Por:
- - Visto 246 veces

“La mujer dezmeyoyuda aze su marido esklavo i va ser la mujer de un esklavo toda su vida… Alora ke la mujer meyoyuda va azer un rey de su marido i eya sera su reyna por siempre.”

“La mujer meyoyuda es la ke save ser tonta i idiota kuando lo kale… ”

“Una mujer intellijente aze en primero sus kaveyos eskova ma mira ke esto no esta valyendo, se asuve a su eskova i se aze bruha…”
“Ser al lado del hombre i nunka en frente de el… ”


“El hombre no ama la mas ermoza mujer ma la ke ermozeya su vida..”

uuuuuuuuh…. Son sin kavo lo ke disheron ensima de este tema… Ma, mijor va ser agora de empesar a lo ke kije eskrivirvos oy ! Sovre la mujer por seguro !…..

Lo arresivi en Turko ma no me akodro de ken….
Munchas grasyas…..

No desidi dayinda si me plazyo o no
ma lo vo kompartir kon vozotros
DOSPUES ke lo Sharopeyi, lo troki,
lo traduizi, le adjusti le kiti i le meti…..
Se mareyo i se shasheyo el dezmazalado
del teksto !

Kon karinyo
Sharope blanco

UNA MUJER DEVE TENER :

. Bastante moneda suya para siempre
pueder alkilar un lugar ke va aparteneser
solo a eya, mizma si no lo kere o no lo
tiyene de menester.

. Un vistido impekable, ermozo, limpyo
i utiledeyado (planchado) por el kavzo
ke su patron o el hombre de sus suenyos
le diriya de ser pronta o la envitariya a
senar afuera en una hora….

. Ermozos i interesantes rekuerdos ke la
diverteriyan durante su vejes seya
eskrivyendolos, seya kontandolos…

. Un amigo ke la divyerte i la aze riyir i
un otro kon el kual puede ser triste i
yorar be keyf !

. Un ermozo mueble ke no era de dingunos
de su familya antes de eya…..

. un servisyo de platos i de kupas, de
kotelleriya ets. para kuando tendra personas
sharanfonfon ke seran envitados a komer en
su kaza.

. a) bastante koraje i vayensya para kuando
no va ser mas dezeyada en su lavoro o
por un hombre ke estima, esta enamorada
o ke le konviene….

. b) La kavesa alta i no espantarse de saludar
una persona kon ken esta arravyada…

c) el saverisyo de diskutir kon amigos o
keridos en su familya, sin yegar al punto de
derrokar los puentes i meter un punto final a
la relasyon !

UNA MUJER DEVE SAVER :

. Kuando kayarse i serrar su boka i kuando
fuyir los pies deskalsos mizmo !

. akseptar la largor de sus piernas, la forma de
su puerpo i komo es su kara en mizmo tiempo
ke el karakter i el komporto i las reaksyones
de sus parientes.

. ke… mizmo si su chikes fue muy doloroza i
difisil a suportar, todo ya paso i no se tiyene
de mashkar mas i mas lo ke esta pronto a
englutir.

. Kualo akseptar por amor i kualo nunka akseptar !

. Komo bivir sola mizmo si esto no le plaze.
I…. Mizmo mas ! Komo apresyar este estado,
gozar i reingrasyar Di-o de ser la duenya de su
kaza i azer lo ke dezeya….

. En ken tener konfiensya i en ken no kon razones….

. Ande ir i ande NO ir. Kon ken toparse, kon ken
avlar, kualo dizir ande i komo, gozar de los boskes,
del ayre i de la mar kuando nesesita arrepozar su
alma i kalmar su ravya….

. Kualo puede azer i no abastar en una hora, un diya,
un mez i un anyo….

. Saver aprontar i improvizar una meza mizmo kon
muy pokos ingredientes en kaza para kavzos
inesperados.

. Soriyir, ser de buena humor, ver las kozas de sus
buena parte, tener fe i esperansa, amar a las personas,
ayudar el ke lo tiene menester, ser justa i nunka de
dos karas, kombatir el orgulyo i la vanitad, ser modesta
i kontente de lo ke tiene, ser limpya i ordonada, kudyar
su salud i la salud de sus keridos….. I ganar su pan
kuando lo nesesita !

NO AY MENESTER DE ESKAPAR UNIVERSITAS PARA
ESTAS KOZAS…. BASTA DE SAVERLO DE KAZA I DE
PUEDER PENSARLO…….UNA BUENA MADRE I UN
BUEN PADRE SON LAS YAVES DE LA REUSHITAD EN LA VIDA……

[email protected]

Acerca de Sharope Blanco

SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: