La rebuelta del Ghetto de Varsovia (1)

Por:
- - Visto 434 veces

 

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes 9 de mayo, a las dos i medya, en el Centre Communautaire. Estos atelyes son avyertos a todos, venid munchos.


Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.

http://www.radioj.fr

El myerkoles pasado 19 de avril fue el setenta-i-kuatren aniversaryo de la rebuelta del Ghetto de Varsovia, ke empeso el lunes 19 de avril 1943, ke era erev Pesah.

Ize, aze djusto diez anyos de esto, dos emisyones sovre esta rebuelta, i me pensi ke no aviya danyo de azerlas de muevo diez anyos mas despues.

El 19 de avril 1943, la Evropa entera era dainda okupada por los Almanes. Los djudyos del ghetto de Varsovia no puediyan esperar dingun ayudo exteryor, ni tener la mas chika esperansa de ganar. El kampo de bataya se topava en una male en medyo de la sivdad, rodeada por una pared komo la de una tomba. Los kombatantes ya eran enterrados bivos antes de empesar la bataya. Solo puediyan morir, i por su lucha echar este ultimo grito de muerte al mundo ke los aviya abandonados. Los SS pensavan eskapar esta rebuelta en tres diyas. Uzaron artiyeriya, tankes, avyones i gaz kontra mansevos i mansevikas eskondidos en medyo de hanes en fuego, sin komer ni bever, solo armados de unos kuantos revolveres, granadas i kocktails Molotov echos de kaza, o armas tomadas al enemigo matado. A kada noche, los Almanes podiyan ir a repozarse, komer i bever, tomar muevas armas. Nada de esto para los djudyos. Afillu esta disproporsyon, les tomo a los Almanes kuatro semanas, i munchos muertos, antes ke, el 16 de mayo, el kapo de los SS diga la bataya eskapada, lo ke no era vedra porke no se eskapo kon esto la rezistansya, ke sureo sporadikamente en el ghetto mezes i mezes mas despues.

Afillu si la istorya de esta rebuelta es la de djudyos lehlis, i se eskrivyo en yidisch i no en muestra lingua, es mi dever sagrado, un diya komo oy, de avlarvos, i el djueves ke vyene tambyen porke todo no se puede kontar en un diya solo, de esta rebuelta, ke asigun mi es la oja la mas gloryoza i trajika de toda la istorya de muestro puevlo, ke por tanto es un vyejo puevlo ke tuvo tantas okazyones de konoser ojas gloryozas, komo las batayas ganadas por los Makabim kontra gregos muncho mas numerozos i armados, o las batayas ganadas o pedridas de los djudyos kontra los Romanos en las dos rebueltas de 70 i 135, o las batayas de 1948 o de 1967 en Israel, a kada vez de pokos mal armados kontra munchos byen armados.

Antes de kontarvos komo se paso esta rebuelta, ke en vedra fueron dos, una chika en janvier 1943 i la grande en avril, kale empesar por kontarvos kualo era el ghetto de Varsovia.

Para azer esta emisyon, lavori sovre el livro de Michel Borwicz “L’insurrection du ghetto de Varsovie” editado en la Collection Archives ande Julliard. Se podriya eskrivir un livro solo sovre lo ke akontesyo a este Michel Borwicz, ke era el kapo de un grupo klandestino en el kampo de exterminasyon de Lwow, ke fue enforkado i ke se salvo porke la kuedra se rumpyo, i ke despues pudo fuirse i azerse komandante en la resistansya polaka.

Los Almanes entraron en Varsovia en el otonyo 1939, i pishin empesaron las negriguras, las matansinas, los rovos, ets, kontra los djudyos ovligados de yevar al braso un magen david, asta ke, el 2 de oktovre 1940, el governador de Varsovia de el orden ke, antes del 31 del mismo mes, todos los djudyos de Varsovia i sus alderedores deviyan morar en una male djudiya, en vedra un ghetto, porke serrado por paredes, i sin derecho de salir de aya.

Al empesijo los djudyos se toparon 400.000 en una chika male, sin tener para morar, para lavorar, para komer, kon los piyojos ke vinyeron presto i kon eyos el typhus. La hazinura i la ambre matavan a 7.000 personas al mes.

Los ke vyeron al filmo de Frederic Rossif Le temps du Ghetto ya se akodran de estas imajenes de puerpos desmudos en medyo de las kayes, djusto kuvyertos de papeles suzyos.

Los ke toparon lavoro son los ovreros de los atelyes almanes, miles de esklavos pagados por dos litros de sopa al diya.

4.000 ovreros lavoravan en atelyes ahuera del ghetto. Se ivan al lavoro i aboltavan al ghetto eskortados por askeres almanes para ke no se fuygan. Ama esto permityo unos trafikos para topar afuera kozas de komer, o mismo armas kuando era posivle.

En mas de los muertos por ambre i hazinura, aviyan los ke los Almanes matavan o aferravan por una razon o por otra.

Afillu estas kondisyones dramatikas, el ghetto teniya una intensa aktividad kulturala i sosyala. Ayudo a las kriaturas, a los proves, teatro, poeziya, mismo un liseo klandestino i una fakultad de medisina kon los mijores profesores, ke estudyaron los efektos de la ambre sovre las kriaturas…

Los istoryanos se organizaron desde el empesijo para reunir arshivos de todo lo ke se pasava. El kapo de esta organizasyon de arshivos se yamava Emmanuel Ringelblum. Ay diez anyos se tuvo una ekspozisyon en el Memoryal de la Shoah sovre estos arshivos enterrados para eskonderlos i ansina salvarlos de la destruisyon del ghetto. Ringelblum sovrebivyo asta 1944, i uno de sus kolaboradores sovrebivyo despues de la gerra, i kon su ayudo se pudyeron rekuperar despues de la gerra estos arshivos grasyas a los kuales se puede kontar oy la istorya del ghetto, kon su literatura, su poeziya, sus dokumentos i las prevas i rekodros de la lucha ke se paso en el ghetto.

Munchos djudyos ya eran de antes de la gerra organizados en organizasyones politikas, relijyozas o no, i tambyen movimyentos de mansevez, komo Dror, Hashomer atsaïr, Haluts, Gordonya, aNoar aTsioni, Akiva, Betar, ets. Kada movimyento kon su bandera, sus aktividades, sus gazetas. Kale pensar a estos mansevikos enserrados por las paredes del ghetto i ambezandosen agrikultura para arrebivir un diya la tyerra de Palestina. Kaji todos estos mansevikos i mansevikas se muryeron sin ver la tyerra de sus suenyos. Solo kedaron un punyado de unos kuantos, uno sovre mil, ke sovrebivyeron i ke fraguaron mas despues el kibuts Lohamei a getaot, kombatantes de los ghettos.

Los djudyos se organizaron en komités de immovles, i kadal diya embiyavan un rapporto a Ringelblum sovre la vida – i la muerte – en kada immovle. Debasho de kada immovle se fraguaron abrigos eskondidos, ke sirvyeron en primero de eskondijo de las personas bushkadas por los Almanes, i ke mas despues fasilitaron muncho la rebuelta kuando empeso, porke kada immovle se aviya organizado en una chika fortaleza, kon kaminos sekretos de basho de la tyerra para ir del uno al otro, i tambyen por debasho de los tejados.

La vida en el ghetto era una lucha de kadal diya kontra la ambre i, de antes ke empesen las deportasyones, ya aviyan matansinas komo en la noche del 17 al 18 de avril 1942.

Ama esta situasyon terrivle se izo muncho mas preta kuando, el 22 de julyo 1942, los Almanes anunsyaron la “transplantasyon” (umsiedlung) de los djudyos de Varsovia verso el Este. En vedra no era una transplantasyon verso el este, ama la deportasyon verso el kampo de exterminasyon de Treblinka.

El diya despues, 23 de julyo, Adam Tcherniakov, kapo del Judenrat, la organizasyon ofisyala de los Djudyos de Varsovia frente a los Almanes, aprendyendo esto, se asento en su buro i demando una kupa de agua. Se entosigo kon syanur, deshando solo delantre de el un papel ande estava solo eskrito el shifro 7.000. Los almanes le aviyan demandado de darles 7.000 djudyos por diya, i el no topo otro remedyo ke de matarse el mismo.

De este diya empeso uno de los kapitulos los mas sinistros de la istorya de la umanidad. Kadal diya les Almanes yevavan unos 10.000 personas en una plaza yamada Umshagplatz, de 30 metros sovre 80, en la kuala se pasavan senas atroses, las famiyas syendo separadas, los ombres de un lado, sus mujeres i kriaturas de otro lado, i todos embiyados por trenos a la muerte, ombres mujeres i kriaturas, gazados, fuzilyados, enforkados, entosigados, aogados en la agua, kemados bivos, enterrados bivos o aharvados asta la muerte. I una vez muertos, sus puerpos arrovados de sus kaveyos, de sus dyentes, asta de sus gudrura.

Asigun los shifros de los Almanes, 310.000 djudyos fueron asasinados ansina entre julyo i septyembre 1942.

Kedavan ofisyalmente 33.000 moradores en el ghetto, ama asigun los istoryanos, kon los ke pudyeron eskonderse, deviyan ser unos 50.000.

Los Polakos kristyanos miraron esto kon terror. La frente del renasimyento nasyonal, organizasyon katolika klandestina, eskrivyo:

“El mundo esta vyendo este krimen, el mas terrivle ke toda la istorya tenga nunka visto, i se kaya. La matansina de milyones de seres sin defensa se aze en medyo de un silensyo ostil i jeneral. Los djudyos ke mueren son rodeados solo por Pilates ke se lavan las manos. Mozotros no keremos ser Pilates. Protestamos del fundo de muestros korasones, yenos de piyadad, de indignasyon i de terror.”

Malorozamente, aviya tambyen en Polonya muy munchos antisemitos, mismo ande los rezistantes. Una gazeta de la rezistansya, yamada la Politika, eskriviya , a propozito de los rezistantes djudyos: “El puevlo polako kyere la supresyon de estos maldichos sorreteros. Por esto es ke no kale tener la mas chika piadad kuando son matados”. Esto es la rezistansya. No se kyere avlar de las gazetas polakas ofisyales…

Los djudyos del ghetto, kual ke sea sus grupo politiko o relijyozo, se meten todos d’akodro para luchar, i el 2 de desyembre 1942, es kriada la Organizasyon Djudya de Kombate. Mismo mansevos djudyos eskondidos afuera del ghetto aboltaron en el ghetto para morir las armas en la mano.

Ama ke armas i komo toparlas? Kale demandar a la rezistansya polaka. Les dan diez revolveres. I despues nada. Kale asperar.

Arie Wilner, uno de los kapos djudyos ke se topava ahuera del ghetto para aprovar de merkar armas, es aferrado por la Gestapo kon una validja yena de armas. Torturado kon muncha krueldad, no avla. Se aze maksus embiyar en un treno de deportasyon i se fuye para aboltar al ghetto ande sera matado kon sus amigos durante la rebuelta.

Una mansevika ke sovrebivyo konta en un livro todos sus peligros i difikultades para topar, eskondida afuera del ghetto, a kyen merkar un poko de dinamita i tres revolveres, pagar para la dinamita i los tres revolveres i tener solo la dinamita i no los revolveres, sin la para atras, los peligros despues par yevar la dinamita asta la pared del ghetto, los peligros para entrar en el ghetto kon la dinamita sin ser vista de los Almanes ke guadravan kada burrako. Kada revolver merkado era una odisea ande vente vezes se pudiya ser aferrado i torturado a muerte.

El 18 de janvier 1943, los Almanes yegan por sorpresa i vazyan el ospital de sus hazinos. Los ke no pueden alevantarse son fuzilyados en la kama. Aferran miles de djudyos en todas partes, antes ke puedan eskonderse en los abrigos preparados de antes.

Un sovrebivyente konta ke su grupo de 40 kombatantes del Dror teniya kuatro revolveres i tres granadas. Los otros eran armados de palos, botelyas, kuchiyos, ets. Mos konta komo un grupo de kombatantes del Hashomer atsaïr atakaron a los Almanes ke aviviyan aferrado a djudyos i los yevavan; mataron a unos kuantos Almanes. Los djudyos se fuyeron en una kaza ke los Almanes kemaron, matando a todos los djudyos. El solo ke pudo eskapar fue Mordehaï Anielewicz, kapo del Hashomer i despues de toda la organizasyon, ke pudo tambyen, luchando kontra un Alman, arrovarle su tufenk.

El grupo del Dror ande esta el ke konta la istorya, aspera los Almanes en kompaniya del grande poeta djudyo Itshak Katsenelson, i kuando finalmente vyenen los Almanes, los djudyos matan a dos Almanes, los otros almanes se fuyen.

Ansina se paso la noche del 18 al 19 de enero, i el 19 a las diez aboltan los Almanes. Los djudyos matan a munchos i les arrovan sus armas.

El 21 de enero los Almanes, para vengar sus muertos, matan a munchos djudyos, ama despues no vyenen mas.

Ansina s’eskapa la chika rebuelta de enero. Lo ke no saviyan los Almanes, es ke todas las armas ke teniyan los djudyos eran diez revolveres i nada mas.

Los rezistantes polakos, del otro lado de la pared del Ghetto, aprenden ke los Almanes, sovre 60 ombres, pedryeron la mitad, kijo dizir 20 muertos i 10 firidos.

Un otro poeta djudyo, Ladislas Szlengel, ke va morir komo los otros mas despues, eskrive un poema ke s’eskapa ansina:

Apiyadamos, o Dyo, del gehinnam,
De las rampas, de las estasyones de eskojimyento,
De los trenos de muerte, de los ornos, de los kampos!
Damos armas, Sinyor del syelo!
Arma muestras manos, Dyo de Israel!
Azemos morir en kombatyendo!
Akordamos de mirar djusto,
De travar djusto, frente a frente!

Un mansevo, nasido en 1919, dunke aedado de 24 anyos, toma el komandamyento de la organizasyon djudya de kombate. Es Mordehaï Anielewicz, ya avli de el komo kapo del Hashomer atsaïr kuando se salvo kon un tufenk aferrado en luchando kontra un Alman. Este Mordehaï Anielewicz es uno de los mas puros giborim ke nunka tuvo el puevlo djudyo.

Al lado de la organizasyon de mansevos komandada por Mordehaï Anielewicz, aviya tambyen la Asosyasyon militar djudiya, komandada por David Maurice Apfelbaum (paryente de Marian Apfelbaum, el profesor de medisina de nutrisyon, agora muy konosido en Fransya). Esta asosyasyon era kompozada de militares djudyos de la armada polaka i tambyen de militantes del Betar, kijo dizir de los djudyos de derecha. La organizasyon i la asosyasyon se ayudaron sin adjuntarse.

Tambyen egzisten grupos armados ke no azen parte de dinguna organizasyon.

Los djudyos ya saven ke los Almanes van a atakar un diya kon fuersa, i ke kale prepararse a asperarlos. En el ghetto, se konstruyen diya i noche abrigos en la tyerra, eskondijos, kaminos eskondidos.

I lo mas yuch, es de topar armas. La resistansya polaka les da, o les vende, no se, unos 50 revolveres i 50 granadas. Es muy muy poko para tantos kombatantes.

Agora tengo de kedarme aki porke ya vino el tyempo de eskapar esta emisyon. Al otro djueves vos kontaré la rebuelta misma, si kyere el Dyo!

1 comentario en «La rebuelta del Ghetto de Varsovia (1)»

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: