Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el martes ke vyene 9 de mayis, a las dos i medya, en el Centre Communautaire. Estos atelyes son avyertos a todos, venid munchos.
Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.
http://www.radioj.fr
El djueves pasado, por la okazyon del setenta-i-kuatren aniversaryo de la rebuelta del Ghetto de Varsovia, empesi a kontarvos lo ke aviya akontesido antes de esta rebuelta, ama no tuve tyempo para yegar a la rebuelta misma.
Vo aprovar oy de kontarvos esta istorya, savyendo ke, komo lo disho en dos byervos Jorge Semprun “azer imajinar lo inimajinavle es imposivle”. Mismo kon todos los testimonyos i todos los arshivos salvados, nunka dinguno podra dar un diya a los ke no lo bivyeron una idea vedradera de lo ke fue. Los ke komo yo no an bivido esto son komo los ke no an bivido la vida de los kampos: estamos komo syegos a kyen uno kyere eksplikar kualo son las kolores. No savremos nunka lo ke fue el infyerno del Ghetto, solo puedemos aprovar de aserkarmos lo mas posivle de la realidad.
Vos deshi la semana pasada avlandovos de la difikultad de tomar armas.
Un sovrebivyente konta komo, vyendo ke no topan nada de merkar, i meldando un livro de kimika, uno de los kombatantes dize: mozotros puedemos fabrikar explozivos. I konta komo aprovaron, i a poko a poko se ambezaron a fabrikar granadas i boteyas Molotov.
Kaliya paras para merkar armas i materyales para fabrikar eksplozivos. Los kombatantes no tyenen paras. El Judenrat tyene. Los kombatantes aferran al ijo de un kapo del judenrat i amenasan de matarlo si el judenrat no paga un milyon de zlotys a la organizasyon. Lo ke izo!
Entre janvier i avril 1943 los djudyos ke kolaboran kon los Almanes son matados el uno despues del otro por los kombatantes.
Los Almanes ke vyenen en el ghetto a pokos son atakados i matados. De vez en kuando vyenen a munchos, i matan lo mas de djudyos ke pueden, i se van. Yaman entre eyos el ghetto banditenstadt (sivdad de bandidos).
A poko a poko, se arrekojen las armas, guadradas en un eskondijo muy sekreto ke Ringelblum pudo ver.
Los djudyos saven ke los Almanes van a vinir en fuersa, ama no saven kuando. Los Almanes, eyos, ya entendyeron ke va aver rezistansya i se preparan. Himmler eskoje komo kapo el jeneral SS Jurgen Stroop, i los Almanes reunen una armada importante kompozada de kaji 7.000 soldados SS, diez tankes, artilyeriya i avyones de bombardamyento.
El 18 de avril 1943, un alhad, los Almanes son prontos. Ama los djudyos tambyen, no ay sorpreza, ya los ven prepararse.
I el 19, ay de esto 74 anyos, a las sej de la demanyana, antes ke empese Pesah a la tadre, los Almanes entran. Los djudyos ya los estan asperando, los deshan entrar, i despues travan de las ventanas. Kaye Nalewski, un sovrebivyente konta ke los Almanes pyedren 40 ombres sin un firido ande su grupo de djudyos. “Una alegriya indeskriptivle mos alevanta, konta este ombre. Ya savemos muy byen ke esto es solo el empesijo i ke kual ke sean las pyedritas de los Almanes, la lucha se eskapara por muestra muerte a todos. Muestro solo plazer es de ver los puerpos de los almanes matados espandidos en basho!”
A la televizyon en 1993, kuando fue el sinkuenten aniversaryo del solevantamyento del Ghetto, vide el testimonyo de una mujer ke aziya parte de los kombatantes. Me akodro de dos kozas ke diziya:
-la primera, era la sorpreza de los Almanes de ver mansevikas ke les travavan ensima; gritavan entre eyos: ay tambyen mujeres ke travan!
– la sigunda, era el plazer de esta mujer la primera vez ke vido korrer el “doyche blut”, la sangre almana en yidisch…
Los kombates eran en toda parte, i afillu si los testigos sovrebivyentes de un lado, ama tambyen el jeneral SS del otro lado, deskriven estos todos kombates, no tengo aki el tyempo de kontarvos kada kombate de esta demanyana del 19 de avril, ama lo siguro es ke los Almanes tyenen mas munchos muertos ke los djudyos, i ke se fuyen. A la mediudiya aboltan kon tankes. Los djudyos los deshan entrar, i despues echan botelyas Molotov sovre los tankes. Dos se keman. Los Almanes de detras se kyeren fuyir, los djudyos les travan ensima.
A la plasa Muranowski defendida por la Asosyasyon militar de Apfelbaum, los djudyos tyenen una mitrayadora sovre un tejado i los Almanes no pueden azer nada. A las ocho de la tadre, los Almanes se van. Puede empesar Pesah. Fin del primer diya de la rebuelta del ghetto de Varsovia.
Esto avlando del ghetto sentral. Aviya tambyen el chiko ghetto, separado, aviya tambyen los atelyes de kuero i los atelyes de furchas, los unos separados de los otros. Aya tambyen los ovreros empesaron la lucha para matar lo mas posivle de Almanes ke veiyan.
En los atelyes de kuero, los almanes no entran. Los kombatantes asperan de ver Almanes para atakarlos. El 20 avril, ven una trupa de soldados indosen al ghetto sentral. Los djudyos del atelye les echan dos granadas i matan a diez Almanes. Los otros se fuyen. Despues aboltan, ama los djudyos ya se eskondyeron. Tres Lettones, ayudantes de los Almanes, los topan. Los djudyos matan a uno, i los dos otros se fuyen.
Otro grupo de ovreros djudyos aze fonksyonar una mina kuando pasan los Almanes, ama los ilos se aviyan derretido en la tyerra i la mina no explozo. De birra, los djudyos echan granadas sovre una trupa de Almanes i matan a trenta de eyos.
El myerkoles 21, atakan de muevo a Almanes indosen al ghetto sentral i matan a unos kuantos. Ama los djudyos de este atalye son izolados.
El djueves 22, los djudyos atakan a sinko Almanes ama tyenen dos matados i un firido.
En los atelyes de las furchas, son tredje kombatantes. No es ke los otros no kyeren kombatir, ama las armas faltan. I agora un kuchiyo o un palo no sirve mas de nada: kale armas de fuego.
Los kombatantes tyenen una bomba artezanala aparajeda de antes a la entrada del atelye. El 20 avril, los Almanes aprovan de entrar, los djudyos azen explozar la mina i, eya, al kontraryo de la de los del kuero, exploza i mata a munchos Almanes. Los otros se fuyen. Dos oras despues, aboltan. Yene los djudyos los atakan, matan a munchos, i los otros se fuyen de muevo. Dos viktoryas una detras de otra para el primer diya de Pesah.
Tres Almanes vyenen para propozar a los djudyos de renderse. Los djudyos responden en matando a uno de los tres, i los dos otros se fuyen, entendyendo ke la repuesta es no.
Esta vez, los Almanes rodean la kaza i meten el fuego. Los djudyos se fuyen por los tuneles de debasho la kaza. El myerkoles 22, aprovan de traversar las lineas almanas i de adjuntarsen kon los kombatantes del ghetto sentral. Kale korrer en medyo del fuego i de los Almanes. Los djudyos pasan.
En el ghetto, los djudyos tyenen menester de munisyones. Dos ermanos visten uniformes almanes, i yevan a sus ermana, gritando ke van a fuzilyarla. Entran ansina en una kaza okupada por los nazis, travan sovre los nazis i se fuyen kon munisyones arrovadas en la konfuzyon. Despues de este marafet, va afitar ke los Almanes se van a travar los unos kontra los otros.
El 27 de avril, unos kuantos militares polakos vyenen ayudar a los djudyos, pasando por un tunel, i yevando kon eyos armas i munisyones. A la salida del tunel, kombaten kontra los tankes Almanes. La mayoriya de los polakos son matados, i tambyen los kapos de la Asosyasyon militar, entre eyos David Apfelbaum.
Los djudyos de la organization kontinuan el kombate diya despues de diya, i vyendo ke no pueden eskapar kon eyos, los Almanes embiyan avyones bombarderos kon bombas de fuego ke metent todo el ghetto en fuego. Para no kaer entre las manos de los Almanes, los djudyos ke se topan prezoneros de las flamas se echan por las ventanas. El SS Stroop nota en su raporto del 24 avril: “yene pudimos konstatar ke, afillu ke el fuego sea un mas grande peligro, los djudyos i los bandidos preferen aboltar al fuego i no kaer en muestras manos.” El mismo Stroop eskrive en su raporto del 27 de avril : “Los djudyos se echan de las ventanas de las kazas en fuego en gritando ensultos i malediksyones kontra l’Almanya, el Führer i los askeres almanes”.
Ama myentres ke los djudyos de arriva se kemavan, los otros de abasho se eskondiyan en los tuneles sekretos i kontinuavan de atakar los Almanes, trokando syempre de eskondijos.
Una sovrebivyente, Cybvia Lubetkin, konta: “Mos kayamos. Tres semanas se an pasado desde el empesijo del solevantamyento. En prinsipyo, la lucha ya se eskapo. Las munisyones se son derretidas, los ombres an sido kaji todos matados. No ay mas de komer. La muerte lenta mos amenasa. Por tanto, estamos kyetos, porke tenemos el sentimyento de aver echo todo lo ke se pudiya azer. No asperamos mas ke la muerte. Kuando i komo va vinir?
“Mos akodramos i mos kontamos – puede ser por la ventena vez – las etapas de la lucha. I por la ultima vez, mos emborrachamos de rekodros de kombate. I avlamos sonyandomos de esta Tyerra leshana ke dinguno de mozotros vera nunka, sus kibutsim, muestros amigos ke biven aya, la vida oroza de aya…” Kale dizir ke esta kombatante a kontado esto en un livro publikado en Ein Harod en 1947, lo ke parese kerer dizir ke, eya, pudo ver su tyerra sonyada.
Muy muy pokos tuvyeron este mazal. El 8 de mayo, los Almanes toparon el eskondijo de los kapos de la Organizasyon, ke se topava al 18 de la kaye Mila. Demandaron a los djudyos de renderse. Dinguno respondyo. Los Almanes echaron bombas de gaz en el eskondijo, ande aviya unos syenes de djudyos, entre eyos Mordehaï Anielewicz. 120 haverim muryeron ahogados por el gaz. Se konose lo ke akontesyo porke uvo sobrebivyentes, komo ya lo vo dizir un poko mas despues. Un sovrebivyente konta :”Arie Wilner (ya vos avli la semana pasada de Arie Wilner: es el ke fue aferrado por la Gestapo i torturado kuando aprovava de merkar armas afuera del ghetto, i ke se fuyo del treno ke lo yevava a Treblinka) Arie Wilner fue el primero a enkomendar el suisido.
“Golpes de fuego se izyeron oir. En vezes la arma se bozdeava i el ke la teniya arrogava a los otros de matarlo. Ama dinguno yegava a dechidarse de matar a un kompanyero. Lutek Rotblat ke se topava aya en kompaniya de su madre i de su prima, mato a la primera en travando kuatro vezes. Berl Braude, firido a la mano i ke no pudiya tener un revolver, arrogava a sus vizinos de eskaparlo.
“Entremyentres, se topo en el abrigo una salida deskonosida de todos. Ama muy pokos fueron los ke reusheron a eskaparse. Los otros muryeron.
“Ansina muryeron unos syen kombatantes i entre eyos Mordehaï Anielewicz, el mijor, el mas savyo, el mas novle, el ke, en los momentos los mas terrivles, guadrava kalmo i sonriza.
“21 personas eskaparon de este infyerno. Kaji todas eran firidas o kaji aogadas.” La ke eskrivyo lo ke vos meldi es la misma Cyvia Lubetkin, la ke kontava ke sonyava de la Tyerra i de los kibutsim, i ke eskrvyo esto todo en Israel.
Avro una parenteza para azer dos observasyones: la primera, es la data: 8 de mayo 1943, djusto djusto dos anyos antes la kapitulasyon de l’Almanya el 8 de mayo 1945. La sigunda, es ke lo ke vengo de kontar aze pensar a Masada de un lado, i aze pensar al kavo del bunker de Hitler i de Goebbels, de otro lado. Hitler i Goebbels, tan kontentes i orguyozos de la fin del Ghetto, eskaparon dos anyos despues, kaji diya por diya, kaji de la misma manera ke los kombatantes del Ghetto, (Goebbels matando a su mujer i a sus sinko kriaturas antes de suisidarse) la diferensya esensyala syendo ke los kombatantes del Ghetto, komo los de Masada, muryeron kon onor para la eternidad, i los nazis del bunker en dezonor para la eternidad.
Despues de la destruisyon de la Organizasyon kon la muerte de sus kapos, los kombates kontinuaron de manera otonoma, por grupos de kombatantes eskondidos i trokando de eskondijo a kada vez.
Lo ke djugo un rolo muy importante en la istorya del Ghetto, antes i durante el solevantamyento, son los lagumes (les égoûts). Los lagumes eran una manera de salir i de entrar a eskondidas en el ghetto. Naturalmente, los Almanes ya lo saviyan i aziyan muy dikat, ama yene, antes del solevantamyento, era munchas vezes por el lagum ke los djudyos saliyan del ghetto para ir a merkar de komer i de armarse.
Desde el primer diya ke empeso el solevantamyento, el jeneral Stroop aprovo de inondar a los lagumes del ghetto, ama los djudyos destruyeron las vanas i no pudo, komo lo konta el mismo en su raporto. Estonses los SS taparon todas las salidas de los lagumes del ghetto, metyeron minas, echaron gazes, i naturalmente era muy yuch para los djudyos de fuirse por los lagumes. Munchos aprovaron, sovre todo kuando eran rodeados por los fuegos, ama se pedryeron en bushkando una salida, aviyan pokas muy leshas, kaliya konoserlas, i munchos muryeron de ser, de kanseryo i de ambre sin topar dinguna salida.
I por tanto, astal kavo los lagumes sirvyeron a unos kuantos a ir i vinir entre el ghetto i afuera, para traer armas i komida, i tambyen, para unos pokos, para fuir del ghetto. Kale dizir ke no era bastante de toparse afuera. Afuera los djudyos pudiyan ser, pishin a la salida del lagum, o un poko mas tadre, topados, aferrados i matados.
Me keda otrun poko de kontarvos, ama ya vino el tyempo de eskapar esta emisyon, dunke la eskaparé el djueves ke vyene, si kyere el Dyo!
Artículos Relacionados: