La televisión

Por:
- - Visto 336 veces

Pasan los anyos i los penserios se me tornan a los anyos de mi chikéz, rekodrando butos i ansina me se vino al meoyo lo akontesido kuando ayegó la televisión a la Argentina.

Era septiembre de 1951 kuando el sinyor Jaime Yankelevich, ombre de radio i relasionado kon el mundo artistiko, trusho de E.E.U.U. todo lo de menester para instalar el primer kanal de televisión djunto a aparatos de televisión, echo importante de akeyos anyos. La Argentina era el segundo país del kontinente en tener esta teknolojia. Este buto tomó ayinda mas importansia el 17 de oktubre de 1951, kuando por orden de Eva Perón, mujer de Juan D. Perón presidente de la Argentina, akontesió el diya en ke se fiestava la suvida de Perón al poder. Eya kijo ke este echo se televisara i ansina akontesió.

En los anyos 1954 se avre la primera fabrika nasional de televisores, COPEAHR Argentina, dando lavoro a djente ke se ambezavan en esta espesialitá. Kaliya kaminar por las kalejas i ver los magazenes yenos de estos para merkar. Akeya djente ke estava interesada, merikiozo entravan i demandavan por la kantitá de parás, del modo komo funksiona, kualo ay de menester i mas.


En el kanton de las kalejas Serrano i Avenida Corrientes avía un magazen kon munchas televisiones. Kuando avía partido de futbol o los diskorsos de Eva i Juan Perón, la djente parada en la kaleja miravan esta maraviya, tiempos en ke avia programas desde las 17:30 asta las 22:30.

Para ver la televisión en las kazas, era menester meter en los techos altos o terasas, una antena alta ke era de fierro kon un modo de palo alto kon fierrizikos atra vesados. Esto era para tener buen sinyal i ansina poder ver este adelanto al ke munchos yamaron maraviya del Dió. Ama si avía vientos fuertes, kaliya menear la antena para tomar mijor el sinyal. Los aparatos de televisión eran grandes, asemejado a un kashón de kolor marrón kon botones, uno para ensender i amatar, el otro para orizontal i vertikal kuando se azían rayas. Para esto kaliya alevantarse i tokar el botón de menester para adovar (arreglar) la difikultá.

Lo kuriozo i asta simpátiko akontesía kuando una famiya merkava un aparato, se kombidava a los vizinos i familyares a tala ora para partajar de ver un program djuntos. La transmisión ampesava a las oras de la tadre asta la noche. Los programas para djente mayor eran en oras de la noche i a la tadre para chikitikos i mansevos.

Esta novedad se metía en la sala de komer, ande estavan la meza i siyas. Mos asentávamos en derredor mientres mirávamos. Kuando avía korte para propagandas, eran minutos en ke no mankava algo de komer i bever ke los musafires (invitados) trayian o la mujer de la kaza teniya aprontado.

Yo morava en una kaza kon munchos apartamentos i mi padre fue uno de los primeros vizinos a merkar un televisor, a lo ke kada diya mi madre kombidava a algún vizino a gozar de esta maraviya. Eya bushkava un buen sitio ande pudieran ver mijor, asemejándose a un sinema en chikitiko.

Ansina me akodro del program Odol Pregunta kondusido por Cacho Fontana durante munchos anyos. Kuantos temas interesantes tokavan! Ansina estavamos asperando el diya para sintir i ver a los partisipantes arespondiendo i mozotros del otro lado ambezándomos de kada uno i uno.

Otro programa era Obras de Terror kon Narciso Ibañez Menta, al ke akompanyavan grandes figuras del teatro. Las novelas de la tadre eran asperadas por las mujeres i kale rekonoser ke estas dieron lavoro a munchos artistos del teatro i del siné, afilú otros se espesializaron en eskrivir los livretos.

Otro kavzo interesante es de Alejandro Romay, nasido Alejandro Saul, ombre argentino sefaradi, al ke se yamava “el tzar”. Lavorava i teniya una estasión de radio i en 1960, merka el kanal 9, sinyalándose kon artistos importantes i fraguando programas diferentes de otros kanales.

En 1979, se djuga el Mundial de Futbol en la Argentina i este se trasmete en televisión de kolor. Otro echo importante es el 1 de mayo de 1980, ke pasan todos los kanales de televisión de kolor. Las djentes de poko a poko fueron merkando el aparato de kolor, a lo ke el 29 de julio de 1981 pudimos gozar el kazamiento del Prinsipe Charles kon Lady Diana. Ay, mis keridos! Todo esto parese un esfuenyo de anyos pasados, a lo ke agora no se kombida a musafires, vizinos ni amigos, a ver esta maraviya de la teknolojia, no ay mas antenas i en kada kamareta ay un televisor.

No es menester de alevantarse porké en la mano siempre pronto está el kontrol remoto. Afilú no devemos asperar las oras de la tadre, el diya entero ay programas, para esto devemos dar parás i abonarmos al kablo ke manda kanales kon programas de chikitikos, muzika, konsiertos, filmos, esportes, sitios de interés i mas… I a dizir la vedrá, el mesmo filmo lo vemos en uno i otro kanal.

Para eskapar, vo a dizirles lo ke kada inyeto, kuando eran chikitikos, no deshó de demandarme kual kanal o program veyía de chika, ama kuando arespondia ke no avia televisión, se echavan a reyir diziendo: “Tu nasites en la era de las kavernas?” No solo esta demanda la izieron kon la televisión, afilú kon la komputadora.

Saludosos i buenos ke estesh, mirando i gozando de la TV, rekodrando este grande adelanto de la teknolojia.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: