No fui del todo sorprendida kuando miri en YouTube el interview en Fransez de FRANCE 2 kon un Padre Jesuite de Alexandria en Egypto.

Vos prezento aki abasho mis proprias impressiones i komentos sovre ‘LA VERDAD KE MENASA EL MUNDO’

Effektivamente, para mozotros ke bivimos en el Oryente Medyo, las avlas del Padre no eran nada de muevo ma por los ke biven en el Oksidente i “saven” lo ke se pasa solo por medio de las gazetas i las varias kadenas de TV, lo mas del tiempo finansadas por los petro-Dolares, i tambien juzgando la situasyon kon sus proprias puntas de vista ke son absolutamente diferentes de la loijika de los fundamentalistos, todo lo ke oyeron les puede vinir egzajerado, i dire mizmo, muy sorprendido…

El Padre Jesuite avla de una konspirasion de grande eskala ke menasa el mundo entero kon toda la vedra saliendo de su boka ! Komo lo dize el mizmo, el sentimiento de kulpabilitad del oksidente, kedado de la epoka kolonialista i el espanto de ser akuzados por trespizar la demokrasiya i los derechos humanos kreados por eyos-mizmos, kon justa razon i por buena fin, les ata los pies i las manos, sin avlar del todo de sus inyorensya de la mentalitad ke egziste i renya en las mientes de los medios fundamentalistos, generalizado oy en diya kuaji en todos los payizes muzulmanos.

Se ven en una impasse, en un kamino sin salida frente a este gran problem, delkual estan konsientes por seguro, ma ke enkuentran por la primera vez en la historia…. Lo ven i lo tratan en forma de una kestion etika, humanista, kijyendo kedar imparsyales i no emleskarsen de sus etikas, sus relijyon, sus maneras de bivir i sus tradisyones, mizmo si konsideran estos violentos, absurdos, mal-vistos i non-tolerados en muestra epoka moderna. Esto es sus kontribusyon a la sivilizasyon, a la buena voluntad, a la toleransya a las kreensyas i al respekto del “otro” . Kon esta manera de ver las kozas, meten de lado la ideya de una stratejiya hipokrita, astusyoza , perfidia de las massas ke se installaron i kontinuan a kreser en sus territoryos…. entre eyos, enfuertesyendosen de diya en diya kon una demografiya enteramente a sus favor en un futuro serkano. Una majoritad ke puedra desidir de la Konstitusyon i de la politika, de la Edukasyon i de las Leyes de los payizes ande se topan.


Oy, ne kreyo ke seya posivle de echar un paso atras…. No ! Ya es demasyado tadre porke el Oksidente no puede salir kontra las desgrasyas ke se estan preparando, kon las mizmas armas suyas ke son totalmente kontraryas a la demokrasiya i a los derechos humanos…. Se tratariya de enganyar, de azer propaganda rasista i anti-sosyala, anti-humana, fraguar kampos de konsentrasyon tranzitoryos, MIZMO SI no se les toma los bienes de la mano, matandolos, pillando, torturando i azyendo todo lo posivle para ke las personas fuygan lo mas presto de los payizes, para yegar a ekspulsyones en masa komo eyos-mizmos lo izyeron no antes muncho tiempo…. Un medyo siglo mas o manko ? Ehhh…. Mozotros no mos puedemos olvidar de la sufriensya de muestros ermanos entre sus manos, sus maldad, mizmo si uvyeron tiempos o kavzos ke entre vizinos dariyan sus vidas el uno por el otro… Nunka el Judyo trahizyono el “otro”…. Nunka fue ingrato o desagradesido al payis ke lo adopto i en elkual prospero i solto raises para verse arronjado, desplumado, rovado i arrankado de su lugar a la fin….. O mizmo kemado o aogado kon gas, en kavzos ekstremos, en loskualos el puevlo judyo se aminguo tanto, peryendo milyones i milyones de gente ke formavan su puevlasyon, su fuersa, su kultura, sus rikezas i su prosperitad…

No kreyo ke seriya diferente en el futuro si, Hasvehalila, se perye todo i el mundo se entrega brasos ariva, kavesas abokadas en frente de la bandiera de la Sheria…

Rogaremos de toda muestra fuersa, muestra emuna en EL, en Su Rahmanut i Su Amor sin kavo, para ke Se apiyade de mozotros i de todos en el mundo, para ke no konoskamos Hora Mala i dezesperasyon… AMEN !!!

sharope.blanco@gmail.com

SIN COMENTARIOS

Deja tu Comentario

A excepción de tu nombre y tu correo electrónico tus datos personales no serán visibles y son opcionales, pero nos ayudan a conocer mejor a nuestro público lector

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.
Artículo anteriorDescanse en paz el Sr. Gregorio Mankita Z"L
Artículo siguienteEl ídish es eterno
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.