No ay duda ke el nombre de Roza Eskenazi aze akodrar a muncha djente una pasado leshano, muzika grega del estilo rembetiko i mas ke todo una kantadera kon una boz maraviyoza.
Esta diva del kante grego nasio en Estambol en una famiya sefaradi, kon el nombre de Sara Skinazi. Siendo ke eya nunka revelo su verdadera data de nasimiento, se pensa ke nasio entre los anyos 1890-1900. Sea komo sea su data de nasimiento kedo un misterio asta el dia de su muerte.
Su padre, Avraam Skinazi tenia una bodega ande guadrava, kontra paga, objetos o kontenidos de kazas komo mobles. Stensiles i mas, de personas ke deshavan el paiz por largos periodos. El nombre de su madre era Vida.
A la edad de 7 anyos Roza, djuntos kon su famiya, paso a bivir a Saloniko. Asta akel tiempo eya avlava solamente el turko ma se embezo a avlar el grego muy rapidamente. Eya no estuvo en eskola, no tuvo una edukasion formala i se ambezo a meldar i eskrivir de una vizina ke tenia kudiado de eya durante el dia, kuando su padre i madre salian a lavorar en las plantasiones de algodon.
Eyos moravan en una kaza en la kuala bivia tambien una mujer ke baylava i lavorava en el teatro “Grand Hotel”. Roza, ke tenia una muy grande atraksion al mundo del teatro, ayudava a esta vizina a yevar i traer su vistimienta al teatro. Su mas grande dezeo era de ser kantadera i eya praktikava djugando i kantando enfrente de un espejo. Ainda de muy chika edad eya se topo en la shena del “Grand Hotel”, baylando i kantando.
Despues ke su madre revelo esta echa de Roza le fue defendido striktamente de kantar i baylar en shena i ir al teatro kon sus amigas. Los parientes de Roza estavan determinados en sus idea de no permeter a sus ija de ser una aktris, lo ke no seria bien visto al seno de su famiya. Ser kantadera en akeya epoka era una verguensa i munchas djovenas ijas avian sido aleshadas de sus famiyas por mala reputasion.
Siendo muy djovena i teniendo espanto de su madre Roza no diskutio kon eya a este sujeto, ma aun kon esto eya estava segura i firme en su idea de alkansar su mas grande dezeo en la vida: ser kantadera.
En esta epoka la famiya de Roza fue a bivir a Atena ande tuvo una vida mas kalma. Es ayi ke eya tuvo el koraje de deskuvrir a su padre i madre su dezeo de ser artista i provo de konvenserlos, diziendoles ke podria ganar buena moneda lo ke ayudaria al estado finansiario de la famiya. No es klaro kuala fue la repuesta de su famiya, ma segun lo konto Roza en su biografia, eya empeso a salir en shena a la edad de 15 anyos. Al prinsipio lavoro kon un grupo de tanyedores ermenis en Pireo. Eya baylava en teatros i tavernas ma de vez en kuando kantava tambien en grego, turko i armeniano resiviendo fuertes aplauzos de la audiensa.
En esta etapa de su kariera eya rompio todas las relasiones kon su famiya i troko su nombre de nasimiento, Sara, al de Roza.
Eya no lavoro en “tekkes”, ande se fumava hashish; en “Cafe Amans”, kafes en los kualos los kantadores improvizavan kantes i despues arekojian moneda de los klientes; o en “Cafe Stanas”, lugares ke no tenian buena fama. Ma verso la fin de su kariera eya kanto en kabares tambien.
Sus primeros enrejistramientos fueron echos en 1929, despues ke el direktor de la kompniya de diskos Odeon, ke era tambien un kompozitor de muzika rembetiko, oyo a Roza kantar en una taverna i dandose kuento de su talento i del entuziazmo del publiko mostrado enverso esta djoven kantadera, desidio de enrejistrarla. Su primer disko tuvo un muy grande sukseso i desde entonses eya kontinuo a enrejistrar sin interrupsion.
Roza empeso a lavorar kon los mijores muzisianos de akeya epoka, en la taverna yamada Taiyetos, ande dieron konsertos durante mas de una dekada, todo en aziendo turnes a paizes komo Serbia, Ejipto, Turkia i Albania. Es interesante notar ke Roza demandava de los klientes de no baylar, no romper platos segun es uzado asta oy en la tavernas, i no komer durante el konserto sino ke solamente eskuchar la muzika i bever.
Eya fue konsiderada komo la kantadera ke resivia la mas alta paga en su epoka. Siendo ke konosia munchas lenguas ke se ambezo a lo largo de su kariera, eya kantava en grego, turko, arabo, italiano, armeniano i ladino, en diversos estilos komo smirneika, rembetika, amanedes i mas. En 1930 eya ya avia enrejistrado mas de 500 kantes, un numero rekor para una kantadera grega de akeya epoka.
Malgrado ke no tenia una formasion muzikala eya kompozo kantes i eskrivio sus tekstos, entre eyos uno de sus mas famozos kantes “To Kanarini”, o “Kanaraki” segun es konosido en el folklor muzikal djudeo-espanyol, ke enrejistro en 1934. En este kavzo la melodia era tomada de un viejo kante turko, “bülbül”, ma el teksto, por el kual nunka resivio kredito, era suyo.
En 1930 Roza se kazo kon Gianko Sarntinidi del kual tuvo un ijo.
Despues de averse ganado una fama mundiala i averse establesido del punto de vista ekonomiko Roza renovo, de una sierta manera, los kontaktos kon su famiya.
Durante la okupasion nazista, Roza ke estava en Atena, ayudo a muncha djente a superar estos anyos de gerra tan difisiles, metiendo mizmo su vida en perikolo. Devemos akodrar ke Roza repzentava todo lo ke los Nazis detestavan: era una artista djudia de grande fama i mujer de negosios.
Roza se enkontro, en 1947, kon el ke fue su kompanyero de vida durante largos anyos, Christos Philipakopoulos, ke era 25 anyos mas mansevo ke eya. Eyos bivieron endjuntos asta la muerte de Roza. Unos 4 anyos antes de su muerte, en 1976, eya fue baptizada kon el nombre de “Rozalia”.
Kon el renasimiento de la muzika rembetika el patrimonio de Roza yego a las muevas jenerasiones i eya, a la edad de kaji 80 anyos, aparesio kantando i baylando sea en konsertos komo en la televizion.
Roza Eskenazi murio el 2 de disiembre 1980. Su tomba kedo anonima durante 28 anyos. Es solo en el anyo 2008 i sovre la inisitiva de “Aeolos”, la Asosiasion Kultural de Stomion, ke su nombre fue gravado sovre su tomba i ke fue pozada ayi su fotografia.
Artículos Relacionados: