La vida i la muerte de Dario Moreno

Por:
- - Visto 1265 veces

Aun ke ya pasaron mas de 50 anyos desde su muerte, el famozo kantador sefaradi Dario Moreno es ainda akodrado en su sivdad natala Izmir. Ayi el fue onorado, mas de 20 anyos atras, dando su nombre a la kaye del famozo Asansor ande avia morado, en el sentro de Karatash – uno de los mas konosidos kuartieres de la komunidad djudia de esta sivdad.

Los diskos de Dario Moreno, o kon su verdadero nombre David Arugete, son vendidos en todos los magazenes de muzika, prinsipalmente de Estambol, i sus kantes mas populares, sea en turko i sea en otras lenguas, son kantados oy en Turkia por la mueva jenerasion de kantadores.
El nasio en 1921, en el kuartier de Mezarlikbaşi, en Izmir. En segito a la muerte trajika de su padre, su madre, madam Roza, ke avia kedado bivda kon kuatro kreaturas, metio a Dario en un orfelinato ande paso los primeros anyos de su vida. Despues de aver terminado sinko anyos de estudio en la eskola djudia el empeso a lavorar aziendo mandados i en fin se empiego en el buro de uno de los avokatos mas famozos de Izmir.

Es ayi ke empeso a ganar paras i a bivir una vida mas komoda. Todo en suviendo de posto en su lavoro, durante las noches el empeso a tomar kursos de fransez en la biblioteka nasionala de la sivdad, i se embezo esta lengua rapidamente. En desparte del djudezmo, del turko i del fransez el avlava otras kuatro lenguas i era konsiderado komo un talentuozo poliglot.


Dario Moreno empeso su kariera muzikala kantando kantes napolitanos en las kalejikas de Izmir, akompayandose kon una gitara ke se avia merkado. El avia echo aranjamientos muy interesantes a los kantes en ladino ke ya konosia, dandoles un aspekto mas exotiko.

En desparte de su lavoro, a la edad de 17-18 anyos el empeso a kantar en fiestas de Bar Mitsva i en bodas i su fama ya se avia espandido en Izmir entero, prinsipalemte al seno de la komunidad djudia. El dio su primer konserto en un kazino ke se topava serka de la eskala de vapores del Konak.

Durante su servisio militar el fue el solista de la orkestra de jazz del Estado Mayor de la Armada i es djustamente en esta epoka ke tuvo la oportunidad de dezvelopar su kariera muzikala. Sus primeras reprezentasiones profesionales tuvieron lugar en el kuadro de su servisio militar.

El kanto despues, komo solista, en los mas famozos lokales de Estambol i Ankara i a partir de ayi el kamino para una kariera internasionala fue kurto.

Dario Moreno yego a Fransia i dio su primer konserto en el Palm Beach Hotel, en Cannes; paso a Paris i kon el kante “Jezabel” se gano una fama mundial. El djugo en 45 filmos, al lado de artistas de los mas famozos de los anyos 60 komo Brigitte Bardot, Eddie Constantine i otros mas. Resivio el premio Cesar por su rolo en el filmo “Oeil pour oeil” (Ojo por ojo) komo el mijor aktor-ayudante, i kumplio el rolo de Sancho Panza en la piesa muzikala “Don Quichote”, al lado del famozo kantador beljikano Jacques Brel.

Entre los otros premios ke el resivio puedemos mensionar el “Grand Prix du Disque”, ke le fue dado en 1958. En 1962 el fue onorado kon el premio “Hitit Güneşi” (El Sol de Hitit) ke le fue otorgado por el Ministerio de Kultura i Turismo de Turkia.

Dario Moreno, el uniko kantador profesional sefaradi asta oy dia, ke se gano una nombradia internasionala grasias a su talento i perseveransia, murio en Estambol, de un atako de korason, el 1 de Disiembre 1968, a la edad de 47 anyos.

En su testamento el avia demandado de ser enterrado en su sivdad natala, Izmir, ke el amava de todo korason. El avia demandado tambien de no dizir en sus funerales “El murio” sino ke “El esta durmiendo.”

Ma su ultimo dezeo no fue kumplido i a la demanda de su madre, madam Roza, el fue enterrado en el simeterio de Holon.

Acerca de Central de Noticias Diario Judío

Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: