La Viola i otras tradisiones atadas al nasimiento

Por:
- - Visto 510 veces

Una de las mas interesantes de entre las seremonias del siklo de la vida, en las komunidades sefaradis de Turkia i de los Balkanes, es atada a los primeros dias despues del nasimiento de un ijo varon i mas exaktamente a la noche antes de la sirkunsizion.

Sovre este tema tenemos agora bastante informasion sea de livros i artikolos i sea tambien de investigasiones echas ultimamente sovre el folklor de estas komunidades.

Un testimonio muy importante mos es dado en el livro “Usos y Custumbres de los Sefardíes de Salonica” de Michael Molho ke es asta oy dia el ke deskrive mijor de kualker otro el folklor de la komunidad djudia de Saloniko, ke por dezgrasia fue kaji kompletamente eksterminada en la Shoa. En este livro el deskrive ansi “La Viola”, segun era yamada en Saloniko la noche ke preseda el Brit Mila:


Al empesar la tadre se azia una chika fiesta a la kuala asistian miembros de la famiya i amigos. En primer lugar, un rabino azia un darush segido por el kadish ke se resitava kon una sierta melodia. Un koro de ninios dirijido por un hazan profesional i akompanyado por una orkestra a la turka (un violon, un ud i un pandero) entonava kantes en ebreo i ladino onde se nombrava repetadamente el profeta Eliyau. Se servian dulses a los invitados ke poko despues se retiravan, deshando en kaza a los intimos de la famiya, ke kontinuavan sus pasatiempo asta una ora avansada de la nochada.

A la noche, la madre de la parida, ke segun el uzo tenia la ovligasion de velar, kantava una kantiga ke su ayre melodiozo ayudava a adulsar el esfuenyo del ninio i de la madre. Damos aki algunas estrofas de este kante:

Kanta, gayo, kanta, ke ya va amaneser.
Si dormish, parida, kon bien vos despertesh.
El gayo keria una kamizika.
Ke bien le keriash a sus karnizikas.
Kanta, gayo, kanta, ke ya va amaneser

El gayo keria i un kushakito,
Ke bien le yakishea en su beliziko.
Kanta, gayo, kanta, etc.

El gayo keria una fezizika,
Ke bien le yakishea en su kavesika.
Kanta, gayo, kanta, etc.

El gayo keria unos eshuekitos
Ke bien le yakishea en sus piezizikos
Kanta, gayo, kanta, etc.

El gayo kere un gerdaniko
Ke bien le yakishea en su garoniko.
Kanta, gayo, kanta, etc.

De la tradision de los djudios de Turkia i Bulgaria tambien tenemos bastante informasion, arekojida en el korso de los ultimos anyos en entrevistas kon informantes diversos, en el kuadro del Proyekto Folklor Djudeo-espanyol de Kol Israel.

Sovresale de esta informasion ke la seremonia de antes de la sirkunsizion del rezin nasido, yamada en esta komonde eyos “noche de shemira”, tenia komo buto prinsipal, protejar al ninio kontra los “danyadores” o “mijores de mozotros” ke bushkavan a atakar al bebe djusto antes de la sirkunsizion, siendo ke despues de esto yael podia konfiar en la proteksion del Todo Poderozo, kon el kual avia kontraido una aliansa, kon la sirkonsizion.

Para evitar ke la madre i el rezin nasido sean ekspozados a la malisia de los danyadores, no kalia desharlos solos ni un solo momento en esta noche i es por esto ke se azia una manera de fiesta ke se kontinuava noche entera, kon kantes, kuentos, lektura de pasajes relijiozos i mas. Se uzava kantar mas partikularmente kantes atados kon esta okazion komo “Kuando el rey Nimrod…” ke konta sovre el nasimiento de Avraam Avinu, “Mueve mezes d’estrechura…”, sovre la alegria de la parida i de su famiya despues de los mueve mezes del prenyado ,i otros kantes mas.

Avia tambien uzos i kostumbres bazados a vezes sovre superstisiones ke datavan de siglos atras, komo por enshemplo el de meter debasho del kolchon en la kamika del bebe un livro de teilim o un kuchiyo, ke devrian protejar al rezin nasido kontra los mijores de mozotros.

En desparte de todo esto, la Viola o la Noche de Shemira eran tambien una buena okazion de kantar, alegrarse i enreziar ainda mas las relasiones familiales, para las kualas era de gran importansia el nasimiento de un ijo varon

Acerca de Central de Noticias Diario Judío

Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: