Diario Judío México - Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Por empesar, vos akodro ke el proksimo atelye de konversasyon de Vidas Largas se tendra el martes de mayis, a las dos i medya, en el Centre Communautaire. Estos atelyes son avyertos a todos, venid munchos.

Vos akodro tambyen ke agora las emisyones de Radio J se pueden oir por internet sovre el sityo de Radio J, de toda manera en direkto, i en vezes despues…depende del tekniko.

http://www.radioj.fr

La semana pasada, no pude, por manko de tyempo, eskapar mi sigunda emisyon sovre la rebuelta del ghetto de Varsovia, meldada por mi amigo Renaud Souhami, en vez de mi, abashamyentado i ronko.

Tuve de kedarme kuando vos estava kontando, kon la boz de Renaud, el rolo ke tuvyeron los lagumes (égoûts) en la istorya del ghetto de Varsovia.

Vos estava dizyendo ke malgrado ke los Almanes taparon todas las salidas de los lagumes del ghetto, metyeron minas, echaron gazes, astal kavo los lagumes yene sirvyeron a unos kuantos a ir i vinir entre el ghetto i afuera, para traer armas i komida, i tambyen, para unos pokos, para fuir del ghetto. Kale dizir ke no era bastante de toparse afuera. Afuera los djudyos pudiyan ser, pishin a la salida del lagum, o un poko mas tadre, topados, aferrados i matados.

Marek Edelman, el solo kapo djudyo ke sovrebivyo del Ghetto, i kedo bundisto i en Polonya asta su muerte en 2009, mos konta su salida por los lagumes:

“La noche entera, kaminamos en los lagumes. Kaemos sovre munchos blokamyentos metidos por los Almanes. Las salidas son enterradas de pyedras. En los kaminos, los Almanes metyeron granadas ke pueden explozar a kada djesto sin azer dikat. De vez en kuando, los Almanes echan gazes de entosigar. I por tanto, es en estas kondisyones , en un kamino ke no aze mas de 70 cm, ande kale kedarse syempre enkorvado en dos, ande la agua yega a la boka, ke asperamos 48 oras el momento de salir a la luz del diya. A kada momento, kombatantes se ezmayan. Es la ser ke mos aze las sufrisyones las mas terrivles. Unos kuantos beven la agua embatakada del lagum. Los sigundos mos paresen mezes.”

Al kavo, una parte solo de estos seran salvados por los de afuera ke los toman en un kamyon i los yevan en las sharras de rezistansya afuera de Varsovia. Los 15 kombatantes ke no pudyeron salir en tyempo para tomar el kamyon yene salyeron, ama los Almanes los asperavan i fueron todos matados.

Jurgen Stroop kontinuo a kemar i matar astal 16 de mayis, i eskapa su raporto eskrivyendo: “180 djudyos, bandidos i subombres (sous-hommes, untermenschen) an sido exterminados. La anteryora male djudiya de Varsovia no egziste mas. Las grandes operasyones an eskapado.”

Jurgen Stroop, por esto, va ser dekorado de la Cruz de Fyerro de prima klase, la mas alta dekorasyon militar. Ama sera despues kondenado a muerte en 1947 por los Amerikanos por aver, entre otras atrosidades, fuziliado a prezoneros de gerra amerikanos, i despues entregado a los Polakos, ke tambyen lo kondenaron a muerte en 1950, i lo enforkaron.

Komo Jurgen Stroop disho ke la rebuelta se eskapo el 16 de mayis, ay munchos ke lo kreen i lo meldo en munchos livros komo si era vedra. Ama es haliz mintira. Todos los testigos kontan los kombates ke se kontinuaron en el ghetto despues del 16 de mayis 1943. Es vedra ke parese inkredivle. Komo biviyan? Komo komiyan? Komo teniyan munisyones?

El 5 de junyo, Janek Pika, el ultimo kapo de la Asosyasyon militar, esta matado en un kombate kontra los Almanes.

El 7 de djulyo, un kombatante konta: “No keda mas, de muestro grupo de kombate, ke una tropa minavle, paralizada por el manko de munisyones. A poko a poko, muestra enerjiya i muestro buen moral (estaj oyendo: el 7 de julyo, kaji tres mezes despues del empesijo del solevantamyento, i serka de dos mezes del 16 de mayis, data ofisyala de la fin de la rebuelta, uno mos avla de su buen moral) se stan indo, porke muestros amigos de fyerro, kompanyeros de lucha i de mizerya, estan muryendo el uno despues del otro.”

Este mismo konta komo mato a un Ukranyano el 17 de julyo, ke veniya para aferrarlo.

Es solo el 26 de septyembre ke su grupo va pueder pasar afuera del ghetto, i kontinuar la lucha en la rezistansya.

Ama kon esto no se eskaparon los kombates en el ghetto. Al empesijo de junyo 1944, mas de un anyo despues el empesijo del solevantamyento, 15 djudyos an oposado una rezistansya armada a los Almanes!

Uno de los ultimos kombatantes, el berber David Bialogrod, sovrebivyo en el Ghetto asta el primo agosto 1944, data del solevantamyento jeneral de Varsovia.

El solevantamyento del Ghetto fue el primer solevantamyento urbano de toda la Evropa okupada. Lo digo de muevo, es asigun mi la oja la mas gloryoza i la mas trajika de la tan larga istorya de muestro puevlo.

Ansina me kedo sovre esta istorya, i ayego a mi emisyon de oy.

El alhad ke vyene, 14 de mayis, vamos a fyestar , i vos kyero dizir unas kuantas kozas sovre esta fyesta.

En primero, ke kyere dizir ?

Empesaremos por Lag. Ya savesh ke kada letra ebrea tyene una valor numerika. Lag es lamed ke vale trenta, i gimel ke vale tres, dunke Lag kyere dizir 33. El trenta i treser diya del omer. Baomer kyere dizir en el Omer, ke es el tyempo entre Pesah i Shavuot, entre la salida de Ayfto i la resivida de la ley sovre el monte Sinaï.

Esta peryoda del Omer, ke se yama sefira, komputasyon, porke kada diya es kontado, es peryoda de medyo luto, a la eksepsyon del trenta i treser diya, lag ba omer, ke es diya de fyesta.

En tyempo de sefira, no se puede ni kazarse, ni oir muzika, ni kortarse los kaveyos, todo lo ke se puede azer en diya de .

Ama deke esto todo? Deke medyo luto kuando la esperansa del dono de la Tora devriya ser tyempo de alegriya? I deke fyestar el trenta treser diya de este medyo luto?

Para topar repuesta a estas kestyones, me fui a bushkar sovre internet, i topi unos komentaryos sovre lamed.fr por el haham Pinhas Stolper.

No kyero pareser mas haham ke so. Lo ke vos vo dizir agora es travado de lo ke meldi del haham Stolper.

El Talmud Bavli mos konta ke del tyempo de Rabi Akiva, kijo dizir del tyempo de la sigunda rebuelta de los djudyos kontra los Romanos en 132, del tyempo del emperador Adriano, 24.000 elevos de Ribi Akiva, o por ser mas presizo, 12.000 pares de elevos, kada elevo tenyendo un kompanyero de estudyo, se muryeron durante la Sefira de una hazinura misteryoza embiyada por el Dyo, porke, mos dize el Talmud, no se davan kavod el uno por el otro. I esta hazinura s’eskapo el trenta i treser diya de la sefira, en . Por esto fyestamos .

Ama, afillu lo me mos dize el Talmud, munchas kestyones kedan sin repuesta:

En primero, mismo si la muerte de 24.000 elevos djudyos es koza triste, deke azer un luto de 32 diyas kuando otras trajediyas muncho mas grandes komo la destruisyon del Bet Amikdash i la muerte de tantos miles de djudyos a esta okazyon meresen un solo diya de luto?

Es siguro ke 24.000 es muncho, ama es una lagrima en la mar komparado a la Inkizisyon, las kruzadas o la schoa. Deke tanto luto para estos 24.000?

De otra parte, ke izyeron de tan negro estos 24.000 elevos para mereser de morir? I si lo meresiyan, deke yorarlos?

Yene de otra parte, deke es diya de fyesta? Si solo fue un deskanso despues de tantas muertes, no valiya mijor azer de este diya el luto para los 24.000?

I kualo ay ke ata lag baomer kon la istorya de Bar Kohba, kapo de los rebeldes kontra los Romanos? I kon la istorya de Rabi Shimon Bar Yohaï, el ke sigun muestra tradisyon eskrivyo el Zohar, el livro de la Kabala?

I deke no se avla klaramente de esto todo? Deke este misteryo de Lag Baomer?

Kale saver ke los hahamim de esta epoka no pudiyan eskrivir komo keriyan por modo de los Romanos ke okupavan el pais.

Lo ke ya savemos es ke en el anyo 70, del tyempo del emperador Vespazyano, su ijo Titus destruyo el Bet Amikdash, mato a miles i miles de djudyos, i se pensaron los Romanos ke aviyan eskapado kon los djudyos de Judea.

Ama ya savesh ke no se eskapa katikolay kon los djudyos. No achetaron de dezapareser de sus pais la Judea, i unos sesenta anyos mas dospues , en 132, un kapo militar djudyo yamado Bar Kosiba se alevanto i organizo una armada djudya para luchar de muevo kontra los enemigos romanos. Miles de djudyos se metyeron detras de el, i kon eyos el mas grande haham de este tyempo, ke se yamava Rabi Akiva.

Todos los hahamim no eran de akodro kon una mueva rebuelta, ama Rabi Akiva los konvinsyo ke teniya el razon.

Pensava ke ya se pudeiya reushir, i en primero militarmente. Sigun syertos istoryanos, los djudyos reprezentavan en esta epoka 20% de la poblasyon del Emperyo Romano. Sovre todo Rabi Akiva pensava ke la reushita de la rebuelta permiteriya el ritorno de todos los djudyos en tyerra de Israel, la rekonstruksyon del Bet Amikdash i la venida del tyempo del Mashiah.

Bar Kosiba i su armada se sentiyan prontos. Rabi Akiva troko el nombre de Bar Kosiba en Bar Kohba, ijo de la estreya en arameo, para kumplir la profesiya “una estreya salira de Yacov”, i izo una proklamasyon dizyendo ke este Bar Kohba era el Mashiah tan asperado de tanto tyempo.

Konvensido de esto, Rabi Akiva metyo sus 24.000 elevos al servisyo de la rebuelta.

Todos los djudyos eran unidos detras de Bar Kohba, lo ke aziya una situasyon muy diferente de la primera rebuelta, ande los djudyos se peleavan entre eyos, mismo kuando los Romanos eran enserrando a Yerushalaïm. Esta sigunda rebuelta, ke eya fue unida, sureo sej anyos. Al empesijo, la armada de Bar Kohba tuvo munchas viktoryas. Munchos goïm, enemigos de Roma, se adjuntaron a la armada djudiya . Se dize mismo ke tuvo 350.000 askeres, mas ke los Romanos. La reushita de Bar Kohba fue si grande ke Hadriano tuvo ke bushkar sus mijores armadas de Ingletyerra i de Galya.

Se dize ke es en Lag baomer ke los djudyos tomaron Yerushalaïm. La independansya djudiya fue restablesida durante kuatro anyos. Dainda egzisten las monedas djudiyas de esta epoka independente. Son monedas kon figuras simbolikas djudiyas, komo menora por egzemplo, i inskripsyones en eskritura paleo-ebraïka, kijo dizir no la eskritura ke konosemos, ke se yama el ebreo kuadrado, i ke ya era la eskritura uzada en esta epoka, ama la eskritura de los tyempos del primer Templo, ke se yama en lashon ketav kenanit, i ke se asemeja a la eskritura fenisyana.

I en esta eskritura antika, ay eskrito sovre las monedas djudiyas de Bar Kohba inskripsyones komo: “Shana aleph ligeulat Israel”, o “Shana beth liherut tsion” (anyo uno de la delivransa de Israel, o anyo dos de la independensya de Sion).

Kuando empeso la rebuelta, aviya dos lejyones romanas en el païs, una en Yerushalaïm, otra serka de Megido. Fueron destruidas por las armadas djudiyas. Los Romanos embiyaron otras armadas de los païzes alderedor, ke fueron tambyen destruidas. La lejion 22, venida de Ayfton, dezaparesyo kompletamente. Los djudyos, ke kombatiyan ande eyos i konosiyan sus tyerra, aziyan gerriya de noche.

Vyendo esto, Hadriano embiyo su mijor komandante , Julius Severus, ke estava kombatyendo en Ingletyerra. Severus tomo kon el lejyones de Bretanya, de Suisa, de Ostria, de Ungariya i de Bulgariya. I empeso una gerra sin piyadad.

Ama fue el momento ande Rabi Akiva se kedo de sostener a Bar Kohba. Ke se aviya pasado? Bar Kohba aviya matado Rabi Elazar, akuzado de aver dado informasyones militares sekretas a los Romanos. Parese agora ke era falsa akuzasyon. En todo kavzo, Rabi Akiva penso ke Bar Kohba no teniya mas las kualidades para ser el Mashiah, komo lo aviya pensado en primero.

Fue en este momento ke empeso esta hazinura yamada askera, embiyada por el syelo porke los elevos no teniyan, dize el Talmud, bastante kavod el uno por el otro. Se metyeron a morir el uno despues del otro, i kon eyos tambyen la esperansa mesyanika, por miles de anyos.

En los kombates para defender la sivdad fortifikada de Betar, Bar Kohba i su armada fueron destruidos kompletamente. Rabi Akiva fue aferrado i torturado a muerte, dizyendo el shema.

Sigun el istoryano Romano Dion Cassius, 580.000 djudyos fueron matados en la batalya de Betar. Despues empesaron las matansinas en toda la Djudea. Los djudyos ke no fueron matados fueron tomados komo syervos, Esta desgrasya fue la fin de toda esperansa de independensya i el empesijo del galut.

Esto es la razon del luto de la Sefira. No es solo por la muerte de 24.000 elevos de Rabi Akiva; es por la pedrita de muestro païs i por todas las desgrasyas ke sigyeron esta pedrita para los djudyos durante tantos siglos.

Ama en esta mizma noche de Lag Baomer, Rabi Shimon Bar Yohaï empeso a ambezar a sus elevos los sekretos del Zohar, de la Kabala. La esperansa nunka se muryo. En Lag baomer, empeso de muevo.

Esto es lo ke meldi del haham Pinhas Stolper. No tengo savidura relijyoza para pueder dar una opinyon sovre todo lo ke disho.

De toda manera, mismo el haham Stolper no tyene la repuesta a todas las kestyones. Por egzemplo, el mismo no save deke los 24.000 elevos de Rabi Akiva pagaron de sus vidas la kulpa de no tener kavod el uno por el otro. Naturalmente, esto mos ambeza ke kada uno deve tener konsiderasyon i kavod, no solo para padre i madre, no solo para kapo o maestro, ama tambyen para el ke es su igual. Ama una koza es la kulpa, otra koza es la punisyon. Mismo si es djusto ke sean punidos estos elevos por esta kulpa, deke una punisyon tan terrivle? A esto el haham Stolper no tyene repuesta sino puede ser este verso de Corneille: “Plus cher est l’offenseur et plus grande est l’offense”. Vinyendo de ombres de esta kualidad, la kulpa era mas grande ke para fulano.

Ansina vo eskapar esta emisyon sovre Lag baomer.

Al djueves ke vyene, si kyere el Dyo!