En segito al Edikto de la Ekspulsion proklamado por el rey Fernando i la reyna Isabela en Marso 31, 1492, los djudios de Espanya ke no se avian konvertido se refujiaron en paizes diferentes. Munchos de estos eran konvensidos ke el payis vizino, Portugal, puederia ser sus muevo ogar – portanto, sin ke dinguno de estos avia previsto la amarga suerte ke los asperava.
El Rey João II (1481-95), interesado a enrikeser su trezoro, los avia akseptado, en ovligandolos de pagar una taksa, i kon la kondision de kedar en Portugal fina 8 mezes. Famiyas rikas pagaron 100 kruzados, kuando la grande mayoriya pago 8 kruzados por persona. Los artizanos fueron akseptados en el buto de uzarlos en la produksyon de armas.
Kon sus arivo a Portugal, los exilados fueron el objekto de presiones del governo i del puevlo. Siertos los akuzaron de aver traido la plaga, kuando otros, de blasfemar las ensenyensias de la Iglezia.
Kuando en la primavera de 1493, el termino de 8 mezes se avia eskapado, el rey João II kudyo ke ayga solo un chiko numero de naves para transferarlos. En konsekuensia, solo unos pokos djudios reusheron a salir del paiz. Los otros fueron akuzado de aver violado el permiso de kedar en el payis, i fueron deklarados esklavos a menos ke aksepten el baptizmo. Es en este konteksto, ke iva akonteser una de las mas orivles trajedias del Djudaizmo Sefaradi.
En el mizmo anyo, unos 2000 ijikos i ijikas, en la edad de 2 asta 10 anyos, fueron arankados de sus famiyas i despues de ser baptizados, mandados komo esklavos a la izlas afrikanas, São Tomé i Príncipe.
Konosidas akel tiempo komo las izlas de los lagartos, São Tomé kon Príncipe, ke son situadas en el Golfo de Guinea, azian parte de las kolonias de Portugal. Los logartos eran en realidad krokodiles i kulevras venenozas. El klimato era insalubre, todo en permetiendo espesialmente el kultivo de la kanya de asukar.
Durante su ekspansion teritorial, el problem de Portugal fue la karensia de sus abitantes en la metropol i en konsekuensa, la difikultad de topar un numero satisfaziente de emigrantes para povlar sus kolonias. De mas, São Tomé era leshos de ser atraktiva. A la izla eran transferados prizionieros i esklavos de orijen afrikana.
El destino de estos ijikos resivio una konsiderable atension en las kronikas. Kuaji todas las narrasiones reportando la eksperiensa de los djudios de Espanya ekspatriados a Portugal se referan a estas kreaturas arevatadas de sus parientes i deportadas komo esklavos a la izla dezierta de São Tomé, para ser kriados komo kristianos i ke siervan komo kolones.
De otra parte, no existe dingun dokumento djustifikando o aklarando el motivo del Rey de Portugal de implementar un akto tan kruel i sin presedente.
Munchos manaderos djudios deskriven el apreto de los djenitores ke pedrieron sus kreaturas. Un epizodio reportado por Ibn Verga, ke el mizmo avia yegado a Portugal en 1492 kon su famiya, es partikularmente esmoviente:
Uvo una mujer ke le avian tomado sesh ijos. Kuando oyo ke el Rey estava para salir de la iglezia ande avia asistido a la misa, esta desfortunada empeso a implorar su mizerikordia en arondjandose a los piezes de su kavayo, i rogandole ke le vuelva el mas mansevo de sus ijos. Ma el Rey no kijo eskucharla. Ordeno a sus servidores de alesharla de su vista.
La mujer kontinuo a defender su kavzo kon gritos mas fuertes i los servidores la maltrataron. Entonses, el Rey se eksklamo: “Deshaldola, es komo una puta ke le tomaron sus krios!”
Es de mizmo reportado ke kuando sus parientes konstataron ke la deportasion de los ijikos era inevitable, les demandaron de observar las Leyes de Moshe; i ke avian mizmo kazado entre eyos a unos kuantos de estos.
Munchos de los ninyos, murieron de ambre, de dezespero i de tristeza, o devorados por los krokodiles o modridos por las kulevras. Valentim Fernandes, un estampador alman ke se avia establisido en Portugal en 1495, publiko en 1510, una deskripsion de las Izlas São Tomé i Pricipe, en bazandose al testimonio de los marineros ke las avian vijitado. Fernandes reporta ke de los 2000 ninyos ke arivaron a la izla, solo 600 avian sovrebivido fina la edad adulta.
A los ninyos fueron impozados muevos nombres, inyegando sus pasado; uvo tambien posibles uniones insestuozas. Kuando kresieron, los jovenes se kazaron entre eyos o kon djovenes de otros grupos etnikos, espesialmente afrikanos.
Al pareser las rogativas de los padres konsernando la observasion de la Ley Djudia por sus kreaturas, no fue en vano. Informasiones yegaron a la Ofisina de La Inkizision en Lisbon ke en São Tomé i Príncipe se produizeron insidentes de la observasion avierta del Djudaizmo. La Iglezia Katolika se ensanyo muncho. Pedro da Cunha Lobo, el ovispo katoliko romano nominado a São Tomé i Príncipe, se obsesiono kon esta kestion.
Asigun un manadero, el dia de Simhat Tora 1621, da Cunha se desperto por el bruido de una prosesion, salio korriendo para konfrontarla i fue tan molestado por los manifestantes ke kon asko renonsio a su posto i tomo la proksima nave para aboltarse a Portugal.
* * *
São Tomé i Príncipe se konvertieron en uno de los mas importantes produktores de asukar del mundo. Las izlas obtuvieron sus independensia de Portugal el 12 de Djulio, 1975. Kuaji 500 anyos despues de la deportasion, se izieron ekskavasiones allado de la Katedrala, en el sentro de la sivdad, para anchear el muevo palasio prezidensial. En el lugar enkontraron tombas i una espada. Se kreye ke la espada avia apartenido al Kapitan Álvaro de Caminha, ke fue kargado de transferar i aresentar a los ninyos en las izlas; i ke las otras tombas son de ninyos djudios deportados.
Kon la yegada de unos kuantos komersantes djudios de kakao i de asukar en los siglos XIX i XX, una mueva komunidad fue fundada. Oy en dia no ay djudios konosidos komo pratikantes, ke biven en estas izlas. Todo kon esto, existe una partida de la povlasion ke se distinge kon la klaridad de sus kolor.
Es muy probable ke la sangre de los ninyos esklavos korre oy por las venas de algunos de los moradores de la aktuala Republika Independiente de São Tomé i Príncipe.
En 1993, Moshe Liba, el primer Embasador de Israel en la Republika fue kalorozamente resivido en São Tomé. Liba observo ke, kon sus kolor mas klara, kon la fiertad konsernando sus pasado i sus dezeo de kontaktar djudios de otros paizes, los desendientes de las kreaturas deportadas formavan una parte distinktiva de la povlasion. Aun ke eran meskladas kon komponentes kreolas sosiales i kulturalas, siertas kustumbres djudias se avian mantenido.
Ansi se eksprime el Embasador Liba, en su livro tan emosionante komo fasinante:
Kuando prezenti las letras kredensialas, me disho el Presidente Miguel Trovoada: “Tenemos raizes komunes, desendientes de djudios biven en muestras izlas. Usted enkontrara aki nombres djudios komo Azancot, Levy, Samuel.”
Despues de la prezentasion i la konversasion protokolar kon el Prezidente, tuvo lugar la prosesion militara en onor del primer Embasador de Israel…
Aze 500 anyos, trayeron akí a mis antepasados komo esklavos, oy entonan la “Hatikvah,” la Esperanza, muestro imno nasional, en onor de Israel, el paíz del Puevlo Djudío.[*]
*
En el 12 de Djulio, 1995, kon el eskopo de komemorar las kreaturas esklavas ke fueron arankadas de sus djenitores en el siglo XV, se organizo, en el konteksto de la selebrasion de la Independensia XX de las Izlas, una konferensia internasionala. Reprezentantes de Israel, de los Estados Unidos, Fransia, Holanda, Portugal i Espanya asistieron a esta aktividad.
—————————————————
[*] Moshe Liba (Author, Editor), Jewish Child Slaves in Sao Tome.
Artículos Relacionados: