BOOGAYMAN !
SELAMICESME 1954 – 1959
Ayyyyyyyyyyyyyyyy si Srulik !
“Kayikchi Balata…. Pishkadikos de la mar… Hop hop a la mar !”
Ke rizas eran kuando de boka a basho mos “echavan” a la mar alora ke estavamos asentados en las piernas de los nonos, komo si asuviyamos al kavayo….
Aviya otro un djugo kon bokalitos de tavla i teniyamos de echarlos en basho kon una pelota de tavla tambien. Dospues komo todos los djugettes i esto se izo de plastik – El Jeu de Quilles ! Muncho mas tadre vide ke son los “grandes” ke djugan este djugo ke yamaron el “Bowling” kon pelotas pezzzzzzgadas i ke kale embiyar leshos lehos.
A mi me plaziya djugar a las “eskondidas”. Ande ? En Selamicesme, en enverano en muestras guertas tan grandes ke no se puediya ver ande terminavan ! Era aki serka ande moro agora ma de dinguna manera asemeja a lo ke era en los anyos 1950 + . Por empesar aviya poka gente ke moravan en los deredores i era el kartye de los koloneles de la armada Turka, bastante aedados i famiyas muy tradisyonales. Los otros eran rikos fabrikatores ke serravan sus puertas kon yaves i las kortinas en las ventanas ke no deshavan ver ni la luz ! Lo mas vinidos de la provinsya, kon munchas tierras, duenyos de industria del azeyte de oliva, pasta de tomata, grandes fermas o negosyos de vistimienta etc… No se frekuentavan los unos kon los otros fina ke mozotros, la unika famiya djudiya, vinimos tambien a morar entre eyos… Fina ke mi muy kerida mamita tomo las kuedras en la mano, invito personas, se fue ande eyos, los izo amigos entre eyos, empesaron a djugar kartikas, ir a los banyos de mar endjuntos, guizar para el invierno endjuntos, adoptar perros i gatos del vizindado, flortar kon los ijikos i las ijikas del kartye, ezpozarsen, kazarsen, fiestas, dolios. La vida…….. Adoraron mi mamita !
Yo gani munchos amigos… Ermanos, primos, konosidos se adjuntaron i estavamos el dia entero djugando endjuntos, komyendo frutas de los arvoles, nadando i koryendo de todas las vandas fina ke empeso las “eskondidas”. Yo, muerta de espanto las noches, apanyava el mas fuerte i el mas grande i aziyamos un equipo. Yo tresalida de darle mi mano i ser sigura ke ivamos a ganar ! Edad ? 10-13!!! Bueno esto se djugava de noche solo kuando todas las “baboulas” saliyan a bushkar los ijikos ke no durmiyan i ke no eran “kedos ” durante el diya ! El nombre solo de baboula bastava para ke empesemos a tremblar i fuyir allado de los “grandes” ! Oy pensando a esto, no puedo entender fina ke punto eramos naivos… Era otro tiempo, otra mentalitad, otra manera de bivir… Eramos sanos, dia entero en las kayes en enverano i komyendo alimentos verdaderos i no engrandesidos kon hormones i susyedad !
Azer kunas para las kuklas i kazas enteras kon todo bueno aryento era otra “fantaziya” del enverano ! Todos teniyamos muestra “kaza” i mos ivamos a vijitar las otras “kazas” de mas en mas konfortables ! Por todo el enverano ! Un djugo de 3 mezes !
Me plaziya ser la prensesa indiyana kuando los ijikos djugavan a los kowboys kon los indianos tambien ! Aviya la ijika “blanka” (Verda mi amiga) ma los kovboyes se namoravan de mi i keriyan salvar me a mi ! I es yo ke teniya de eskojer si keriya el indiano o el kovboy ! Antes de empesar me demandavan “Oy a ken vas a kerer ?” Ayyyyyyyyy ke me muero ! No lo diziya ma sempre saviya a ken ! Edad : 8 – 12….Lugar Selamicesme/Kadikoy
Dospues de mis 14 anyos estavamos en Buyukada. Era el klub “Golf” ke me atirava ! Komo se puede olvidar la chikes i la manseves….No se puede !
[email protected]
Kon ganas de djugar al bodre de mar !
Artículos Relacionados: