La nostaljiya de la savor – Las masas inchidas de historia….

Diario Judío México - Grasyas Esterika por tus komplimentos sovre lo ke sale de mi pluma ! Me plazen i a mi muncho i me veygo riyendo kuando los meldo dospues ke se publikan komo si fuera otra persona ke los eskrivyo ! Ansina de tontedad no se tiene visto ! Empeso a meldar kon interes komo si no savyera de kualo se trata ! Madre mia bendicha ! Esto peryendo la kavesa parese !

No kreyo ke egziste kaza judiya sin aparejar burekas – bulemas – boyos para Shabat i mizmo entre semana para savorarlos las demanyanadas o dospues de midi kon un te, ademas si ay vizinos o amigos, o mas, de tadre kuando viene el marido kansado de su lavoro i le dezeya la alma una bira yelada o un vazo de raki kon “una kozika” al lado….

Ayyyy ke difisil povretika, de ser vejetaryanao ! De ande te vino este mal ? Ya esta bastante komplikado de bivir ansina sin ke tengamos menester de komplikarla mas…. Yo digo ansina ! No meter nombres ! Una ves ke dizes ke sos vejetaryana, mismo a tu mizma, es difisil de salir de aryento. Va dize ke no tiyenes ganas en akel diya de komer karne o produktos animales…. Deshate una puerta avyerta, sin serrar todas ! No komas ma no metas nombres ! Puedeser te va travar la alma un gueyviziko haminado… No se yo ! No te kero meterte savores en la boka…. Difisil tu vida…

Mis bulemas son kura i una puerta ke se avre al Ganeden para los vejetaryanos ! Avlo del Ganeden en este mundo i no en la Eternitad por seguro ! Aya, no se komo vamos a topar el remedyo de artarmos! Estas bulemas son verdadero arte Monastirli i se preparavan kon kantos i muncha alegriya de la parte de las mujeres ke guizavan las salatas de berendjena, los pimientones asados kon olyo de oliva, azeytunas i ajo i gueyvos haminados, kuartos de domat mundada en kuartikos, dulse de rozas, de bimbriyos de igos tambien kon manteka freska. Los judios de Afrika del Norte no komen azeytunas en Shabat ma mozotros si… Una botelya de raki para los ombres de una parte i las kreaturas kon las mujeres de otra parte. Era meza de allegriya ke arekojiya toda la famiya, chikos i aedados, buenos vistidos. Era defendido de yorar, de inyervarse o avlar de kozas tristes… Mizmo en los Shabates de dolyo (Komo se save no se tiyene dolyo en Shabat) Todo esto para “ke no se fuyga Shabat” !!! Yo demandava ” Ande ken se fuye ? ” i diziya “lo ataremos a muestra puerta para ke no fuyga ! ”

LAS BULEMAS DE MONASTIR….. Si, siiiiiiiiii, agora !

Las bulemas ! Si si ! Agora te vo dizir komo se azen ! Por empesar ke estas bulemas son muy kansadas i tiyenen de arepozarsen i durmir kada poko ! A mi me trayen inyervos de verlas tan kansadas i les digo : “Ayde…. A durmir agora i no vos espertesh nunka ! ”

Se avre la arina kon 2 mizuras de agua, 1 de azeyte o i medya mizura de agro (yo meto vino blanko). La masa deve ser de la blandor de los mushos ! (Es en este momento ke se le embiya un bezo i se le dize a la masa ” ke el mazal te valga ” )

Lavorar esta masa i meterlo a arepozar kon una tovaja limpya en el frijider-nevera ?… Dospues de 2 oras avrirla i espandir muy poka de margarina kon una furcha (brush). Otra vez a durmir…Ansina 3-4 vezes. Mi mamita la avriya 12 vezes !

Por siguro no te olvidez de sarpikar arina ensima de la laja antes de avrirla ! Se apega i empesas a demandarte porke vinites al mundo ! Dunke para unas bulemas buenas echas la arina deve bolar en el aver i en el palo kon elkual avres la masa ! Es defendido de aharvar la masa kon este palo. Tus djestos deven ser dulses, la kara kon una soriza i hasvehalila no darle entender ke la keras furladarla (to throw) por la ventana ! Por sedaka ! Se inyerva i se seka ! Kuando esta masa durmyo unas kuantas vezes i la pintates kon la margarina kada ves ke la avrites esta pronta para inchirla.

Lo de aryento puede ser spinaka kon kezo i gueyvo (lo mas popular!), patatas kochas kon kezo i gueyvo, muezes asukar kanela i manteka, berendjena tartikada kon keyo i gueyvo, kezos rayados kon prishil i gueyvo, almendras majadas uvas sekas i pinyones (esto yo nunka lo ize!) :

o no se yo komo sin gueyvo o kezo !!! kale demandar esto al guru !

A la largor, muy fino kon una anchura de unos 10 santimetros se
avre la masa, se inche de esto savrozo aryento i se forman komo
sigaros godros de Havana ! Se aboltan komo para formar una roza i
se meten al tepsi ande vana kozer en el orno fina ke se azen
un poko ruvyos. Ensima los pintas kon el amariyo del gueyvo i
le puedes sarpikar lo ke te plaze….Yo meto pimyenta korolada !

Kuando estan prontizikos antes ke se yelen muncho los komes
….Ayyyy atensyon los dedikos !

Bon appetit a toutes et a tous !

Sharope blanco
inyetizika de Monastirlis !

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorSeñales Financieras: Hablemos del Brexit, Argentina y Guanajuato
Artículo siguienteTalibanes lanzan advertencia a EU tras ruptura
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.