Las dos karas del espejo

Apenas avia salido del avion i sus pies tokaron la terra de Israel, ke la jovena se demando si eya estava en el kamino justo en su mueva vida. Se kazó i eya pensava ser feliz i ke no puedia ser mijor.

La tierra de su kamino estava kuvierta de piedras, los kayentes vientos soplavan en su kara i eya no puedia komunikarse kon la djente a su alrededor, no saviendo sus lingua..

Eya aregalo dos muchachos adorables i presiozos a su marido. Sus instinktos de madre dedikaron mucho tiempo a sus pasharikos en su nido. Ansi eyos esperavan ke la madre venga i les trayga komida. Fueron ensenyados komo komportarsen, i en ke manera devian kedarsen kayados en situasiones perikolozas, kómo bivir en famiya en el nido, i respektar su padre. I eya, todo el tiempo mirandolos, ambezandoles, apoyandolos i kudiandolos. Les amostró kómo servirse de la kavesa, manos i pies. Los vido dia por dia kresersen i mirando ke no manken de nada. Les dio todo ke puedia dar komo madre. Esto fue su plazer dia por dia. Las vizinas la asemejavan a una gayna kudiando a sus poyikos.

Después yegaron las nochadas, las tormentas i sovre el kamino abasho una eskuridad. Los ninyos tenian miedo i frio, La madre koryo, los tomo en sus brasos, para abrasarlos i arepozarlos.

Kuando yegó la mañana i de leshos se puedía ver una montanyika i los ninyos izieron enforsos de suvirsen ariva, aziendo paso por paso, Ansi kresieron, aunke ke los kondisiones eran duras para todos. La madre estava fatigada, kansada. Malgrado esto, durante todos estos tiempos, eya dizia a sus ijos: “Un poko de pasensia, i vamos alkansar i kontinuar.”

Kon los anyos los ninyos kresieron, fueron kapachi de rezistir a las ezietes. Se ambezaron a enfrentarlos, de progesar, de adelantar , tuvieron esperanza, i una fortaleza i de dar sus amor a sus madre a ke de vezes le dizian kon rekonosensya :

“ Kerida, sin ti no podriamos ayegar todo esto, no ivamos alkansar”.

Los días pasaron, las semanas, los mezes i los anyos. La madre avía perdido a uno de sus jóvenes, kuando él kayó en la gerra. El fue arrankado del mundo kuando estava en la flor de su vida. La madre en supito se siento vieja, aharvada, su alma rota, arazgada, arompida, hazina i triste. Pero su otro ijo, su mansevo, era grande i fuerte en su estado i simpre a su lado en konsolandala.

La madre, ke ún día vido a la ventana una paloma, la trato kon karinyo komo ke fue la persona.de su ijo ke murio. Le konto de su vida sin flores, komo ke fue koza suya.

En la noche en la kama kuando se presentó el sielo estreyado, eya disho entre si:

“Esto va ser un mijor dia ke el último, porke mi joven aprendio mucho i va pasar estas enkomendansas a sus ijos.”

Una madre es más ke un rekuerdo. Se trata de una presensia biva. La madre está siempre kon ti, para ke te akodres de los días ke estuvites en el nido. kuando estavan biviendo endjuntos. Komo un ninyo pekenyo, siempre estava la mano de su madre sovre su frente, demandandole si tiene dolores o izietes o si esta desrepozado. Tu madre bive en tu riza.

Kuando los ninyos kresieron, ambezaron i puedían rezistir las obstakolos i difikultades del mundo. Sin dar a saver anyo atras de anyo regalaron a sus madre la kompasión, la fuersa, la esperanza, pero sovre todo, sus amor

Mirando a las dos karas del espejo, komo rezumen, es evidente i klaro ke una madre es más ke una presensia. Eya siempre está aki para rekordar los días de tu chikez, los días ke eya te dava su mano i te amostrava la manera kómo dever kaminar i kómo protejirse, i la orientasión para tus progresos i los avansamientos en tu vida.

La madre es una persona espesial en la vida de kada persona. Eya mos entrega apoyo, abrigo i amor. Todo lo ke nesesitamos. La persona ke mos ama, a vezes puede dar konsejos ke erguelen, pero esto no signifika ke eya no mos ama más.

Kuando el kamino troko su direksion, su úniko ijo le dio fuerza, la konsolo i izo uzo deke eya lo ambezo i deskuvrio , ansi teniendo la valensia de bolar solo afuera del nido.

Un día alkansimos a una area vasta i más lechos avia una luz.

La madre disho::”Me siento bastante vieja i kreo ke esto a la fin de mi kamino”. Pero su ijo disho: “No, no, kedate kon mosotros, te nesesitamos, mismo si estamos leshos de ti.”

Una madre puede amostrar la emosión, alegría, tristeza, miedo, los selos, el odio, la nesesidad, i la esperanza. Eya está siempre presente, mismo si a lo largo es un kamino diferente. El amor de una madre es algo ke tú no vas a olvidarte nunka. Kreo rekordar ke detrás de sus yamadas, son su deseo profundo por ti, i ke tengas una buena vida

Tien respekto de eya, i tien en kuento ke su amor nunka no te va abandonar. Pensa en eya i un día serás feliz ke la onorates.

Si tus padres alkansan a una vejez, no los eches, no los mires komo un kargo. Al kontrario avla kon eyes suave i kon komprension, obediente i amable.

“Kero ver a mis padres felizes para siempre. Eyos me kudiaron desde ke yo era un ninyo pekenyo. Eyos siempre me avian regalado sus amor, me yevaron juntos a traves las montanyas i los vayes abasho para azerme una persona presentavle en la sosiedad de oy”. Dezeo una orasión al Dio.

Melda el sinken komandamiento de la ley ke dize:

“Onra a tu padre i a tu madre, para ke se alargen tus dias sovre
la tierra ke Adonay tu Dio te dio.”

Grasias por dedikar vuestro tiempo a meldar esta istoria…

Rivka Abiry