El UniKo Koro DE KREATURAS en ESPANYOL SEFARADI del mundo
KOL HA KAVOD
BRAVOOOOOOO I MERSI MUNCHO A IZZET BANA
EL REALIZATOR I EL DIREKTOR DEL KORO…
ke no konosiya del todo i ke me izo yorar de emosyon la noche del konsierto de Flory Jagoda akompanyada de Susan i de Ramon en Istanbul por la aviertura de las “Jornadas de Cultura Sefardi”.
Porke ? Pormodo ke supito vimos unos 20 o 30 ijikos i ijikas asuvir a la scena ande estavan los famozos artistas. Todos vistidos de la mizma manera kon las bluzas ESTREYIKAS DE ESTAMBOL, tan luzyos, tan keridos, i ken save, tan lokitos en sus kazas ! Kada uno i una un bonboniko ! Unos seryozos, otros kon la sonriza, otros un poko emosyonados, la chitrifilika godrika kon el antojiko, tan simpatika ke me la keriya komer ! Otras detras… apenas 12 o 13 anyos i ke estavan siguras de sus ermozuras ! Uno kon kaveyos klaros delantre ke saviya todo mijor de los otros, chikitiko i en los ojos de ken se puediya meldar kuanto es intelijente. Eyos kantaron en muestra lingua i yo ke pensava ke no se avlava mas en la mueva jenerasyon. Vide ke IZZET BANA izo un milagro i arekojo muestra fuersa i orgulyo para ensenyarlos muestra kultura i muestra egzistensya. Otra vez kol ha kavod IZZET BANA i a todos ke dieron mano para ke esto se realize.
Oy en diya son muy famozos i son invitados para dar konsiertos en munchos payizes a parte de los konsiertos ke dan en las variyas okazyones para la kehila Judiya de Turkiya, siempre kon muncha gente, appresyados i muy amados por todos.
Izzet Bana dirija tambien el koro de los grandes “NES” i de la mizma manera es un grande plazer de oyirlos kon sus ermozas kantikas en Espanyol.
Yo kero.. oh tanto kero… ke los chikos i los mansevos no mos olviden i seyan orozos i orgulyozos de aparteneser a la komunitad sefaradi.
Bezos a estos chikos i aplozos a sus ensenyantes.
Artículos Relacionados: