Diario Judío México
KANDELIKAS AMARIYAS PARA LA KUATRENA NOCHE
Una noche de invierno…Luvya, ayres lokos afuera…
Los gatikos de la kaye estan eskondidos en sus abrigos mal tapados…
Los perros no estan djugando kon alegriya…No los veygo i no los oygo. Friyo i soledad en las kayes…El park esta vaziyo.
Mi kazika, kayintada, yenna de luzes en este kuatren diya de fiesta de las kandelikas ! Ize pomchikes. Es ansina ke yamamos las “sufganiot” ebreas en Turkiya. Son un tipo de bimuelos fritos kon dulse ariento.
Komiya sin artarme de estos kuando estava en Israel !
Mos aviyan ambezado en el Ulpan (la skola ande les ansenyan el Ebreo a los emigrantes ke yegan a Israel) komo azer esta dulsurya en dias de Hanuka. Ya lo se ke no kale komerlas porke engodran i no son nada de bueno para la salud, ma komo es posivle de olvidarse ke egzisten en esta
fiesta ? Yo solo gosti i las ofri a todos ke se topan en mi kaza esta demanyana.. Se namoraron i servyeron de un delisyozo dezayuno kon te.
La kandelika ke asyendere esta tadre sera amariya. Todas las kandelikas de la kuatrena noche en la hanukiya sera amariyas… Es la kolor de la tristesa, del final de la vida, de las ansyas i de la hazinura… No me plaze esta kolor. Teniya ke asyenderlas porke se topan entre todas las otras kandelikas !
Rogare para todos ke se topan en oras pretas kon tristesa en el korason… Para ke los hazinos rekuperen lo mas presto posivle.. Para ke los ke tiyenen de murir no sufren i se bolen komo pasharikos al otro mundo, sin
darsen kuenta mizmo…. Rogi para ke el D-io se apiyade de los animalitos ke biven en las kayes, medyo artos medyo ambiyertos… Ko no sufran del friyo o de hazinuras. Rogi para los “sin kaza” arondjados de sus vidas…
I…. ke las kandelikas amariyas kuando se van a amatar, yeven kon eyas endjuntas todos los males ..
Artículos Relacionados: