HAG SAMEAH !
ANYADA BUENA I DULSE
PARA MIS AMIGOS I MIS AMIGITAS ………..
Ke pensash de avlar un poko de lo ke azemos en la kozina por esta ermoza fiesta ke es Roshashana ?
A vezes somos invitados i a vezes es mozotros ke invitamos keridos i amigos ande mozotros para gozar de una atmosfera de fiesta. Yo digo ke es la fiesta de las mezas sharanfonfon kon el mijor mantel brodado, vazos de kristal i platos de los mas ermozos ke se tiene en kaza, lo todo para la primera noche del anyo, kon el dezeo de tener una mueva anyada de salud, de alegriyas, de paz i de reushitad. Des de siempre las personas tuvyeron la konviksyon ke el anyo va kontinuar de la manera ke se selebra el primer diya o la noche de fiesta… Kon una buena humor, sanos i rezyos, asentados kon vistidos muevos i elegantes alrededor de la meza muy rika kon komidas i platos savrozos … Se trayen flores, buketos de kolores o rozas blankas para los ke les gusta la dekorasyon klasika, regalos emburujados en papeles briyantes…. Tan ermozos ke la persona ni kere avrir el paketo i entregarse del misteryo, del sekreto ke kontiene. Se golen perfumes karos ke transportan las personas a una guerta inchida de flores, a un mundo majiko ke da la gana de espandirse i durmir en uno de los sofas blandos i konfortavles… Ma las golores de las komidas travan la gente ke dospues de la primera medya hora de aperitivos se aserkan para asentarsen a fiestar !
En Roshashana se topa siempre ensima de la meza un ermozo bolo de dulse de mansana…. Revanadas de mansana (fregadas kon limon para ke keden blankas), almendras deshadas en la agua i mundadas, miel, un bolo de agranadas mundadas i vinos, vinos, mas vinos ! Sumo de uvas para los chikos…..
Mi madre uzava. i yo tambien fina unos kuantos anyos atras, gizar kodredo al orno komo lo vesh en la foto aki ariva…. Puedeser ke es uno de los mijores platos ke egziste si esta bien preparado… Se tiene de menester de uno o dos, asigun las personas invitadas, brasos enteros de kodrero. Se deshan en la agua salada para ke salga toda la sangre. Se meten al orno kon kuartos de patatas, sevoya, domat, piperushkas, ajo, sal un poko de azeyte de oliva, 2-3 ojas de daphna, tomillo (kekik), poka pimienta preta, una kupa de agua… Se kovre kon un folio de aluminium, se azen unos burakos kon el piron en el folio i se desha a kozer kon chika flama fina ke el kodrero se toste.. ma attensyon a la patatat i a los otros ingredientes de la komida….
Sfongos
Una otra komida ke aziyamos era los “sfongos” ! Se kozen muy poko las ojas de la spinacha, Se azen chikos nidos para inchir de pure de patata kon gueyvos. Se les sarpika sesame o pinyones o almendras emblankesidas ensima.
Se aparejava tambien poyo sofrito kon tomat, aroz de fiesta ke es aroz boltado en la lumbre kon azeyte, sevoya kortada finamente, Se uza una kuchara de tavla (madeira) para boltar los ingredientes, sin kemarlos.
Se adjunta pinyones, uva seka (pretas de preferencia) sal episas, preshil, eneldo (dereotu) pimyenta preta.
I se desha a kozer kon agua komo aroz normal. Si se prefera se inche el poyo kon el mizmo aroz i se desha a kozer kon agua kon chika flama.
Vos digo de muevo “Bon appetit et bonne fete” kon una ancha soriza……
kon el chapeyo alto de los gizandones !
Artículos Relacionados: