Las Kuarenta Kazas de los Djudios de Bejar

Por:
- - Visto 651 veces

Kon la puja del intereso enverso la istoria de los djudios de Espanya, en munchos lugares de este paiz son echos esforsos, estos ultimos anyos, para deskuvrir, i en la mizura del posible restorar, kazas i otros edifisios atados de una manera o otra a los djudios ke bivieron en Espanya asta el anyo 1492.

En las sivdades ke forman parte de la Red de Juderias, por enshemplo, ya fue echo un muy buen lavoro en este kampo i fueron identifikadas kazas, antiguas sinagogas i mizmo kayes enteras onde ya se save kon seguridad ke bivian djudios. En algunas sivdades fueron mizmo restoradas unas kuantas de estas kazas i sinagogas, transformandolas en muzeos o sentros kulturales onde los espanyoles i los turistas pueden resivir una idea de lo ke fueron estas djuderias.

Kale rekonoser, djuntos kon esto, ke si se toman en konsiderasion todas las sivdades i los kazales onde uvo komunidades djudias asta 1492, es en un chiko numero solo de entre eyas ke pudieron ser indentifikados restos de la prezensia mas ke milenaria de los djudios en Espanya. En la mayoria de estos lugares las kazas djudias orijinales ya se derrokaron i fueron remplasadas por kazas muevas i dinguno ya no save agora onde exaktamente estavan las djuderias. Mizmo en los archivos munisipales i otros, son raros los kavzos en los kualos son topados dokumentos ke permeten de identifikar kazas i edifisios de muestros dias komo aviendo apartenido mas de 500 anyos atras a una de las famiyas djudias ke bivieron ayi.


Djustamente por esta razon mos parese muy importante i interesante el artikolo del eskritor i periodista espanyol Gonzalo Santonja, “Las cuarenta casas de los judios de Bejar”.

El artikolo es bazado sovre un dokumento, el “Memorial de las quarenta cassas de los judios”, inkluido en el ” Interrogatorio presentado por el Colegio de San Guillermo en Salamanca “.

Estas kazas eran parte de los bienes de los Dukes de Bejar ke despues de aver konosido dias de gloria i rikeza eskayeron de sus fortuna i fueron traidos al djuzgo por sus kreditores ke demandaron, entre otras, de azer un inventorio de estas kazas i fiksar sus valor.

Segun lo apunta Gonzalo Santonja, grasias al lavoro de los funksionarios de djustisia ke izieron este inventario, tenemos agora un verdadero filon dokumental ke mos ayudara a mijor konoser la istoria de la komunidad djudia de Bejar. A titolo de ilustrasion traemos aki, en traduksion al ladino, unos paragrafos de este memorial:

  1. Primeramente, la kaye Mayor, a la mano derecha, yendo desde la plasa al monasterio muevo, unas kazas onde en el anyo 31 bivio Alonso Rodrigez, butikario, i en el 67 eran de sus ijos ke las alkilaron a Juan Lopez, merkader, i este anyo son del governador Castillo. Eyas valen 100.000 maravedis i el alkiler es de 4000 maravedis al anyo.
  2. Item en la dicha kaye, dos pares de kazas onde en el anyo de 31 bivia el lisensiado de la Pe n a , i el 67 Diego de Aguilar, shastre, i este anyo Diego Mu n oz, sapatero, i los menores de Francisco Gonzalez; ke de las unas izo mersed la Dukesa Do ñ a Maria, i las otras son de los dichos menores. La propriedad vale 400 dukados i las dos estan alkiladas por 14 dukados a Francisco Mu n oz, sapatero.

Segun lo vemos este dokumento revela la lokalizasion exakta, una detras de otra, de las “Kuarenta kazas de los djudios” de la sivdad de Bejar kon sus valor i el montante por el kual podian ser alkiladas.

El titolo del dokumento es muy sinyifikativo “Las kuarenta kazas de los djudios”, entregadas al Colegio de San Guillermo, lo ke de dinguna manera no sinyifika ke no avia otras, en desparte de las ke fueron dadas a esta institusion: las kazas de los konversos i las ke, pokos anyos despues de la ekspulsion fueron rekuperadas por los djudios ke, no podiendo soportar el exilo se konvertieron i tornaron de Portugal.

En la ora de la ekspulsion, en Hervas avia unas 40 famiyas djudias (entre 180-200 almas). Sigun los kalkulos de Garcia Martinez i Martin Manuel, en las djuderias de Bejar i Hervas devia aver mas de 140 famiyas. Admetiendo ke kada famiya tenia al deredor de kuatro miembros, los djudios de Bejar, eran entre 400 – 500 almas i okupavan unas 120 kazas. Se puede dizir entonses, komo konkluzion al estudio de este dokumento, ke los djudios de Bejar ke eskojeron el exilo, kedando fideles a la relijion djudia, i ke sus kazas fueron entregadas por los Reyes Katolikos al Duke de Bejar, Don Alvaro de Zu ñ iga, eran el tersio de la komunidad: 40 famiyas ke bivian en las 40 kazas mensionados en el dokumento del kual avlamos.

En fin de kuento, apunta Gonzalo Santonja a la fin de su artikolo, “. no es ke la sivdad kedo vazia, ma el golpe duvo ser fuerte, del punto de vista ekonomiko i psikolojiko tambien. Si una kaza es un lugar onde uno es esperado, en 1492 Bejar sufrio 40 golpes mortales. Akeya sosiedad, es posible ke se amostrase oroza, ma no podia serlo”.

Acerca de Central de Noticias Diario Judío

Noticias, Reportajes, Cobertura de Eventos por nuestro staff editorial, así como artículos recibidos por la redacción para ser republicados en este medio.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: