Diario Judío México - Esta semana tengo una fantaziya muy ermoza ke penso prezentarvos kon mis biervos i a mi manera en yevandovos a los muy leshos, en una sivdad de grande splendor atras munchos siglos…

Buyrun:

La Edad Medya…La Renesans…La Republika de Venezia ke era governada por los poderozos Dodges.

Las rikezas fabulozas del komersyo de los naves, de las sedas, de las joyas, de los vinos i de las espesas ke viniyan del misteryozo oryente…

El komersiyo del oro, de la plata i del kovre, los perfumos egzotikos tan bushkados por las dammas de los palasyos,  divertidas de la parte de los grandes pintores, artistas, kantadores…

El grande poder de la eglisya i de los saserdotes i los monhos kistyanos… .El tiempo de los assasinatos en las kamaretas aleskuras por un nada o por aver oyido una konversasyon, por aver mirado de lado o ver alguno ke deviya kedar sekreto…

El poder del poder !… Las rikezas danjerozas ke puediyan kostar la vida para trokar de mano!

La relijyon por el poder, por las matansinas, por el ego, para tener los reyes a sus piezes…

Tiempos aleskuros en lo klaro de diyas pasando kon enfasyo, kon pasyones eskondidas, kon broderiyas de oro … Fiestas i banketos de los nobles ke puediyan gozar de la vida a murir!

La dada de una espada o un kuchiyo en la noche… Dospues… El bruido sodro de un puerpo echado a los kanales ande se arezvalavan las gondolas doradas… I el silensyo!

Es justamente de este silensyo kon tablos manyifikos de los  festivales alavados de Venezia.. De los balos maskados ke vos kero avlar en dizyendovos de oyir de leshos las melodiyas lansinantes de la sonata del “Klaro de Luna ” de Beethoven…

EL SILENSYO ES UN ARTE
(Poeziya en proza)

A vezes una mirada
por entender mas aya de la pupilla…
El dezeo de dizir munchas kozas
en guadrando su gana..
Serrar la boka
i deshar korrer las ideyas
sin ke s’eksteryorizen.

Deshar pasar tiempo
entre las kestyones i las repuestas..
Asperar ke los musklos yegen a dar
la ekspresyon de la kara…
Asperar un sinyo.

Pensar ke el d’enfrente esta pensando tambien.
Asperar…Saver kayarse savyendo ke la solusyon
A vezes, no es siempre en avriyendo la boka…

Para kualo dizir todo
i nada guadrar para si.
Deke no entyenden
Ke los biervos salen
mas lentos de los pensamientos
I todo lo ke mos pasa por la kavesa
No se puede traduizir en biervos?

Se puede dar a entender
kon los jestos tambien
i el silensyo se bolta a ser un grito!
El silensyo en los funerayes,

el silensyo de verguensa
i de timides
o kuando duele el korason
i no se puede ni yorar!

Kayarse para oyir, para mirar,
kayarse por entender.
Kayarse por estar kayado!
Kayarse por entender ke el silensyo
es la maska de los sonidos los mas ermozos.

Sharope blanco
kayandose…

Menajar el silensyo es mas difisil ke menajar la avla !
( Clemenceau)

Sharope Blanco
Sefaradimuestro

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


Artículo anteriorGuerre des Six-Jours: une victoire écrasante qui a stupéfié les armées Arabes
Artículo siguienteGella Fishman fought hard for the dignity of Yiddish, (In Yiddish)
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.