León Cohen Bello nasió el 7 de Agosto de 1943, en Montevideo, sivdá kapitala del Uruguay. Sus djenitores eran Aaron Cohen i Luna Bello. Su padre Aaron, nasió en lzmir el 15 de Novembre de 1902, ijo de Jose Cohen i de madre Capuya. Su madre Luna, ija de Leon Bello i Matilde Cohen, eran nasidos en lzmir. Luna estudió en la Eskola de la Aliansa Franseza Israelita Universal.
El padre Aaron ayegó a Montevideo en 1922, despúes de morar un kurto tiempo en la izla de Creta, ama por las problemas de la gerra entre Turkia i la Gresia, desidió de ir a Montevideo ande estava su ermano Rafael, kedó a morar en su kaza i afilú le dió lavoro, para esto estava de novio kon Luna, ke la trusho a Montevideo. Se kazaron en 1925 en la Sinagoga Sefaradi de la kaleja Buenos Aires. De este matrimonio nasieron: Matilde, ke murió de chikitika, José, Clara Leonor i León. Moraron en la yamada sivdá vieja, kuartier yeno de djidiós sefaradís. En la kaleja Zabala, teniya un magazen yamado “Los Angelitos”. Despúes de un tiempo, trokaron a morar en la sivdá de Durazno, a 200 kilómetros de Montevideo. Mas tadre aboltaron a morar en Montevideo ande nase León, en la kaleja Gobernador del Pino 4061.
León se ambezó en el Talmut Torá Eliezer Ben Yehuda de la Komunitá Sefaradí, i el ke le ambezó para el bar-mitzvá fue el afamado Rabino Meir Masliah. Si bien iva a la keilá para las fiestas i más, no ansina todas las se-manadas.
Estudia la eskola primaria, segundaria i la Fakultad de Medisina, indemás Psikolojía.
El 3 de Avril de 1966, se kaza kon Jane Jager, en la Sinagoga Nueva Congregación Israelita de Montevideo. Nasen sus ijos Ana Gabriela en 1967, Pablo en 1969, Deborah en 1972 en Montevideo, i Laura en 1981 en Buenos Aires.
En los anyos 1977, tuvo el titolo de mediko en Buenos Aires, despúes de pasar los egzámenes de menester.
En Buenos Aires, moró en Castelar, en Morón, ande lavorava komo medikó jeneral i laboral, en una klinika kon otros profesionales. Estos de a poko a poko desharon este sitio, ande León kedó solo en la klinika situada en Rafael Castillo, en derredor de la sivdá de Buenos Aires. Esto akontesió asta el anyo 2000, ke trokan a morar en el kuartier de Caballito, en la kaleja Hidalgo 337. En la aktualitá, lavora en la espesialitá de medisina legal i psikiatría, kon hazinos (enfermos) de las dos espesialidades.
En los anyos 1972, tiempos de tener los ijos chikitikos en la eskola ebrea en Morón… Por azardo de la vida, se relasiona i ampesa a lavorar komo dirijente en lo komunitá, ayega a ser presidente de la eskola, lavora en el movimiento Avodá, afilú komo miembro en OSA Organización Sionista Mundial, komo sekretario de aksión sosial en Amia, kuando se fraguó el muevo edifisio después del atentato, komo vise-presidente en DAZA Delegación de Asociaciones Israelitas Argentinas, sekretario de Avodá i direktor adjunto del Ospital Israelita.
En el 2010, presentó en el Congreso Mundial de Bioética en Safed, un lavoro yamado: Enseñanza de la Bioética: Encuentro entre la ética y valores morales en programas de entrenamiento a través de la dignidad de los sobrevivientes de la Shoá.
Mesmo kuando fue el aksidente de Cromahón, sitio ande tantos jovenes pedrieron la vida en Buenos Aires, fué nombrado en el foro de profesores en la katedrá de Bio-Ética de la Unesco en la sivdá de Haifa en 2012, oy yamada Cátedra Internacional de Bio Ética.
En el 2012 presentó su tesis doktoral en psikolojía, es profesor del doktorato en psikolojía, i en la aktualitá kontinua a lavorar. Kuando le demandí ke siente de ser sefaradí, fue un momento esmoviente de ver sus ojos briyantes de lagrimás, mientres ke me disho: “Kuando era chikitiko, ainda rekodro los Shabates por la Ladre ande en derredor de la radio, mi padre i sus amigos se asentavan, para sintir una program de la kolektivitá armenia ande se sintía muziká turka, mientres ke no mankavan de tomar kafé. Mesmo rekodro las bodas de mis ermanos en kaza, ande unos días antes no mankavan mis tías de venir a ayudar a mi madre a elaborar las eskisiteses sefaradíes, la kaza se inchiya de alegría i golores, ke ainda las tengo en mis narizes! Afilú rekodro a mi padre elaborando el haroset para Pesah, tradisión ke ainda ago i kontinuan mis ijos i mis inyetos.
Kuando me kazí kon Jane, entresalida estava de gostar las komidas ke mi madre elaborava, las ke oy kuzina kon la savor de mi madre.
Muestra kaza está yena de kostumbres i tradisiones, las ke siento desde lo más arientro… Digo de mi para mi: si ubiera estado en el momento de la ekspulsión, kuala puedía ser mi duda? No tengo la repuesta, ama de siguro uviera sido un grande luchador del djudaísmo.”
Entre otras anekdotas, León rekodra lo akontesido en el Talmud Torá, tiempos de mansevo. Entre los amigos teniya a la aktrisa Gabriela Acher, luzia i simpátika de joven, ande los jovenes se namoravan i estavan lokos por eya. El grupo devía apresentar una ovra de teatro para Purim, esto akontesía en una karpa vestidos kon ropas de soldados, donde León echado en el piso, teniya una eshena djunto a eya, devía dizir unos biervos, ama no rekodra si disho bien los biervos ke devía, akontesió esto de lo entresalido ke estava por Gabriela.
En la aktualitá León tiene 9 inyetos, de su ija Debora: Daniela, Manuel, Lucia i Simón buchukes (mellizos)
De su ijo Pablo. Matías, Delfina i Santiago. De su ija Laura: Abril i Jonás.
Su padre Aaron, se fue de este mundo el 19 de Desembre de 1971, i su madre el 25 de Julio de 1980, repozan en el Sementerio Israelita de La Paz, serka de Montevideo en el sektor sefaradi.
León Cohen Bello, sefaradi, es rekonosido komo profesional, i afilú komo dirijente de la komunitá Judía de la Argentina.
Para eskapar, le dezeo munchos anyos más lavorando en la Komunitá, mesmo komo medikó ayudando a las djentes.
Artículos Relacionados: