Kerida Mireille,
Grasyas por tu letra. Estava muy savrozo i todos lo entendemos. I es esto lo prensipal.
Trokar de look en un kuafor !!! Madre miya ! Siiiiiiii Yo lo ago sin irme al kuafor para esto… En vezes me da la gana i me pinto la kara komo un gato. Kale ver ke ermoza so ! No tengo kudyado ke los hombres no me van a mirar… Oh no ! Yo penso ke KADA MUJER es muy atraktiva i ermoza SI LO KERE. I no egziste hombre ke no puede alkansar si es reelamente esto en su kavesa ! Ansina o ansina se puede tener una relasyon kon alguno si es esto el projekto ! Kon esto …
No kreyo ke ayga un hombre ke valga la pena de esfuersarse tanto por el en la vida ! Las mismas kozas dire por una mujer. Mi madre diziya “Moshe muryo ley no kedo ? ” Si no es uno es el otro ! Lo prensipal es ke seya justo i responsavle i un buen amigo en la vida. Ke tenga las kalitades de un buen padre i hombre de kaza. Esto es lo ke dezeyo por kada ija de Israel. Yo so otro tipo de pashariko…
A mi no me mires ! Di-o me izo para El solo ! Me esta aregalando komo dingun marido lo puede azer ! Me entyende perfektamente, aze todo lo ke kero i me ama muncho. Me da felisitad en mi korason, alegriya, amor, optimizmo, me embiya dinero kuando tengo de menester, ni yo entyendo komo lo aze ma LO AZE de una manera ! I para ke dingunos no me keran por ke es un Di-o selozo, me izo komo una borekita ! No kere ke me agan pena ! Los hombres endjindan las mujeres muncho…. Las mujeres kazadas no son felises. Son muy raros los hombres ke son amigos buenos de sus mujeres. Las enganyan kon otras, las aharvan, las maltretan, las azen sufrir de mil manera, no son libres de azer lo ke keren, ni mizmo meldar en un kanton ! Siempre keren peleyarsen i nada les gusta en kaza… Bueno esto es mas o menos lo ke se pasa en las famiyas mizmo si no lo ves ! Ay, por siguro kazamyentos orozos, ma veramente ke no son munchos ! Unos divorsan i los otros kedan kazados por ovligasyon !
Tu i yo kale ke reingrasyemos Di-o muncho muncho por no tener ansina de grande pena Barminnam ! Mil grasyas a los Sielos… El problem es ke nunka se puede saver ANTES komo es en vedra la persona kon ken se va kazar. Parese todo roz i ermozo i dospues sale lo preto, lo suzyo i la negrigura. El Di-o ke no trayga ! Es porke Di-o te kere muncho bien ke no te kazates keridita ! Ay tantas kozas de azer para ser felis !!!
No te kazates es un mal. Si te kazavas iva ser miles de males !!!! Para kualo ? Ademas no estamos bivyendo en un mundo ande vamos a deshar una ermoza vida a muestras kreaturas. El mundo esta una dezgrasya ! Yo no esto de avizo de azer kreaturas ! La sosyetad esta de mal en mal kada diya ! El mundo esta trokando en todo i no para bien. Va ser imposivle de bivir otras 2- 3 jenerasyones. El mundo arabo va ser en majoritad en Evropa i en munchos lugares.
Amerika va konoser muy grandes problemas. El klima se esta trokando i va aver ambre i sed….Los mikrobes se estan transformando en dando hazinuras fatales i no se esta mas puediyondo topar kuras porke estan trokando de natura kada poko, komo el Aids ! Hazinuras ke vienen de la karne, de los pishkados i de los pasharos/poyos ets. estan matando gente i esto va kontinuar ! Los ekilibros de la natura se estan trokando tambien. Esto es una kadena ke tiyene efektos fina ande la persona no se puede mizmo imajinar !
Una sosyetad de delinkuantes, de drogados, de hazinos, kon problemas mentales en muy munchos, una sosyetad ande el kazamiyento no va mas egzistir i komo ya empeso, kreaturas vinidos al mundo de no se save de ken… Engrandesidos kon madres ke tienen ke lavorar i en las manos de eskolas no kompetantes lo mas del tiempo, sin padre, kon ermanos ke no son ermanos…..Kualo ke te diga !
Ken es el inkonsiento ke kere kazarse i mas… trayer mas kreaturas a este mundo ! Para ke se muera a la fin ! Ke konoska las penas, las difikultades, las hazinuras, los espantos !
No…. El Di-o ke me perdone, ma yo ne esto de avizo de sufrir i azer sufrir las kreaturas..
Lo se ke no kale ke pense ansina ma es el kavzo !
Te abraso
Sharope blanco
Artículos Relacionados: