Diario Judío México-
Esta poeziya la dediko komo un regalo de nasimyento
de su inyeto al Amigito RENAUD SOUHAMI ke viene
de ser saba de muevo. Le rogo de eksplikar a su inyeto
el kontenido de mi poeziya kuando se engrandesera
porke el mizmo, konto, fue entre los ke desharon el
EGYPTO kon toda su famiya i kon una sola validja
en la mano de kada uno…
LO KE VIENE DEL AYRE NO TRAYE HAYRE
….I es lo ke se ve en los payizes vizinos !
Ke les kedo de lo ke les arrovaron a los judyos ?
Los arrondjaron, izyeron pogromes averguensados
Esto no les trusho ni beraha ni atzlaha !
El petrol se les kemo o en serka se les eskapa…
Ke les va kedar kuando los pozos se van a sekar ?
Kuanto puedran kon lo ke agora tienen dayanar ?
Kuando no puedran merkar ni kuras ni makaron ?
Ande estavan se kedaron, ni de un paso avansaron
Mentalmente i kulturalmente los mizmos kedaron…
Fraguas, kazas i konstruksyones
I todo en sus tierras sin bendisyones
Se derrokan komo kutis de kibrites !!!
Solo ke no vengan terremotos
Vientos lokos de los deziertos !…
Ke valen las paras i tierras arrovadas
Kuando se bive dayinda komo en las tentas ?
A kualo sierven todas sus mintiras
Kuando el mundo entero save las vedras ?
I si se mostran amigos es solo por las paras !
El terrorizmo da espanto, ay firyodos…
La alma mos se parte oyendo de los muertos..
No tienen piadad ni de los chikos ni de los viejos
Mas aharvan, mas matan, mas echan roketas…
La Galil trembla kuando se oyen las bombas…
Ma Israel se enfuertese kada vez mas i mas !
Komo el arvole ke tayan para tener mas fuersas
Tsahal es el leon de Yehuda
Kuando arresiven un golpe ke meresen
Komo kreaturas empesan a kesharsen…
No saven mas ande gritar i echar kavesa…
Inchen las salas i los buros de la Medya
Kon mintiras, kalomniyas i munchas lagrimas…
Se van kon falsedad a las Nasyones Unidas
Para mas azer bruido, mas hadras i baranas !
Sus selo i sus odyo immenso i hazimyento
No pueder alkansar a lo bueno i a el ermozo
No los desha durmir i bivir en paz i en repozo
Des de ke nasen sus ijos es el mizmo ambezo
Matar mas judyos i murir para ir al Paradizo !
Al lugar de jugetes se les da armas i kuchiyos
I al lugar de livros modernos meldan sus Eskritos !
Alavan sus martirios ke saltaron en sus suisidios
Los antrenan para ke seyan vayantes guerreros
Ma sale al fin ke no son ke kovardes terroristos !
Ke afito ke mandaron de sus payizes los judyos ?
A kualo les servyo sus bienes i sus templos ?
No miresh a un punyado de sheykes i rikos !
El puevlo de la kaye ni tiene kalsados !
La gente se muere de ambre sin trapos !
Artículos Relacionados: