Diario Judío México - CHAMLIDJA – KUZGUNDJUK – FENERBAHCE

Mazal i Pnina se fueron kon el oto de Daniel Benbasat. Lili Esther i yo tomimos un taxi i mos enkuentrimos todos en Chamlidja. Una lokura de lugar. Es el monte el mas alto de Istanbul. Un kafe muy ermozo en la guerta al punto kulminante del monte aze pasar momentos majikos a los vijitantes

Daniel Benbanaste mos avlo de su ermano, el famozo eskritor-investigator-jurnalisto Nesim Benbanaste, el ke disho ke kaliya fiestar los 500 anyos de la vinida en tiyerra otomana de los djudyos de Espanya i es pormodo de este famozo djudyo ke se fiestaron de manera pompoza en 1992 kon prezidentes i personas de goviernos i munchas personas invitadas para este diya tan memoravle en Turkiya. Mos regalo el livro ke se eskrivyo kon sus esfuersos para su ermano ke figura en los anales del Muzeo Djudyo de Istanbul.

Gozimos de las guertas majikas, de las rozas maraviyozas i del panorama uniko de Istanbul en Chamlidja, vijitado lo mas por islamistos, mujeres tapadas, porke el lugar esta debasho de una administrasyon relijyoza islamika. Por siguro ke aviya toda manera de djente i mizmo grupos ke vinyeron de la China leshana.

Otra ves tomimos un taksi ke se fue detras de la oto de Daniel Benbanaste i arivimos imos a Kuzgundjuk. Kuzgundjuk es un kartye en las rivas aziyatikas del Bosfor ande biviyan 500 famiyas djudiyas en los anyos 1920 (Meldi el livro muy enteresante de Nesim Benezra – Une Enfance Juive –

Ke ermozo lugar ! Guadro las linyas tipikas del tiempo de sus anyos de oro ….Kazal simpatiko kon sus viyejas kazas restoradas, muy karas agora porke estan solisitadas por gente entelektual, artistos ets. Los kafes ande lo mas los ombres se topan para djugar tavli i okey, los viyejos berberes (barber) restorantizikos de 4-5 mezas, ornos de pan kozidos a la lumbre, botikas ke venden alikas i tumbanikas (nothing and all) i vendedores de frutas ke se engrandesen en las guertas de Kuzgundjuk mizmo….. Serezas, pipinos chikitikos, domat, moras, fragulas, prunas, lechuas ets….Si estava sola me iva entrar en las guertas i kon permisyon (o sin permisyon (!) i iva komer de estos en arankandolas kon mis manos ! Siiiiiiiii.

Mos avriyeron las puertas del kal de Kuzgundjuk guadrado kon polises armados i alta sekuritad (toda la El !). Ayyyyyyy ke ermozo kal… Un patio enkantador kon un basino de agua echo de marbro en forma de shaday, arvolikos, munchas flores, lugares repozados para asentarse afuera…. Muy kaynte i estetika entrada. El Gabay, el senyor Aron i los mansevos de ayuda mos aresivyeron muy muy bueno i esto lo devemos al senyor Daniel Benbanaste. Aryento del edifisayo vide el kal ke me plazyo tanto… Brodado, pintado, lavorado kon muncho arte en sus partes en tavla, no muy grande ma ermozoooooo i kalorozo. Pishin demandi si puedo merkar un lugar en el simetaryo i el Senyor Aron me disho ke estan asperando el permiso de Israel fina 2 mezes para pueder empesar a enterrar aya. (Ay unos 50 lugares solo disho i bastante karo ! Ay mijor lugar en el mundo para avrir los ojos al Gan Eden ? )

Rogimos todos aya para muestros keridos i muestra salud. Senyor Aron mos regalo las orasyones para Sukot, dos livrikos en ebreo i en turko. Paketikosmuy luzyos ! Si morava serka de este kaliziko yo kada Shabat me iva ir aya kon plazer… Disho ke ay unas 20 mujeres ke se adjuntan kada semana a las orasyones.

El korason livyano i alegres otra ves tomimos taksi i Daniel Benbanaste vino kon su oto detras de mozotras para irmos a Beylerbey, un otro kazal enkantador del Bosfor ke kije ke mis amigitas konoskan i se maraviyen de este lugar ke a mi me plaze tanto !

Kaminimos un poko en las kalejikas luzyas, entrimos en una galeriya de tablos pintados de una ermozura ke me desho la boka avyerta ! Mos plazyo tanto ! La vedra unos mas ermozos de otros ! Nada moderno. Vistas del Bosfor enkantador i de otros lugares, personas, la mar, la kula i su kaleja, un tablo, ke no me se esta indo de los ojos, por la kamerata de echar..

Pnina merko “mishmish” – kayisi, apricot – le dezeyo la alma disho !….

Yegimos a el restaurant i muestra meza debasho del parasol en la guerta estava a 50 santrimetros de la mar ! La vista enkomparavle del Bosfor, el grande ponte, los barkos i motores kon djente kantando i baylando, otros, turistos, los ojos grandes avyertos de tanta ermozura i makinas de foto en la mano, los “kayikchis” (peshkadores kon sus barko chikos prontos a azer pasar la djente a la otra costa riva del Bosfor) era un festino para muestras
miradas ….La sola palavra para ekspreser muestros sentimientos es ke estavamos felises todos.

Komimos pishkados… i malgrado ke la komida del primer diya estava mijor mis amigitas estavan muy kontente de este pranso tambien !
Sovraron pishkados i Esther disho al serviente de darlos a los “miau miau”. Lo ke me riyi de la manera ke se lo ekspliko ! No eran gatikos ke mankavan ayi !

A la torna merki una lokura de serezas i otras frutas de las guertas de Beylerbey para ofrirlas a mis amigitas i tomimos el taksi para irmos ande mi. Daniel Benbanaste se fue a sus okupasyones. Kuando abashimos del taksi mos rendimos kuentoke yo me aviya olvidado el sako de las frutas en el taksi. Ya mos embaraso a todas la vedra ! No aviya nada de azer. El shofer no torno por siguro, muy kontente de yevarle la mijor fruta a su mujer !

En kaza partimos el melon ke yo no saviya ke Esther Ferera merko ! Los “mishmish” de Pnina i lo ke teniya yo en kaza fueron muestro plazer en mi balkoniko ! Mos arepozimos un poko, las aregali a mis amigitas kon todo mi karinyo i salimos….. Eran las 5 de la tadre.

Tomimos taxis i sinko amigitas yegimos a Fenerbahche, un park i guertas muy grandes kon kafes luksuozos, klubs, boskets i la naturaleza kon toda su splendor entornada de tres partes kon la mar Marmara, vista de las islas (Princes Islands). Desidi de yevarlas aya mis amigitas porke primero es muy serka de mi kaza i sigunda razon porke teniya una koza en la kavesa ! Una surpriza ke se ivan akodrar toda sus vidas ! Estava bolando de plazer yo !

Primero entrimos en un klub/beach/pub/restaurant ande las miyas se espandyeron en los lugares muy konfortavles i no kijeron ni meneyarsen de aya ! Las travi de fuersa riyendomeeeeeeeee Izimos tornos en el park i en un otro kafe muy luksuozo “Romantika”, sus guertas ets…Ni ke estavan entendyendo porke no mos estavamos asentando en estos lugares ! Yo teniya otra ideya !

Kontinuimos a kaminar, avlando, riyendo, istoryikas, shakas, fotografias. Tomimos soluk en frente de la mar ande estavan pasando los vapores, otobus de mar a alta velositad para las islas. Dospues entrimos, komo de nada, siguras komo si es el lugar de muestros padres de siempre, 5 mujeres aedadas i ke se teniyan de respektar por siguro (!) en el klub privado de GALATASARAY kon su bandyera korolada amariya. Gente muy shik estavan komyendo en las tarasaz enfrente de la mar. A este momento empeso el sol a azerse un disko de flamas kolorado. El siyelo korolado entero i la mar era una vista enkantadora…. Mis amigitas estavan muy emosyonadas de muestra aventura ! Delantre de los ojos de esta djente shik mozotros kontinuimos a kaminar en la guerta i arivimos ande keriyo yo arivar !

La pared ke separa el Klub de Galatasarar kon el Klub de Fenerbahche a la bandyera blu eskuro i amariyo ! Esta pared se eskapa en el bodre de la mar i la mar mizma es separada del klub vizino kon muy grandes i chikas rokas, piedras puntudas, fyerros de separasyon. Hehehehe….Mis amigitas agora teniyan de azer extreme sport, pasar este lugar difisil i danjorozo i ademas defendido por siguro ! A esta edad…. Bueno mas de 18 anyos !

Esther Ferera, mashalla, paso la primera i reusho ! Yo dospues, tremblando entera, el soluk tomado, korolada i los ojos grandes grandes avyertos ! Pnina, Mazal i Lilika no se estavan kreyendo ke teniyan de pasar esto ! Mazal del todo ! Pnina reusho a pasar i puido vinir a mi lado ! Riyendose i no kreyendo a lo ke estava pasando ! Lili muryendose del sar a lo ke iva afitar a su madre gritando ke se va durmir aya i no va pasar ! Ma riyendo riyendo tambiyen…..Esther Ferera torno en sima de las rokas fina en medyo i kon el ayudo de Lilika i Esther, mi amigita kerida Mazal, superwoman, ni kreyendose komo lo puido azer vino a mi lado….La bezi…la bezi…la abresi.. Todas mos estavamos abrasando i felisitando, koloradas del plazer ke izimos extreme sport i estavamos sanas i rezyas i muy muy alegres de
aver reushido ! Lili disho ke a la otra vez devemos azer segurita de viaje kon extreme sport inkluido ! No estava fasil de pasar estas rokas !

Muestra aventura kontinuo para yegar al Klub de Velas de Istanbul!

Estavamos saltando de plazer estas 5 mujeres no de 18 anyos en la separasyon de parte de la mar entre los dos klubes Galatasaray i Fenerbahche, los mas grandes klubes de Football de Turkiya de renomada enternasyonal. Estavamos en una platforma alta i teniyamos de abashar de esta agora. Abasho, a mi sorpreza, djente muy shik de este klub estavan komyendo par la noche !!! Viyeron ke salyeron de la mar entre las rokas de abasho abasho 5 mujeres riyendosen, abrasandosen de una adedad avansada (la mas chika era Lilika kon 50 anyos…Komo muestra ijika)

La djente estavan soriyendomos i aplodisandomos, uno de los mosos vino a dizirme ke no es permetido de entrar i estar aya ! Lo embiyi a kaminar kon dulsura.. Dos gentlemen estavan aya mirandomos kon ojos de admirasyon. El uno se alevanto pishin metyo la siya ande estava asentado abasho de la platforma ande estavamos ! Estava bastante alto ! Un otro vino i lo ayudo a abasharmos kada una de akeya platforma alta!. Estavamos aryento del Klub de Fenerbahche. Kontinuimos a kaminar en sus guertas. Mazal disho ke se iva durmir aya en la guerta i no iva pasar otra vez akeyas rokas ensima de la mar ! La asiguri ke ivamos a salir komo reynas del Klub de al lado ! Otra vez rizas rizas….Teniyamos de pasar a la otra vanda i no saviya si se puediya o no !

La shans de Mazal estava avyerto i por aki por aya entre lugarikos eskondidos vimos una puerta avyerta de ande se puediya pasar ande me las keriya yevar : El Klub privado muy alavado Istanbul Yelken Kulubu – El Klub de las velas de Istanbul ! (Teniya muy flakas shanses de entrar por la grande puerta ma salir es siempre fasil !)

Entrimos aya otra vez de vanda de la mar i de las pisinas….Ke aventura ! Komo la duenya del lugar, ize aparejar muestra meza en la guerta maraviyoza del klub. El tiempo estava maraviyozo. Era de noche i aviya muncha gente. A mi sorpresa vide ke lo mas de las personas teniyan muestra edad.

Las komidas estavan ekselentes i el servisyo tambiyen. Estuvimos aya batante de tiempo…Lo ke puidimos riyir Dio miyo ! Ma ya estavamos muertas de kanserya ! Un taxi las yevo a la parte europeya de Istanbul a
sus hotel i un otro al kalmo de mis kantones.

….. Oy me arepozi. Daniel la tomo a Lili a los muzes los palasyos. Mis amigitas se arepozaron i kaminaro serka en sus lugares. Las vere aminyana. Ya me eskarinyi muncho ! Esta noche me parese ke se van a ir a Kumkapi. Al lugar de los pishkadores ande ay munchos restorantes kon muzika alegre i los gitanos baylando i kantando. Ke pasen una tadre muy ermoza… Ke tadre ke se izo ! No durmi dayinda ma durmi el diya entero ! Otras unas kuantas oras mas me vo ir ande eyas i me las vo yevar a la kula puedeser 🙂
Al antiko bario judyo ke se izo el Montmartre (Paris) de Istanbul. Oy se estan tornando a Israel…Ke pekado… Ma esto sigura mos vamos a ver mas… Puedeser ke Esther va vinir en Oktobre ande mi 🙂

Espero ke en kontando todo voz di un poko del plazer muestro. Esto era mi entisyon.

[email protected]