Diario Judío México - Ken de entre mozotros no se akodra kon deskarinyo de los djogos ke djugava en su chikez, solo o djuntos kon sus amigos, en la eskola, en kaza o mizmo en la kaye o en los kampos. El problema es ke estos djogos en sus mayoria ya son parte de la istoria i los chikos de oy no los konosen i si mizmo los konosen tienen nombres diferentes.

Komo parte de muestro esforso para la rekuperasion de muestro folklor (ke inkluye no solo kuentos, kantes, refranes i uzos sino ke djogos i otras aktividades mas) bushkaremos a traer aki una deskripsion de djogos de los kualos mos akodramos o ke ya fueron dokumentados por otras personas.

Esperamos ke este sera el empesijo de un proyekto mas grande ke podremos kompletar kon el ayudo de muestros lektores i kolaboradores tambien. Agradesemos, a este sujeto, el muy importante lavoro de la muzikologa i folklorista Dr. Shoshana Weich Shahak, tal ke se reflekta en su livro “El repertorio tradicional i infantil sefardi”.

Kastiyikos (Bulgaria)

Se meten tres muezes una al lado de la otra i ensima una muez mas, kreando ansi el “kastiyo” ke los djugadores bushkavan a derrokar, echandole d’enfrente una muez mas grande. La viktoria naturalmente era del ken reushia a derrokar el kastiyo i ke tomava entonses las muezes para si.

Unotra version de este djogo era de meter las muezes en una fila, i aki kada djugador echava a su torno una muez bushkando a aharvar las ke estavan en la fila i si reushia, podia tomar para si las muezes del lugar ke fue tokado i asta la fin.

Palikos (Chelik-chomak. Turkia, Gresia i Bulgaria)

En este djogo avia un paliko chiko ke era metido sovre una piedra de manera ke una parte del palo depase a la piedra. Kon otro palo mas grande se dava una dada a la punta libre del paliko, aziendolo saltar en el ayre i dandole entonses una otra dada ke lo echava bastante leshos. La viktoria era del djugador ke reushia a echar su paliko mas leshos ke los otros.

Bilyas

Avia bilyas de barro, de vidro i de fierro. Una manera de djugar era de meter una bilya en basho i de una sierta distansia bushkar a darle kon otra bilya lansada kon el pulgar. Otro djogo de bilyas era de kavar un foyo serka la pared i de una sierta distansia echar un punyado de bilyas, bushkando a azer entrar en el burako el mas grande numero posible.

Azno grande

Se djugava entre dos ekipos de kuatro chikos kada uno. Un ninio de estos grupos se metia apegado kon la kara a la pared i los otros tres se metian en fila, abokados detras de el, formando ansi el “azno grande”. Los ninios del otro ekipo devian saltar sovre el azno grande i si reushian a kedar sovre el sin kayersen, ganavan i puedian tornar a saltar una vez mas. Si uno de eyos kayia era el torno de este ekipo de ser el azno grande.

Endevina ken te dio

Tres o kuatro o mas ijikos se metian al deredor de uno ke estava kon la kara tornada, de manera ke no pueda verlos. Uno de los ke estavan detras le dava una dada i entonses le demandavan “Endevina ken te dio?” Si reushia a endivinar, era el ke dio la dada ke tomava su lugar i devia resivir las dadas, asta ke el tambien endevine ken lo aharvo.

Manos kaentes

Dos chikos, uno enfrente del otro, espandian sus manos, el uno kon las palmas para ariva i el otro kon las manos sovre las del amigo. El ke tenia las manos debasho, bushkava a aharvar la mano del amigo antes ke este tenga tiempo de ver de onde esta viniendo la dada i travar su mano, para ke no le venga la dada.

Jeneralmente el ke tenia las manos debasho reushia a aharvar las manos del otro mas de una vez, de manera ke en algunos lugares este djogo era yamado “friir” porke las manos aharvadas se azian kaentes i tuyidas. Si el ke tenia las manos enriva reushia a travarlas antes ke fueran aharvadas, el ganava i venia su torno de bushkar a aharvar las manos de su kompanyero.

 

Bibliografia

– Usos y Cosumbres de los Sefardies de Salonica. Michael Molho, CSIC, Madrid
– Repertorio Tradicional Infantil Sefardi Susana Weich-Shahak Compañia Literaria, Madrid