En un artikolo de la Sra. Liora Goldberg, publikado en el Jerusalem Post, jurnal en lengua ingleza ke aparese en Israel, eya mos trae la eksperiensa muy esmoviente i inolvidavle ke tuvo durante sus vakansas en la izla de Zakintos. Este artikolo fue publikado tambien en el foro Ladinokomunita. en la Internet.
La izla de Zakintos, konosida tambien por su antiguo nombre italiano Zante, es una de las Izlas Ionikas i se topa al Oeste de Gresia i al Sud de las izlas de Corfu i Cephalonia.
Sinagoga de Zakintos.
A la yegada a su destinasion, Liora akompanyada de su padre, se enkontra kon la patrona de kaza, una kazalina grega de la kuala avia alkilado dos kamaretas para sus estadia en la izla. Es kon grande plazer ke eya les amostra las kamaretas ansi ke la kuzina kon todos sus ustensiles.
Liora eksplika a la mujer ke eyos no uzaran sus platos por razones de relijion i ke eya trusho sus propios platos de Israel. La patrona de kaza, ke nota tambien ke el padre de Liora tiene una kipa sovre la kavesa, les demanda de akompanyarla a la guerta ande se espande delantre de eyos un panorama maraviyozo dando sovre la mar. La grega les demanda de mirar de la otra vanda tambien asperando ver sus reaksion. “Aki estamos viendo arvoles i komo algunos dientes blankos entre eyos” dize el padre de Liora. “Este es el simeterio djudio i los dientes blankos son las tombas de los djudios ke fueron enterrados ayi”, les responde la patrona de kaza.
Al dia de despues i sin piedrer tiempo, Liora va al simeterio sovre la puerta de entrada del kual ve kon emosion un Magen David. El simeterio ke se espande sovre una ancha superfisia estava bien entretenido kon sienes de tombas ke datan desdel siglo 16 asta el anyo 1955. Sovre algunas de las tombas avia chikas piedrizikas, lo ke endika ke eyas fueron vijitadas ultimamente.
Tombas
El anyo 1955 atira la atension de Liora. Saviendo la triste istoria de los djudios de Gresia ke bivian en las sivdades de Saloniko, Atena, las izlas de Rodes, Corfu i mas, kaji todos de entre los kualos fueron deportados a los kampos de eksterminasion, en la II Gerra Mundiala, komo puede ser, se demanda eya, ke aygan tombas kon esta data si ya no avian kedado mas djudios en todos estos lugares desde 1944?
Liora bushka al guardiano del simeterio ma siendo ke el savia solamente el grego eya desida de enkontrrase kon el mayor de la izla ke le demanda si ya vijito el kal de la sivdad. Frente a su demanda si ainda ay ayi un kal, el mayor le da el adreso. En la kaye prinsipal, en el sentro de la sivdad, entre dos edifisios, eya se topa enfrente de una puerta semejante a la del simeterio kon un arko de piedra ensima del kual avia la skultura de un livro avierto kon la inskripsion: “En este lugar santo se topava el kal Shalom. En el terretemblo ke tuvo lugar en 1953 los antiguos Sifre Tora fueron kemados.”
A traves de la puerta ke estava serrada eya ve las estatuas de dos ombres kon barvas largas. Al prinsipio le parese ke estas eran statuas de dos hahamim, ma meldando la inskrispion sovre la pared eya entiende bien presto su yerro. Ayi estava eskrito: “Esta laja fue fiksada en sinyo de agradesimiento de los djudios de Zakintos al mayor Karrer i al ovispo Chrysostomos.”
Liora torna andel mayor para desifrar la enigma de estas dos estatuas i saver de kualo se tratava. Eya resive la sigiente repuesta:
En el 9 de septembre de 1943 el governador alman Berenz demanda del mayor Loukas Karrer la lista de los nombres de todos los djudios de la izla. Karrer va andel ovispo Chrysostomos afin de akonsejarse kon el i los dos desidan de refuzar esta demanda, provando de konvenser a Berenz ke los djudios ya biven desde largas jenerasiones en esta izla, ke eyos no kavzan danyo a dinguno i ke seria una piedrita para Zakintos i sus moradores gregos si eyos serian deportados. Ma siendo ke el governador Berenz insiste en su demanda, eyos le dan una lista kon solo dos nombres: Ovispo Chrysostomos i Mayor Kerrer.
Entremientres, no saviendo kual sera el destino de los djudios de la izla, los abitantes gregos empesan a eskonderlos en kazas de kristianos en las montanyas; ma en fin de kuento el orden de deportasion fue anulado por los nazis. En 1944 los almanes se van de la izla i los 275 djudios ke bivian ayi son salvados grasias a estas dos personas ke riskaron sus vidas para no permeter ke fueran deportados a los kampos de eksterminasion.
En sinyo de agradesimiento por el koraje ke tuvieron los gregos de la izla durante la Shoa, la komunidad djudia avia aregalado vitrajes a la iglezia San Dyonissios.
En segito a un terretemblo ke tuvo lugar en Zakintos, en 1953, la malle djudia i sus dos kales de mizmo ke otras partes de la sivdad, fueron destruidos kompletamente. Kurto tiempo despues de este dezastre los 38 djudios ke avian kedado ayi pasaron a bivir a Atena. Otros ya avian deshado la izla ainda en 1947, aziendo sus aliya a Erets Israel.
En 1978 Yad vaShem onoro al ovispo Chrysostomos i al Mayor Karrer kon el titolo de Djustos entre las Nasiones.
El ultimo djudio de la izla, Ermandos Mordos, murio en el mez de marso 1982 i fue enterrado en Atena. De esta manera yegaron a sus fin los sinko siglos de prezensia djudia en Zakintos.
En 1992 la Organizasion de los Djudios de Gresia alevanto dos estatuas de marmol, en el mizmo lugar ande se topava el kal, en memoria de estos dos Djustos entre la Nasiones.
Artículos Relacionados: