Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Vos akodro ke agora las emisyones de Radio J se pueden oir sovre internet. Mi emisyon se puede oir en direkto sovre el sityo de Radyo J . Antes vos diziya ke se puediya oir tambyen kuando se kyere, indose al kavo de la redifuzyon de la emisyon del djueves a la tadre. Ama no se deke, agora no ay mas redifuzyon desde el 26 de oktovre pasado. Si trokan las kozas vos diré.
De otra parte, vos akodro tambyen ke el proksimo atelye de konversasyon de Vidas Largas se va tener el martes 15 de desyembre, de las dos a las kuatro, en el Centre Communautaire. Estos atelyes son avyertos a todos, venid munchos.
Antes de empesar mi emisyon de oy, vos tengo de dar un haber ke puede ser vos va interesar: el haham Sergio Bergman, nasido en Argentina en 1962, lo ke kyere dizir ke es aedado de 53 anyos, diplomado de la Fakultad de farmakiya i biokimika de Buenos Aires, haham del kal de la Kongregasyon israelita de Argentina, deputado desde 2013 a la Asamblea Nasyonal arjentina (ande era opozado a los Kirchner) vyene de ser yamado por el Senyor Mauricio Macri, muevo prezidente de la Republika Arjentina elijido el 22 de novyembre, komo ministro del Ambyente i del desvelopamyento sostentable de la Nasyon.
Un haham ministro de un governo afuera de Israel, yo nunka konosi…djudyos sufus, si, por egzemplo en Fransya Lionel Stoleru, ama haham nunka oyi.
A parte de esto, syertos amigos me demandaron de traervos una koreksyon i un komplemento a lo ke dishe en mi emisyon de la semana pasada.
En primero vos aviya dicho ke por una vez, los terroristos del 13 de novyembre no se atakaron espesifikamente a djudyos. Mi amigo Renaud Souhami me akodra ke el Bataclan pertenesiya desde muncho tyempo a djudyos, i mizmo si es vedra ke agora lo teniyan vendido i dunke no eran mas proprietaryos, se kedaron dainda para dirijirlo. Es vedra ke uvo munchas manifestasyones djudiyas i syonistas en el Bataclan, i dunke no es imposivle ke los terroristos tengan aharvado el Bataclan por esto.
En kuanto a mi amigo Jose Molho, me demando el tambyen de akodrarvos ke, si es vedra ke munchos papas se atakaron a los djudyos de sus estados, yene keriyan tener al lado de eyos a un mediko ke sea djudyo…Por egzemplo, i sin avlar de los medikos de los papas fransezes, Geronimo de Santa Fe, de su haliz nombre Yoshua Laborki o Lurki, fue el mediko del papa Benedikto XIII en los anyos 1400 (ama, para dizir la vedra, komo se konvirtyo i lucho kontra el djudesmo, no se si ya era mediko del papa kuando era dainda djudyo). No tengo la misma shupe por lo ke es de Amatus Lisitanus, mediko djudyo de orijen portugeza ke fue yamado en 1550 por el papa Julyo III para kurarlo de la gota.
Esto dicho, agora tengo de kontinuar la istorya de los djudyos de Italya, ke aviya empesado el djueves pasado i ke tuve de deshar en el siglo 18, por manko de tyempo.
Vos estava avlando, kuando tuve de desharvos, sovre la venida, en 1796, de la armada franseza kon Bonaparte ke trae la libertad a los djudyos italyanos. Las puertas de los ghettos son arrankadas i kemadas, ya vos aviya kontado esto kuando ize mi emisyon sovre Napoleon i los djudyos.
Basho el reyno de Napoleon, el imperyo franses inkluye la parte oeste de Italya asta Roma, i por esto djudyos de lo ke es agora Italya ama ke era Fransya en estos tyempos van a partisipar a la Asamblea de los Notavles i despues al Gran Sanhedrin. Van a ir aya el haham Abraham Vita de Cologna o Avraham Tedesco, merkader veneziano. Sino la parte norte de Italya, yamada reyno de Italya, va a Eugène de Beauharnais, ijo de Joséphine, primera mujer de Napoleon, i la parte sur, yamada reyno de Napoli, va a Murat, kunyado de Napoleon.
Malorozamente para los djudyos de Italia, Napoleon i los de su famiya (Eugène de Beauharnais al norte i Murat al sur) son echados afuera de Italia en 1815, i los djudyos pyedren de muevo la libertad.
Esto dicho, la Italya de este tyempo no se aze un estado uniko, a la kontra son un alay de syete estadikos independyentes los unos de los otros: al norte oeste, el reyno de Pyemonte ke inkluye la Sardenya, ama tambyen la Savoie i Nice. Al norte este, el reyno Lombardo Veneto, ke va de Milano a Venezia. Un poko mas al Sur, Parma, Modena i la Toscana, i el grande estado del papa ke va de Roma asta Ferrara. I enfin, al sur, el reyno dicho de las dos Sisilyas, kon la Sisilya i todo el sur del botin.
La situasyon de los djudyos no es la misma asigun el estado ande se topan.
En el Piemonte, en 1848, el rey Carlo Alberto da la libertad a los djudyos komo eran basho Napoleon, i por siguro los djudyos son tresalidos: ya vos konti la istorya de la Mole Antonelliana, kuando los djudyos de Torino kijeron fraguarse un kal muevo ke vyeron suvir tan alto (mas alto ke el Duomo kon la mortaja) ke se espantaron, i desharon el kal a la Sivdad de Torino ke les dyo en kambyo un terreno para fraguar un otro kal mas chiko!
En el mismo tyempo, en Venezia, la republika dicha de San Marco, ke no va surear mas ke unos kuantos mezes kontra el poder austriako, va ser dirijida por Daniele Manin, ke no se yamo syempre Manin, syendo ke nasyo djudyo kon la alkunya Medina, lo ke poko saven ke moran en Paris rue Manin. Es despues ke se konvirtyo al katolisizmo. En el governo de Manin, el ministro de las Finansyas i de la Posta es un djudyo, myembro de la Fraterna Generale Israelita, Isacco Pesaro Maurogonato.
Ama en los estados del papa, las kozas son diferentes: el echo Mortara, ke ya konti aki, empeso en 1858 en Bologna, i malgrado los esfuersos de todos, inkluyendo Sir Moses Montefiore, ama tambyen los emperadores franses i austriako, el chiko Mortarara, arrovado por la Iglesya a sus padre i madre, kedo kristyano i se izo papas. Nasido en 1850, se muryo a la edad de noventa en 1940, kijo dizir papas i kristyano dos anyos despues de las leyes fascistas antisemitas de 1938.
Ama, a poko a poko, el papa va pedrer su territoryo, i el Piemonte a la kontra va inkluir la Italya kaji entera. Esto se yama el risorgimento, al kual an lavorado Garibaldi i Cavour.
En todo kavzo, este risorgimento va traer la libertad a todos los djudyos de Italya, ke tresalidos, van a aprovecharla i entrar en politika.
Un militar komo Giuseppe Ottolenghi va ser el primer djudyo en el Estado Mayor de la armada italyana, i despues ministro de la Gerra entre 1902 i 1903.
Los djudyos van a dar despues dos primos ministros, el uno Sidney Sonnino en 1906 i 1910. Para dizir la vedra, solo su padre era djudyo, i el tomo la relijyon anglikana de su madre ingleza.
El sigundo era un haliz djudyo yamado Luigi Luzzatti, ke fue primo ministro djusto despues de Sonnino, entre marso 1910 i marso 1911, despues de tener sido munchas vezes ministro.
Entremyentres, entre 1907 i 1913, el mayor de Roma es tambyen un djudyo: Ernesto Nathan. En 1915, a los 70, es veluntaryo para entrar en la armada i sirve komo lugartenyente de infanteriya.
Entre los djudyos italyanos kale nombrar tambyen el pintor Amedeo Modigliani, afillu si de su tyempo no fue tanto rekonosido. Vino a ser famozo komo pintor, i no solo komo borrachon, solo despues de su muerte en Paris en 1920, a los 36.
No kale olvidar tampoko a eskrivanos komo Samuel David Luzzato (ke tampoko no kale konfundir kon Simone Luzzato, del kual dishe dos byervos el djueves pasado, ni kon Moshe Haïm Luzzato, autor del Mesilat yesharim, el kamino de los djustos). Este Samuel David Luzzato eskrivyo muncho, tan en ebreo komo en italyano, i es konsiderado komo uno de los padres de la wissenschaft des judentums (la syensya del djudesmo).
No kale olvidar tampoko a Elie Benamozegh, filozofo nasido i muerto en Livorno, ama de paryentes marrokis. Defensor de la kabala, mete sovre todo el aksento sovre el karakter universalisto del djudesmo, sovre todo en su livro intitulado Israel i la humanidad. Tuvo una grande influensa sovre un autor katoliko franses, Aimé Pallière.
A kada vez ke los djudyos de Italya an ganado la libertad , la igualidad i la sivdadaniya, kijeron alavar al Dyo i fraguar kales monumentales. Uno de los mas ermozos, a lo manko asigun mi ke no los konosko todos, es el kal de Firenze. Por siguro es mas modesto ke el Duomo, ama yene se ve de muy leshos ke merese de ir a vijitarlo.
Lo ke se paso despues esto todo es la yegada de Mussolini al poder en 1922. Oy no me vo apezgar sovre lo ke fue la situasyon de los djudyos durante el fascismo, porke ya avli de esto en dos otras emisyones miyas, los 30 de marso i 7 de avril 2011: la primera se yamava Okupasyon italyana , i la sigunda Mussolini i los djudyos.
En dos byervos, vos kyero solo akodrar ke al empesijo, Mussolini no se amostro antisemit, ama despues, kon la venida de Hitler a verlo en Roma en 1938, empesaron las leyes antisemitas i el aferramyento de djudyos en kampos. Ama estos kampos no eran kampos de muerte.
Kuando empeso la gerra i ke la armada italyana konkisto territoryos ande aviya djudyos, no solo no toko a los djudyos, ama a la rovez los protejo kontra los Almanes o sus kolaboradores, komo los fransezes, por egzemplo.
Ya konti aki komo tres kapos italyanos obtuvyeron de Mussolini, en marso 1943, ke la armada italyana kontinue de protejar a los djudyos kontra los Almanes i fransezes ke le demandavan de darselos.
Las kozas trokaron kuando los Almanes entraron en Italya i aharvaron a los djudyos, ayudados esta vez por un Mussolini aflakado.
Asigun los shifros ke meldi sovre internet, fueron serka de 6.800 los ke fueron deportados, i entre eyos unos 5.800 se muryeron, asasinados pishin o a poko a poko. Entre los 1.000 ke aboltaron, el famozo Primo Levi.
Unos 35.000 djudyos s’eskabuyeron de la deportasyon, unos 29.000 eskondyendosen en sivdades i kampanyas ( i para esto el ayudo de kristyanos italyanos era nesesaryo) unos 500 fuyendosen en Italia del sur, ande ya estavan los Amerikanos, i unos 5.500 fuyendosen en Suisa. Entre eyos todos uvo unos 2.000 djudyos ke partisiparon a los kombates de la Rezistansya.
Vos konti aki tambyen, en una emisyon sovre la Brigada djudiya, komo los kazalinos de un kyöyiziko yamado San Nicandro, ke aviyan segido a uno de entre eyos yamado Donato Manduzio ke se aviya echo djudyo de si para si sin saver ke los djudyos dainda egzistiyan, se enkontraron en 1944 kon una araba de la Brigada djudiya, i deskuvrieron ke aviya djudyos, i ke se puediyan ir en la Tyerra prometida, lo ke izyeron despues de la gerra. Agora biven en Israel.
Despues de la gerra, el djudesmo italyano se topa muy aflakado. En mas de los muertos de las deportasyones, ay munchos ke se van en Israel. Es vedra ke de otra parte, ay unos 2.000 djudyos venidos de Libya, ke vyenen a morar en Roma, ande fraguan kal muevo, en Milano i Livorno.
Asigun lo ke meldi sovre Wikipedia, lo mas de los djudyos italyanos son agora en Roma i Milano. Pokos nasimyentos, munchos kazamyentos mikstos. Yene ay dos yeshivot, una en Roma, la otra en Torino.
Los djudyos de Italya, eyos tambyen, fueron aharvados por el terrorismo:
El 9 de oktovre 1982, attako kontra el kal de Roma por un grupo de Palestinyanos: 37 firidos i un bebiko muere. Los Gregos aferran a uno de los asasinos i los Italyanos lo demandan a los Gregos para djuzgarlo, ama los Gregos eskojen, en vez de darlo a los Italyanos, de darlo a…Khadafi. Ashkulsun Gregos…
En oktobre 1985, los Palestinyanos toman el vapor Achile Lauro i echan a la mar un povereto de djudyo kon su fotolyo de invalido. Ashkulsun Palestinyanos…
El 27 de desyembre 1985, los Palestinyanos de Abu Nidal atakan al stand El Al del aeropuerto de Roma, i matan a 16 personas i azen 99 firidos. Ashkulsun Abu Nidal…
A la kontra de estas matansinas por los arabos, las kozas se enderecharon muncho kon los Papas. Keda, por siguro, la kuestyon del Papa Pio XII ke reusho a pasar la gerra entera sin ke a dingun momento el byervo djudyo salga de su boka, i sin ke avle de las matansinas ke konosiya.
Ama despues kale avlar del grande papa Giovanni XXIII, grande amigo de los djudyos, ke konvoko el Konsilyo Vatican 2, ke se eskapo despues de su muerte. Ama grasyas a el, el Konsilyo voto en 1965 la deklarasyon Nostra aetate, ande los katolikos abandonan la akuzasyon de deisido kontra los djudyos.
El 13 de avril 1986, el papa Giovanni Paolo II se fue en el kal de Roma. Es siguro ke las kozas trokaron desde el echo Mortara i despues de la kayadez de Pio XII.
Despues de Giovanni Paolo II, el papa Benedikto XVI tambyen se fue al kal en janvier 2010, i meldi aze muy poko ke el papa Francisko, el tambyen, a dicho ke teniya la entisyon de ir al kal el 17 de janvier ke vyene. Agora vino a ser un uzo. Si las kozas kontinuan ansina, un diya se van a azer djudyos, kyen save…
De otra parte, los djudyos de Italya se espantan de ver un antisemit komo Beppe Grillo formar el sigundo partido politiko de Italya, kon mas de 25% de las bozes.
Vos akodro syertas palavras de Beppe Grillo, komo por egzemplo: “Syerto Hitler era un loko hazino, ama su idea de eliminar a los djudyos era de eradikar sus diktatura finansyara”. Oyendo esto, se puede entender el espanto de los djudyos italyanos.
Ke va salir de esto todo, el tyempo lo dira. Entremyentres, vos digo: al djueves ke vyene si kyere el Dyo!
Edmond Cohen
Paris – Fransya
Artículos Relacionados: