Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Ya aze un syerto tyempo ke no vos avlo de muestros atelyes de konversasyon de la asosyasyon Vidas Largas, syendo ke dainda no empesaron por este muevo anyo. Estamos lavorando sovre syertos trokamyentos. Vamos a aprovar de azer agora muestros atelyes en diya de martes en vez de djueves, i por esto kale topar otro lugar porke el centre communautaire no tyene lugar para mozotros un martes. Si kyere el Dyo vos dare mas haberes el djueves ke vyene.
De kualo avlarvos oy ? La negra muerte de Kadhafi me parese una buena okazyon de avlar de la Libiya i de sus djudyos, kale dizir de sus djudyos pasados, porke agora no ay ni un djudyo ke biva en Libiya.
Ama antes kyero dizir unos kuantos byervos sovre Kadhafi i su muerte. Ya vitesh ke mismo si son los Libyanos eyos mizmos ke mataron a Kadhafi, fueron ayudados por las nasyones oksidentales, inkluyendo la Fransya, ke se apersivyeron ay unas kuantas semanas ke Kadhafi era un diktator.
Asta unos kuantos mezes, Kadhafi, ke por tanto era al poder desde 42 anyos, no era malo. Al kontraryo: Berlusconi le bezava la mano, Tony Blair la kara, i Sarkozi le metiya tapet kolorado i lo arresiviya syete diyas basho su tyenda, en un palasyo al lado del suyo.
Kadhafi tomo el poder en 1969, i poko tyempo despues, la Fransya, ke aviya metido embargo sovre las armas verso Israel, afillu los 50 avyones vendidos a Israel i pagados, vendyo 110 avyones a Kadhafi. Los djudyos protestaron, i Pompidou, prezidente de Fransya, les respondyo a la Televizyon kon una formula de los telefonos: « No ay abonado al numero ke demandatesh ».
Estos avyones vendidos a la Libiya kombatyeron al lado de los ejipsyanos en la gerra de Kipur, i un ministro franses, kreo ke era Joseph Comiti, no topo otra koza de dizir ke: « Ke keresh, no puedemos meter un djandarma detras de kada avyon ! »
Kuando el Prezidente Reagan, en 1986, kijo bombardar a Tripoli para kastigar Kadhafi de tener matado kon una bomba a askeres amerikanos en Almanya, la Fransya no dyo otorizasyon a los avyones amerikanos de bolar ensima del territoryo franses.
En rengrasyamyento de todo lo ke la Fransya izo para el, Khadafi izo meter tres anyos solo despues, en 1989, una bomba en un avyon sivil franses, matando a 170 personas, sovre kualo en 2003 la Komisyon de los derechos umanos de la ONU tomo komo prezidente a la Libya, por 33 votos, kontra solo 3 (Estados Unidos, Canada i Nicaragua). 17 paizes se abstuvyeron, entre los kualos los paizes de Evropa, inkluyendo la Fransya. No tengo menester de dizir ke Israel no pudo votar, syendo ke nunka pudo entrar en esta komisyon ke pasa todo su tyempo a kondenar Israel, i kaji solo Israel en el mundo. Kreo ke es bueno de akodrar esto a la radyo, porke a parte de mi no lo oygo akodrar muncho por los gazeteros ni a la radyo ni a la televizyon fransezas. No saviya yo ke teniya tan mijor memorya ke los gazeteros fransezes…Solo sovre internet meldi ke el direktor egzekutivo de la asosyasyon UN Watch disho ke la ONU devriya demandar pedron por tener tan alavado a Kadhafi, metyendo la Libiya al Konsilyo de Seguridad en 2008-2009, i Prezidente de la Asamblea Jenerala en 2009. Ama…Komo se yama este direktor ke se kesha? Hillel Neuer…
Esto dicho, aboltaremos a la muy larga istorya de los djudyos en Libiya.
La primera koza ke sea una prova ke aviya djudyos en Libiya es un mur topado en la sivdad de Cyrene, una sivdad muy antika ke se topa al bodre de la mar entre Benghazi i Tobruk, i ke dyo su nombre a la provinsya de Cyrenaika, al este de la Libiya, no leshos de Ayifton. Este mur esta eskrito en ebreo, al nombre de un Avidiyu ben Yashav. No se save kon presizyon de ke tyempo es, ama a lo manko entre el diezen i el kuatren siglo antes del Kristo.
Flavius Joseph mos dize ke aviya djudyos en Cyrene en el trezen siglo antes del Kristo, kijo dizir en los anyos dozyentos i piko, del tyempo de los Ptolemeos en Ayifton. Es el rey Ptolemeo Iero ke demando a los djudyos de Ayifton de irsen aya. Syen anyos mas despues, es un djudyo yamado Jason de Cyrene ke eskrive un livro ke va ser rezumado despues para ser el sigundo livro de los Makabim.
La prova ke aviya djudyos en Cyrene mas tadre, del tyempo del Kristo, la tenemos tambyen kon Simon de Cyrene, el djudyo ke tuvo de yevar sovre sus ombros la kruz del Kristo yevado al suplisyo.
Ama esta toda komunidad fue matada por los Romanos kuando uvo las rebueltas djudiyas de 115-117 en Ayifton, ama tambyen en Cirenaika.
Kedavan solo djudyos en Tripoli, kuando en 642 yegaron los arabos ke konkistaron la Libiya sovre los Romanos de Oryente. Los djudyos pueden guadrar sus relijyon, ama son dhimmis. Ay djudyos en Tripoli, ama tambyen karaitos en el Djebel Nefussa, al sud-oeste de Tripoli. I los djudyos de Tripoli van de muevo morar en Benghazi.
En 1510, los Espanyoles toman Tripoli, i kon eyos vyene la Inkizisyon. Los djudyos se fuyen en el Sur, ama despues vyenen los Turkos osmanlis en Cirenaika ien 1517 i en Tripoli en 1551, lo ke permite a los djudyos de kedarse en Libiya. En 1571, el haham Shimon Ibn Lavi, venido de Fes en el Maroko, eskrive en Tripoli el Ketem Paz, komentaryo del Zohar, el livro de la Kabala.
En 1711, la povlasyon de Tripoli aze 14.000 personas, un kuarto es djudyo. Vyenen merkaderes djudyos de Italia, i de manera mas jeneral los djudyos de Libiya azen komersyo internasyonal.
En el siglo 19, los djudyos de Libiya aprovechan las reformas osmanliyas de los Tanzimat ( las reformas en turko) ke a poko a poko los liberan de la kondisyon de dhimmis, en Tripoli sino en todo el pais.
Ama en 1911 vyenen los Italyanos. En 1924 govyernan a la Tripolitanya, i en 1932 a la Cirenaika. Los Muzulmanos se syenten umilyados por la venida de los Italyanos. Al kontraryo, los Djudyos se alegren de la venida de los Italyanos ke les da los mismos derechos ke los muzulmanos.
I tambyen los djudyos se interesan al syonismo. Ama en 1922 vyene Mussolini al poder. Al empesijo, no ay antisemitismo, ama despues, kon la influensa de los Almanes, Mussolini va azer las leyes rasistas en 1938. El governador de Libiya, Italo Balbo, no es antisemit, ama yene ovliga los merkaderes djudyos de avrir sus botikas diya de shabbat, i los ke no kyeren son asoteados (fouettés) en puvliko.
I vyene la gerra i los bombardamentos. El 12 de fevrero 1942, los Almanes entran en Tripoli ; Mussolini otoriza las deportasyones. 300 djudyos de nasyonalidad ingleza son embiyados en kampos italyanos i despues en kampos almanes. Los almanes kyeren tambyen aferrar los djudyos libyanos ama los italyanos no achetan de darles los djudyos. Los guadran para kampos de lavoro en Libiya, komo fue para el padre de muestro amigo Eddy Levy, nasido en Tripoli, ke me ayudo para azer esta emisyon.
Los djudyos de Benghazi van a ser liberados un tyempo por los Inglezes, ama Rommel vyene despues, i los Italyanos arravyados kontra los djudyos ke aviyan sido tresalidos de la venida de los inglezes, por pizma los embiyan en un kampo de lavoro de Giado, en el djebel Nefusa, ande mueren 564 desmazalados sovre 2.600 djudyos internados.
En 1943, los inglezes, despues de tener ganado la bataya de El Alamein, okupan de muevo el norte del pais, kijo dizir Cirenaika i Tripolitania. Entre eyos ay askeres de la Brigada djudiya de Palestina. Desvelopan aktividades syonistas, myentres ke los arabos empesan a entrar en el nasyonalismo arabo.
En novyembre 1945, un pogrom kontra los djudyos empesa en Tripoli i gana toda la Tripolitanya, sin ke los Inglezes agan muncho para defenderlos. 130 djudyos son matados, mueve kales son kemados 35 sifre tora destruidos.
Vyendo esto, los syonistos de Palestina embiyan djente para ayudar a la povlasyon djudiya, i merkan armas.
En 1948, en relasyon kon la gerra ke se pasa en Palestina, los arabos empesan de muevo un pogrom, ama esta vez, los djudyos son preparados i armados, i se defenden. Vyendo esto, los pogromistos atakan a los djudyos izolados, ke moran leshos de la male djudiya. 14 djudyos son matados, 23 feridos.
En 1949, ay unos 35.000 djudyos en Libiya, entre eyos unos 5.000 en Benghazi i los otros 30.000 en Tripolitanya, entre eyos 22.000 en la sivdad misma de Tripoli. Entre este anyo de 1949 i 1952, los 90% de los 35.000 djudyos de Libiya se van en Israel.
La Libiya obtyene su independensya en 1951, i en desyembre 1952, las otoridades libyanes serran la reprezentasyon israelyana en Libiya. A poko a poko la situasyon de los djudyos de Libiya se va azer mas i mas sekanoza i difisil. Las aktividades djudiyas son serradas una detras de otra por el governo.
Esto todo mos yeva a 1967 i la gerra de los sesh diyas. Kedan unos 5.000 djudyos en Libiya. El 5 de djunyo 1967, primer diya de la gerra, la povlasyon araba ataka a los komersyos djudyos ; diez djudyos son matados, i 60% de los byenes djudyos son destruidos. Entre el 6 i el 9 de junyo, otros djudyos son matados.
Vyendo esto, el prezidente de la komunidad djudiya, Lillo Arbib, demanda al governo ke los djudyos puedan fuir el pais, lo ke es achetado por el governo. La evakuasyon de los djudyos asta la Italya se aze entre el 26 de junyo i el mes de julyo. Unos se van direktamente i pishin de Italya a Israel, otros se kedan en Italya.
Yene kedan manko de 600 djudyos en Libiya kuando Kadhafi toma el poder en 1969. Los desmazalados se ven aharvados, mismo los muertos. Pishin en 1969, la gazeta El Raid, el organo del muevo governo, eskrive: « es un dever imperyozo para las sivdades de Tripoli, Benghazi, Misrata, ets, de azer dezapareser pishin los semetaryos de los djudyos, i de echar los kuerpos de sus muertos, ke mizmo en sus repozo eternal ensuzyan muestro pais, en las onduras de la mar ». I esto es lo ke azen: no solo los semetaryos son destruidos, ama tambyen los puerpos enterrados aya (como izyeron los Espanyoles en espanya del tyempo de la Inkizisyon..78 kales son transformados en meshkitas, o, por el grande kal de Benghazi, en iglesia kopta.
Ama kon esto todo los djudyos ke biven no tyenen derecho de irse de Libiya. Yene, de una manera o dun otra, ya se van, i en 1974, kedan solo 20 en toda la Libiya, i en 2002, kedan solo dos mujeres djudiyas en toda la Libiya.: Esmeralda Meghnagi, ke se muere este anyo 2002, i Rina Debach, ke se va en Italia. Desde este anyo 2002, no ay mas ni un djudyo en Libiya.
Agora, no tengo menester de dizirvos ke este anyo 2011 a visto la kaida de Kadhafi, i la venida al poder de un konsilyo de tranzisyon, ki el diya despues de tener matado a Kadhafi i uno de sus ijos, a deklarado ke la ley de la mueva Libiya seriya la Sharya, la ley islamika.
Los ke pensavan ke ivamos a ver una Libiya demokratika empesan a entender ke estamos dainda muy leshos de ver un pais moderno i demokratiko naser en Libiya.
Los djudyos, eyos, ya lo saviyan de antes, kon la istorya de este David Gerbi, un mediko djudyo libyano bivyendo en Italia, ke penso ke los tyempos aviyan trokado. Se fue solo en Libiya para ayudar i kurar a los feridos de Libiya, yevando in t-shirt ande esta eskrito « I love Libiya ». Se apersivyo ke el grande kal de Tripoli no aviya sido transformado en meshkita, i serviya mas o menos de esyerkol. Rompyo kon martiyo la pared ke serrava la puerta del kal, i entro kon taleth para dizir una orasyon en medyo de los esyerkoles. Las fotos se pueden ver sovre internet.
Vyendo esto, la povlasyon, no solo de Tripoli, ama tambyen de Benghazi, izo una grande manifestasyon en las kayes kontra David Gerbi, dizyendo ke no ay lugar para un djudyo en Libiya. La sekana fue tan grande ke el povereto de Gerbi fue reembiyado en Italya kon avyon militar.
Unos 2.500 anyos, i puede ser mas, de prezensya djudiya en Libiya, muncho antes de los arabos, s’eskapo en 2002, i el tyempo no vino dainda para ke las kozas troken.
Muestro amigo Eddy Levy me konto las sufriensas de su famiya, de su vava, arrankada de su pais la Libiya, i ke nunka pudo auzarse a la sivdad de Roma.
Un diya, si kyere el Dyo, lo podre azer venir aki a la radyo para ke mos konte lo ke fue el egzilo de los djudyos de Libiya.
I agora vos desho dizyendovos: al djueves ke vyene, si kyere el Dyo
Artículos Relacionados: