Los djudyos del Yemen (2)

Por:
- - Visto 227 veces

Keridos amigos,

El djueves ke vyene, vo eskapar de avlar a la radyo de los djudyos del Yemen

Los ke van a kerer oirme en direkto lo podran indosen a las 4 h 06 PM, ora de Paris, sovre www.radioj.fr  Kale klikar arriva a la derecha sovre Ecouter Radio J en direct.


I si no es en direkto, abasta asperar un diya o dos, i despues ir a oirme en redifuzyon sovre http://www.radioj.fr/node/145

Saludos a todos
Edmond Cohen Paris Fransya

***

Saludes a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.

Vos akodro ke agora las emisyones de Radio J se pueden oir sovre internet sea en direkto, sea kuando se kyere, kale klikar en el sityo de Radio J, i irse sovre las emisyones de despues de medyudiya. http://www.radioj.fr/node/55

De otra parte, tengo de anunsyarvos ke el proksimo atelye de konversasyon de Vidas Largas se va tener el martes ke vyene, 21 de novyemre, en el Centre Communautaire, a las dos i medya (asta las kuatro i medya – sinko).

I vos akodro, antes de esto, el omenaje al Profesor Sephiha, ke ya vos anunsyi en mi ultima emisyon, i ke se tendra el alhad 19 en el kal de la Roquette.

Esto dicho, ayego a mi emisyon de oy, ke es la kontinuasyon de la ke empesi ay dos semanas sovre los djudyos del Yemen. Vos avli de los djudyos kuando biviyan en el Yemen, me keda agora de avlarvos de la aliya ke izyeron entre 1949 i 1950, i de lo ke se izyeron en Israel.

Kuando vos estava eskapando mi emisyon de ay dos semanas, vos estava dizyendo ke en el Yemen de 1947 las kozas se azen mas i mas sekanozas para los djudyos – komo en los otros paizes arabos, para dizir la vedra. Al lado del Yemen, en la sivdad de Aden, 82 djudyos son matados en un solo pogrom en desyembre 1947 por arabos ke meten el fuego a la male djudiya. Al lado de Aden se topa un kampo ande los inglezes enserraron unos 5.000 djudyos venidos del Yemen i ke keriyan ir por la mar en la Palestina, lo ke les era proibido por los Inglezes. La Adjensiya djudiya va engrandeser este kampo para akojer los djudyos ke pueden fuirse del Yemen. Por esto el kampo es yamado Geula (Salvasyon) por los djudyos. En mayo 1949, el governo del Yemen permite a los djudyos de fuir del Yemen. Kaji todos, kijo dizir unos 45.000, aprovechan esta otorizasyon, entendyendo ke no se save kuanto tyempo va turar. Ama ir a pye a Aden de todas partes del Yemen es una odisea para los poveretos Djudyos kon vyejos i kriaturas, muertos de ambre i de sed, atakados en kamino por bandidos i por ladrones, i ayegando al kampo de la Geula mas muertos ke bivos. Los medikos israelyanos ke se topan en el kampo para akojerlos son espantados de ver en ke hal estan. Afillu si son numerozos, afillu si kale embiyarlos en sekreto por modo de todos estos paizes arabos en gerra kontra Israel, los medikos se renden kuenta ke kale salirlos del kampo lo mas presto posivle i embiyarlos en Israel para ke sean kurados.

David Ben Gurion, Primo ministro de Israel, dechida, kontra el avizo de sus konsilyeros ekonomikos, de organizar un ponte aeryano para traer estos yemenitos lo mas presto ke se puede. Ama kon ke paras? El povereto del Estado de Israel no tyene paras i esta en gerra. Vamos a demandar las paras a los djudyos ajenos, responde Ben Gurion. Djudyos ajenos, en jeneral kyere dizir djudyos amerikanos, numerozos i rikos, organizados en una asosyasyon yamada American Jewish Join Distribution Committee, o, mas kurto, el Joint.

Un diya tendré de azer una emisyon entera para onrar esta organizasyon djudiya amerikana i kontar todo el byen ke izo, sovre todo durante la sigunda gerra mundyala. Vos akodrash puede ser, por las dos emisyonrs ke ize sovre Radigales, konsul de Espanya en Selanik en 1943, ke kuando enfin el governo espanyol acheto de travar de Bergen Belsen 367 djudyos selaniklis embiyados aya por los almanes malgrado ke eran sivdadanos espanyoles, el governo espanyol acheto de traerlos en Espanya, ama por solo tres mezes i kon la kondisyon ke no koste un grosh de gastos al governo espanyol. Es el Joint ke aprometyo de pagar todos los gastos, i ansina se salvaron estos desmazalados, entre los kuales muestro amigo Isaac Revah, ke munchos anyos despues pudo bushkar, ambezarse i kontar la koza, ke valyo a la vez la medaya de djusto al konsul Radigales, i la verguensa al governo espanyol.

Syerro esta paranteza konsagrada al Joint, ke la meresiya mil vezes porke este solo egzemplo ke vengo de dar es una gota en medyo de todo lo ke izo i dainda aze el Joint en favor de los djudyos del mundo entero, i abolto al rolo del Joint en favor de los djudyos del Yemen en los anyos 1948 a 1950.

El Joint da su akodro para pagar el viyaje por avyon de unos 49.000 djudyos, a destinasyon de Israel, pais en gerra kon sus vizinos, i en medyo de esta gerra. No va ser koza kolay. Kale topar una kompaniya de avyones ke achete. Kuala kompaniya va achetar?

Un ombre del Joint se va…en Anchorage, en Alaska, para ver a James Wooten, Prezidente de la kompaniya Alaska Airlines, i le demanda lo ke savesh. Lo mas kuryozo es ke este ombre, savyendo la lokura ke es, acheta. Ama kaliya pishin salir 50.000 $ ke la kompaniya no teniya. Una adjensiya de viyajes atada kon el Joint topa las paras, i el kontrato es firmado: operasyon Kanfe Nesharim (alas de agilas) kon referensya a Shemot XIX, 4: “Vos vistes lo que hize a Egypto, y llevé a vos sobre alas de aguilas y truxe a vos a mi”.

Aki avro una paranteza: Vos meldi la traduksyon del ebreo echa por la Biblia de Ferrara, ande todo esta trasladado al tyempo pasado, i por dizir la vedra, todas las traduksyones, en kualkier lingua ke sea, de este pasuk 4 son al tyempo pasado. Ama si se melda en ebreo, no es tan evidente: el empesijo es: “Atem reitem asher asiti leMitsrayim” i esto es tradusido sin yerro posivle al tyempo pasado: Vos vistes lo que hize a Egypto. Ama despues esta eskrito: “veesa ethem al kanfe nesarim vaavi ethem elaï”. Todos trasladan veesa por “y llevé” ama en vedra esa es al futuro, i devriya meldarse yevaré. De la misma manera vaavi es trasladado “y truxe”, ama en vedra avi es al futuro i devriya meldarse traeré. Deke yene esa i avi son trasladados al tyempo pasado? Porke antes del verbo ay apegado un vav ke se traslada por “y”, ama este vav es yamado vav konversivo porke troka el tyempo, i de futuro el verbo es trokado en pasado. Ya es vedra esta regla en dikduk (gramatika), ama deke en el mismo pasuk empesar por el pasado i pasar despues al futuro kon vav konversivo? I si esta vez el vav no era konversivo? Deke el Dyo diriya al pasado ke los ebreos vinyeron al Sinaï sovre alas de agilas kuando ya saven muy byen ke vinyeron a pye? I si el Dyo avlava en vedra al futuro? El pasuk se podriya meldar sin nada trokar al teksto ebreo: “Vos vistes lo que hize a Egypto, y llevaré a vos sobre alas de aguilas y traeré a vos a mi”. El pasuk no seriya una istorya, seriya una promesa.

A propozito de promesa, ay una profesiya de Yeshayau ande dize al futuro : “Y esperantes Adonay (…) subiran ala komo aguilas…”(XL, 31).

Esto dicho, puedo agora serrarvos esta larga paranteza ke vos avri porke munchos de los djudyos del Yemen no aviyan visto avyon de su vida, i ke es el haham de los Yemenitos ke les disho, mostrandoles el avyon de la aliya: “Estas son las alas de la agila…”

La operasyon se yamo tambyen “marvad akesamim” (el tapet de las maraviyas, el tapet bolando de las Mil i una noches).

La kompaniya Alaska Airlines tomo avyones Douglas DC 4 i Curtiss C 46. El DC 4 era un avyon de la sigunda Gerra mundyala ke puediya bolar a unos 400 kilometros a la ora, kon unos 45 vyajadores a kada vez. El C 46 era un avyon tambyen de la gerra, un poko lo mismo. Los viajadores ya eran 5.000 al empesijo, en Junyo 1948, i se izyeron unos 49.000 (47.000 del Yemen, 1.500 de Aden i unos 500 de Djibuti o la Erytrea)

Estos avyones se establesyeron en Asmara, kijo dizir en Eritrea. Deke? Penso ke era por razones de siguridad, i para guadrar sekreta toda la operasyon, ke empeso en junyo 1948. El estado de Israel no tyene muncho mas de 15 diyas de edad i esta en gerra kontra un alay de armadas arabas. Los avyones son trokados para la operasyon: todas las siyas son kitadas, solo kedan banketas, (detras de las kualas son instaladas haznes de benzina mas, lo ke permite una ora de viyaje mas). De toda manera la djente se asenta en basho, i en vez de 45 viyajadores, kada avyon puede tomar mas del dopyo. Kada avyon vyene a Aden la demanyana desde Asmara, toma los Yenenitos, bola sovre la mar Kolorada asta Elat, el Negev i abasha en Lod, desha los viyajadores, i se va en Kibris, leshos de la gerra i de la menasa de bombardamyento, para arreposar un poko (bolavan 16 oras al diya) antes de aboltar a Asmara i empesar lo todo de muevo.

Entre junyo 1948 i septyembre 1950, en todo 28 pilotos de Alaska Airlines izyeron 380 bolos (asigun una fuente, sovre otra 430 ) para yevar 48.818 refujyados, komo dishe. Por nes, no uvo ni muerto ni ferido. Por tanto, los arabos travaron sovre munchos avyones. Uno de los mijores pilotos de Alaska Airlines se yamava Bob Maguire, ke Ben Gurion yamava el Moshe irlandezo. Un diya Maguire se topo bolando sin benzina, i ovligado de abashar en Ayifton, lo ke, kon la gerra, era muy sekanozo. Maguire disho a los Egypsyanos ke teniya menester de arabas par yevar al ospital vyajadores ke teniyan una hazinura muy kontajyoza. Espantandosen, los Egypsyanos ordenaron a Maguire de irse pishin despues de tomar su benzina…lo ke izo tresalido.

Oy los avyadores de este tyempo ya se muryeron todos, salvo uno, yamado Elgen M. Long, oy aedado de 91 anyos. En el muzeo del patrimonyo djudyo en New York, la organizasyon amerikana proisraelyana StandWithUs remityo a la kompaniya Alaska Airlines el premyo del salvador de Israel, myentres ke la federasyon sefaradiya amerikana remitiya a Long el premyo Maïmonides de la amistad.

Long no era piloto, era navigador. Konta: “Los Yemenitos no teniyan validjas. Ni mismo kalsados. Aviyan kaminado a pye en el dezyerto sovre syenes de kilometros”.

Oy, ay en Anchorage, en el muzeo djudyo de Alaska, una ekspozisyon permanente intitolada: “Sovre las alas de las agilas: la kontribusyon de la Alaska a la operasyon Tapet bolando”.

Estos diyas en New-York, en el mes de oktovre, las organizasyones djudiyas, espesyalmente StandWithUs, izyeron omenaje a la vez a este ombre i a la sosyedad Alaska Airlines. Es un syerto Shahar Azani, administrador de StandWithUs, ke remityo el premyo de salvador de Israel a Alaska Airlines, dizyendo ke el mismo era inyeto de estos djudyos yemenitos, i mismo ijo porke su padre tambyen vino ansina a la edad de tres anyos. I adjunto: “sin vozotros, yo no seriya…No uvyeramos sovrebivido”.

Agora komo biven en israel los djudyos venidos del Yemen? El empesijo fue a la vez una grande alegriya, de salvasyon de una parte, de toparse en tyerra de Tsion de otra parte, ama a la vez fue una epoka bastante dura porke en estos tyempos el estado no teniya ni lavoro ni kaza para los olim ke eran akojidos en maabarot, kijo dizir kampos de tyendas, yelados en invyerno, kemando en enverano… Ama kale dizir ke esto fue la kondisyon de todos los olim, i no solo de los del Yemen. Me akodro de primos miyos venidos de Ayifton, fue la misma koza.

Lo ke es muncho mas negro, es lo ke afito a syertas kriaturas de los Yemenitos. I kuando digo syertos, parese ke fueron miles de kriaturas tomadas a sus djenitores. Una komisyon espesyala de la Kneset, konfirmo el 14 de junyo 2017 ke, entre los 200.000 dokumentos otorizados a la puvlikasyon en el enverano 2016 por el governo (de Netanyau), ay letras ke se embiyaron entre eyos varyos direktores de ospitales felisitandosen de de tener “tanto materyal” en Rosh Hayin, la sivdadika ande se topavan los yemenitos.

Parese ke los medikos izyeron eksperyensas, no se save byen las kualas, ama a lo manko kuatro kriaturas se muryeron i fueron enteradas en sekreto sin nada dizir a los djenitores, i sin ke oy se puedan topas sus tombas.

Tomados sözde para vaksinasyon, entre tres a sinko mil kriaturas dezaparesyeron, i asigun sus famiyas, lo fueron para dar a adoptar a famiyas de ashkenazim.

Dainda todo no se save, ama kon lo ke sale, es siguro ke los djudyos del Yemen no fueron akojidos komo se deve, es lo menos ke se pueda dizir.

Si vos vash a bushkar sovre internet komo se paso, kon los anyos, la integrasyon de los yemenitos, vos yevan solo a esta kuestyon de las kriaturas. I todos los otros? Me parese, kon lo poko ke puedo saver, ke agora los djudyos venidos del Yemen se mesklaron a la povlasyon del pais, se kazaron kon djente de otros lugares. Vitesh, por egzemplo, ke el senyor Shahar Azani vos dize ke su padre vino del Yemen, lo ke da a pensar ke esto no fue el kavzo de su madre ni de sus abuelos de parte de su madre.

Ya vos avli de Shoshana Damari. Ofra Haza, eya, nasyo en Tel Aviv, ama era de famiya yamenita. Keresh otro egzemplo de djudyo del Yemen? Haïm Oshri. Kyen es este? Es el parashutisto a la derecha sovre la famoza foto de los tres askeres mirando el Kotel el 7 de junyo 1967, diya nombrado despues komo Yom Yerushalayim. Ya se ke en fransez se dize ke “una golondrina no aze la primavera”, i ke dos egzemplos no abastan para saver la jeneralidad. Ama kreo ke, a poko a poko, los yemenitos se estan mesklando al kusur de la povlasyon israelyana, sin pueder dar aki una preva syerta.

Esto dicho, los esfuersos para travar del Yemen los pokos djudyos ke kedaron aya no se eskaparon kon la operasyon Marvad akesamim (Tapet de las maraviyas).

El anyo pasado, en marso 2016, la Adjensiya Djudiya reusho la eksfiltrasyon sekreta i de noche de 17 djudyos del Yemen.

Kale saver ke ay gerra sivil en el Yemen, i ke los shiitos Huthis, ayudados por el Iran, i en rebuelta kontra en governo sostenido por la Arabia Saudita, okupan Sannaa, la kapitala del Yemen.

Dainda kedan en Sanaa unos kuarenta djudyos ke no kyeren irse del Yemen malgrado las menasas antisemitas de los Huthis.

Sovre esto vos desho dizyendovos: al djueves ke vyene si kyere el Dyo!

Edmond Cohen
Paris Fransya

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: