Diario Judío México - LA EMIGRASYON SEFARADI I

Al siglo 16, muy munchos Judyos ekspulsados de Espanya se installaron en los Payizes Bashos i en Belgika. Munchos Cripto-Judyos empesaron a implantarsen en Anvers a la fin del siglo 15. Unos de estos prosperaron al punto de integrarsen kompletamente a la aristokorasiya Flaman, komo los Rodriguez de Evora.
Empesaremos muestro viaje kon Sefarad, la Peninsula Iberika.

ESPANYA
Asigun la tradisyon, los Judyos moraron en Espanya del tiempo del Rey Salomon (en el siglo 10 antes de la Era Komun) ma pruevas historikas datan del tiempo de los Romanos. Se topo en Adra, en el Sud, no leshos de Almeria, la piedra de una tomba antigua del siglo 3.

EL tiempo de los Wizigothes, en los siglos 6 i 7 fueron dezgrasyados. Masakros, ekspulsyones… El Judaizmo Iberiko kuaji dezaparesyo….

El konkerante Arabo en 711 fue resivido komo un salvador. En la Edad Medya, eksepto en el tiempo de los Almohades, en el siglo 12, son los Judyos, los Kristyanos i los territoryos ke azen la grandor de Espanya. Es de este tiempo ke es konosida komo Sefarad.

Granada kayo el primo de Enero 1492. Isabella de Castillia (1451-1504) i Fernando de Aragon, los Reyes Katalikos sinyan el infamo Edito de Ekspulsyon de los Judyos el 31 de Mayo 1492. Se les da solamente tres mezes para salir del payis. Es el “gerush”, una katastrofa. Serka de 300 000 almas deshan sus tierras… Tierras ke eran suyas des de 15 siglos…

Yevan kon eyos sus lingua ke ivan a transmeter de padre a ijo fina oy en diya. El Judeo Espanyol, el Espanyol Medyeval enrikesido kon biervos Arabos, Turkos, Gregos, Bulgaros a lo largo de los siglos asigun sus payis de adopsyon.

En el siglo 19 el Edito se anula i los Judyos tienen la autorizasyon de tornar a Espanya. La Konstitusyon Republikana del 1968 permete para los sivdadanos la toleransya relijyoza. Los Fueros de los Espanyoles, los privilejyos de los Espanyoles del 17 de Julio 1945 konseguidos por el Referandum de Desiembre 1966 entran en la ley el 10 de Enero 1967. Lo konfirma el Artikolo 6 ke el Katolisizmo, la relijyon del stado, va ser ofisyalmente protejida i ke la libertad relijyoza esta garantisada para todos.
En Disiembre 1924, un dekreto permete a los Sefaradis ke moran en la Diaspora la possibilitad de tornar a la nasyonalitad Espanyola, si lo dezeyan. Kon esto, unos Judyos puedyeron salvarsen de las manos de los nazis, i dospues, de los estados Muzulmanos del Oriente Medyo ke empesaron a oppresar las komunitades Judiyas des de 1948.

Durante la Segunda Guerra Mundial, los Judyos refujiados azeran todo lo possivle para entrar en Espanya.

(a kontinuar) [email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorLotería Nacional rinde homenaje al escultor José Sacal por 50 años de trayectoria
Artículo siguiente¿Por qué cuesta tanto encontrar la alegría?
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.