Diario Judío México- LA EMIGRASYON SEFARADI II
EL PORTUGAL
La komunitad Judiya del Portugal se arrebive en el siglo 19. En la seksyon de los judyos del simetaryo Inglez de Lizbon, ay tombas ke datan de 1804. Los Judyos son autorizados a enterrar sus muertos en sus proprios simetaryos des de 1868 ma va ser solo en 1892 ke se les dara la libertad de pratikar sus relijyon : Van a pueder enrejistrar sus estados sivil, selebrar sus fiestas i arrekojer fundos para los ke estan en nesesitad.
El Governo Republikano autoriza en 1912 el statuto de la Komunitad Judiya.
Justo antes de la Segunda Guerra Mundial manko de 400 Judyos i unos 600 Judyos fuyendo de la shoa se topan en el Portugal. El Governo de Antonio Salazare (1890-1970) autoriza la entrada de los refujjiyados a la eksepsyon de los Judyos nasidos en Rusia o de orijin Rusa.
En 1970, se kontan 700 Judyos bivyendo en el Portugal de loskualos 95% se topan en Lizbon. La mitad son Sefaradim i la otra mitad son Ashkenazes. Oy en diya tambien, ma, la mayoritad son Judyos del Marok.
Arturo Carlos de Barros Basta (1887-1961) el komandante de la armada Portugeza deskuvre su Judaizmo. Mete en riziko su karyera i des de 1918 empesa a estudyar el Hebreo. Publika la gazeta “Ha Lapid” (antorcha-torch) i establese la komunitad de Porto.
En 1917, S. Schwartz, un Judyo Alemano aze salir a la luz la komunitad de los Maranos del Belmonte al nord del Portugal. Sera selebra kon el dokumentario patetiko de Frederic Brenner i de Yosef-Hayim Yerushalim. La sinagoga de esta Comunitad se inauguro en los anyos 1990.
LA BELGIKA
Los Judyos Sefarades empesaron a implantarsen en Belgika dospues del Kavzo Dreyfus. Unos kuantos judyos de la Algeria, kijyendo fuyir del antisemitizmo ke aviya empesado dospues de esta falsa akuzasyon de trahizion kontra el kapitano Judyo, vinyeron a installarsen en Belgika. Los Judyos de Istanbul i de Salonika no tadraron i eyos a siguirlos al empesijo de los 1900.
Esta Komunitad estava enkavesada spiritualamente por el Haham Meir Passy de Istanbul. Los ke lo konosyeron guardan dayinda un profundo karinyo por este hombre remarkavle.
La Komunitad Israelita Sefaradi se arrekoje en la Grande Sinagoga de Belgika de la kaye Regence fina la fin de los 1960. Esta Komunitad da la bienvinida a los nombrozos reskapados de Egypto i a los Judyos del Congo ke son orijinaryos de la izla de Rhodes, dospues ke este payis deklara su independensya de la Belgika el 30 de Junio 1960, i ke se ven ovligados de deshar el Congo pormodo de la insekuritad en el payis….
Serka de 1000 Sefaradim (entre los 2000 ke egzisten en este grande payiz de la Afrika) se refujen en Sea Point, un fauburgo de Cape Town i forman la mas ancha konsentrasyon de los Judyos de Rhodos en el mundo… Unos de estos se installan en la Kapital Belgikana.
(los livros de Moise Rahmani :
“Shalom Bwana, La Saga De los Judyos del Congo” i
“Los Judyos Del Sol, Portretos De Los Sefaradim De Belgika”)
Grasyas a sus generozitad se fragua una sinagoga ke va ser inaugurada en Desembre 1970 para las fiestas de las luzizikas, Hanuka. Se puede afirmar ke, i en muestros diyas dayinda, es grasyas a los donos de los Rhodezlis ke la Komunitad Sefaradi de Bruksel, es la mas prospera de las komunitades de las kapitalas de Europa.
De punta de vista relijyoza son los Judyos Rhodezlis ke animan la Komunitad. Albert Guigui, el Hahambashi de Bruksel i de Belgika, Shalom Benizri ke es el “Grande” de la Komunitad, i Menahem Hadad el Gran’Rabino de la Komunitad de la kaye Clinique, Albert Dahan, el Rabino honorario de la Komunitad de los Liberales, komo un Rabino de la Sinagoga de la Kaye Froissard (Argentino de orijin Siriana), el de Sefarad 2000, los vendedores de alimentos kasher i uno de los tres Direktores de las Eskola Judiyas son Judeo-Marokanos. La CISU, un simpatika lugar de kulto de la Komunitad Izraelyana “La Unitad Sefaradi” es diferente. No tiyene Rabino… Es la kehila ke organiza los servisyos i organiza evenimientos remarkavles. Kada Shabat se termina kon una seuda kon todos endjuntos.
Para unos 2000 sefaradim ay tres sinagogas orientalas en Bruksel de laskualas dos son ekskluzivamente Marokanas. La Mimuna ke es una fiesta de orijin Marokana i ke se selebra a la fin de Pesah, de agora en delantre aze partido de las kostumbras de los Sefaradim del payis….
Anvers es el sentro mundial del diamante i por muncho tiempo en las manos de los Ashkenazes.. Los Sefaradim estan prezente en esta metropol des del empesijo del siglo 19. La sinagoga de los Portuguezos, Beth Moshe de Hoveniersstraat, en el korason de ande se topan los diamantarios se fraguo en 1910. Los Judyos de los payizes Arabos komo los de Egypto, Libano, Siria, Marok, Algeria yegaron empesando de 1956. La vida de la Komunitad se desrolo en los entornos de este edifisyo relijyozo ke arekojyo los membros de la kehila pormodo de su lokalitad geografika. Los servisyos se selebran las demanyanadas i la tadre. Un “kollel”, un sentro de estudyos es frekuentado por unos elevos.
Des de la abolisyon del Emperyo Sovyetiko, Judyos de Georgia, los Gruzim ke se topan entre los Flamanes se dedikan al komersyo del oro.
Fina los d’alkavos tiempos frekuentan las sinagogas de los Sefaradim. Vienen de estableser sus propria Assosiasyon.
Des de 1990, una revista multilingual “La Boz De Los Sefaradim” salyo kada tres mezes. (Kedo de ser publikado dospues del fayasimiento del Senyor Rahmani Z”l) Se aviya establesido para dar vida a la prensa sefaradi mundial….
El primo de Julio 1999 Rahmani asistido del Buro de las Linguas Minoritaryas azyo rekonoser el Yiddish i el Judeo-Espanyol komo linguas Europeas non-territorialas en una seansa en los lokales del Parlemento Europeo.
(a kontinuar) [email protected]
Artículos Relacionados: