Diario Judío México - Peryi antes dos anyos un amigo ke estimava i admirava sovre todo…. Avlo del Senor Moise Rahmani Z’l   de Belgika ke era el duenyo del  I.S.E. – Institut Sepharade Europeen – E.S.I.   i  del .org por loskualos yo eskriviya tambien.   Sus ovras se imprimavan en livros, saliyan en su revista  LOS MUESTROS, i unos se puediyan meldar en .org ke se kompozava de munchas seksyones…. Me konfiyava sus eskritos para ke yo los traduizga al Judeo Espanyol i al Inglez al vezes.  El eskriviya en un fransez impekavle…. Era muy attado al Judaizmo, a sus orijinas i a su kultura a parte de ser un espozo un padre i un nono perfekto.   Pensi prezentarvos una de sus mijores ovra  02  ke traduizi i ke kreyo vos va plazer lo muncho ke me plazyo a mi…. Es muy interesante de seguir sus pasos a traves la historia……

A muestros ansestros ke mostraron el kamino

i a muestros ijos ke sigueran indo por este kamino….

PREFASYO

Es grande kozade tener el privilejyo de tomar en manos un projekto asemejante, ademas si el ke se dedika a azerlo, no es un historiano, no es un hombre de Lettras ni un filozofo, ma su uniko motivo es de transmeter solamente esta ovra.   Tengo el dover de ekspresar mi sinsera gratitud a todos ke kon sus kontribusyon me permetyeron de yevarla a kavo.  Lo izyeron antes de todo por la amistad ke mos auna i dospues kon el dezeo de transmeter sus memoryas…. Los reingrasyo de korason.

Kuando se evoka , dos elementos mos vienen immediatamente al tino.  Espanya i la epoka de oro de los Judyos.  Dayinda tenemos en muestro tino los tiempos del antisemitizmo muy fuerte i fatal ke muestros ermanos de sufriyeron de las kruzadas en laskualas se derrokaron kommunitades enteras Judiyas en Fransya, en Alemanya i en Bohemya – alora ke en Espanya, los Judyos – i no solo eyos – konosyeron la Epoka de Oro, basho el Kalifato de Kordova.   Evokamos dayinda los nombres de Maimonides, Yehuda Halevi, Ibn Gabirol, Ibn Pekuda, Abravanel ets…  Eran grandes hombres de kultura, de arte, de siensya, de politika i por seguro ke eksellaron en la relijyon.

Ma se nota una koza muncho mas importante….  En un sierto lugar, en Espanya, en una epoka presiza, en la Era Medya, hombres de kultura i de kultos diferentes :   Judyos, Kristyanos i Muzulmanos se ambezaron a bivir endjuntos en paz i fraguaron una sivilizasyon dandosen las manos….

Demonstraron ke diskutir, tener toleransya i el respekto al otro eran posivle i ekselentes remedyos para entendersen.

Malhorozamente, mas tadre, vemos ke el destino de las kommunitades de la Diaspora firyira de negra manera los Judyos, fina la kreasyon del Estado Judyo.

La Inkizisyon i su entorno de fanatizmo i de intoleransya en 1492 suona la kampana de la muerte de sus esperansas.  Muestros aguelos tienen de eskojer entre la ekspulsyon i la konversyon.

A la komoditad de la konversyon, muestros aguelos preferan de mantener sus modo de vida en mostrandosen mizmo mas fuertes i desidados para afrontar el egzilyo en tierras deskonosidas.  Mozotros, los Sefaradim, somos los testigos bivos de sus preferansya.   Komo lo dize tan korrektamente Edgar Morin en su prefasyo del livro  “Los Judyos de Espanya, la Historya de una Diaspora”, este egzilyo va ser una Diaspora en la Diaspora.  Henry Mechoulan, el ke estava a la kavesa, i una partida de akeyos ke preferaron konvertirsen por la forma, tornaron lo mas presto ke pudyeron a la fe de sus aguelos.   A vezes, komo los Judyos de Belmonte, solo dospues de kinyentos anyos…

Muestros aguelos yevaron kon eyos i mos desharon una rika erensya, puedeser la mas presyoza de todas  :  Sus memoryas…. Es ansina ke dizen ke somos el Puevlo de las Memoryas…

Kale konoser el pasado para entender el prezente.  El refuzo del otro en su diversitad, en su intoleransya i en el rasizmo kavza el  “hurban”, esta katastrofa de antes sinko siglos, kavza la inimajinavle dezgrasya de la Shoa, no mas leshos de unos setenta anyos i, ke pekado, una aktualitad ke mos kema i mos tosta oy en diya.

En akel anyo  5752  de la Kreasyon del Mundo, kommemorimos los kinyetos anyos del infamo Edito de Ekspulsyon.   El  31 de Marzo 1992, su Majestad el Rey de Espanya,  Don Juan Carlos, lo aboliso ofisialmente.

Des de munchos anyos por aki Espanya esta bushkando sus raises Judiyas.  Los deskuvre de muevo i se apersive ke Espanya bive dayinda en los Sefaradis, una Espanya diferente, una Espanya ke egziste en los korasones i en las memoryas.  Somos los  “Espanyoles sin patria ”  komo lo afirma Angel Pulido.

1492  reprezenta en la historya una data sanglante, una data kon konsekuensyas imprevizibles.  Es la fin de la Edad Medya mizmo si unos eskojeron el anyo 1453 i la kayida de Konstantinopolis para el empesijo del Renasimiento.  Para la majoritad de los puevlos del mundo, esta data sera la data del deskuvrimiento de la Amerika por Kristobal Kolombo.  Kolombo seriya Judyo komo lo afirma Sarah Leibovici, Z”l  ?  Se iriya a bushkar las diez tribus peryidas de Israel komo unos lo pretenden ?  No lo se.  Ma no kale olvidar ke entre sus hombres aviyan munchos Judyos o konversos.  Su navigator i interpreto era Torres i las kartas ke uzava eran las ovras de kartografos Judyos de Mayorka.

Aviya avrido las velas para topar un otro kamino a las Indias i deskuvriyo un Mundo Muevo.  se iva enrikeser kon el oro ke trusheron del Peru, iva prosperar i konoser las patatas i el tabako.  Ma ivan estruyir los povretos de los Indios, les apegariyan variyas hazinuras i epidemiyas.

Los Konkistadores, Cortes a sus kavesa, devastaron un kontinente, anhiliaron las sivilizasyones Azteka, Maya, Inka i otras, assasinaron Montezuma, el d’alkavo emperador  i derrokaron su kapital  :  El Meksiko.  En Amerika Latina i la Amerika del Norte, 1492 no fue un data para selebrasyones alegres.

1492  es tambien una data desisiva, un enkuentro de kaminos en la historya de Espanya.  El Reynado Espanyol se unifika el 2 de Enero, dospues de la konkista del Reynado Musulmano de Granada.  Los Reyes Katolikos akseptan de ekspulsar los Judyos de sus tierras a la solisitasyon de Frey Torquemada en no olvidandosen de los Mauros tambien, mas tadre….

Al kontraryo de los otros payizes, Espanya no es konsiderada  “tierra d’egzilyo”.   Era una patriya komo lo aviya eskrito el grande historyano Espanyol Jose Amador de los Rios en su ovra magistral  “La Historya de los Judyos de Espanya i del Portugal”  en 1875.

No se puede kuaji meldar un livro de  historya, i des de dos mil anyos sovre la Peninsula Iberika, sin topar en el un nombre o un evenimiento major attado al puevlo Judyo, seya en los aktos siviles i politikos, seya en siensya i en la kultura, en la literatura i en la relijyon.

Para mozotros, Judyos, la ekspulsyon de 1492  reprezenta uno de los kapitulos los mas trajikos de muestra historya.  Ma vash a dizir ke los Judyos fueron tambien ekspulsados de otros payizes komo de Inglaterra i de Fransya por egzemplo….  Alora, kuala es la razon ke la ekspulsyon de Espanya marko muestra memorya al punto de asemejarla a la destruksyon del Templo de Yerushalayim el  9 de  Av  ?

Espanya era una patriya para los Judyos.  Sus raises en estas tierras datavan de mas de mil anyos antes.  I lo repeto, es kuando el Kalifato de Kordova ke dirijava el payis ke konosyeron sus Epoka de Oro.

En estos tiempos los Reyes se yamavan  “Emperador de las tres Relijyones”.  Estos titulos de honor fueron revendikados por Alfonso VII i Pedro el Cruel.

Los siglos XI  i XII  markan los tiempos de la mas brilyante epoka del Judaizmo Espanyol.  Salen a delantre poetos komo Menahem Ben-Saruk, Isaac Ben-Chicatilla, Dunas Bel Labrat…..  Nombres gloriozos komo Ibn Gabirol, Ibn Ezra, Ibn Pakuda, Yehuda Halevy i el ke no se puede olvidar, Ibn Maimon, yamado Maimonides.

La eskola de los Traduktores de Toledo kon sus eskolares Judyos, Kristyanos i Muzulmanos observantes de lastresrelijyones Abrahamikas, estudyan en el berkalyo de la Lingua Kastilyana.   Ken mijor ke los Judyos puediyan servir de intermediario, de puente entre la tradisyon Grega, la kultura Araba  i la erensya Latina de ?

Tantas memoryas gloryozas ke aminguan un poko las sufriensyas de laskualas muestros aguelos fueron viktimas antes mas de kinyentos anyos, mos aklaran mijor, porke mozotros, los Sefaradim, guadrimos la lingua ke fue una de las bazas de muestra kultura.  Esta Lingua Espanyola ke muestros parientes avlan i transmeten i ke es la lingua materna, la lingua del korason…   “avlas Espanyol ?”   demanda el Judyo ke enkuentra un otro Judyo Sefaradi..

Trushimos de i konservamos  esta  “hidalguiya”, la noblesa de korason i el orgulyo ke aze de todos los Espanyoles i de todos los Sefaradis los  “primos del Rey “.  Es vedra somos orgulyozos  !  Tenemos tambien los romanses, los refranes, los kuestos ande se trata de kaballeros, de kastilyos, de tores, de prinses i de prinsesas.  I de ande tenemos esta imajinasyon si no de Espanya ?

Los tiempos bendichos kuando los ijos del mizmo Kreador kooperavan para gozar endjuntos terminaron…  Pasaron sinko siglos des del tiempo del kual tenemos dayinda la nostaljiya.  Al nombre del fanatizmo i de la intoleransya, Judyos i Muzulmanos fueron arrondjados de la Kaza ke ayudaron a fraguar i ke aviyan kompartido.

Oy, no devemos olvidarmos… No !  No tenemos el derecho… Ma devemos aboltar la oja.  Es el tiempo de esperar en memorya de esta Epoka de Oro, al nombre de la Razon del Estado !  Kristyanos, Judyos i Muzulmanos deven ambezarsen a konosersen o konosersen de muevo…  Kero dizir deskuvrir de muevo los remedyos para bivir endjuntos en igualtad.  Ke este deskuvrimiento de los unos kon los otros les trayga toleransya i fraternitad.  “Imena tov u manayim, shevet ahim gam yahad”  kanta el kantor.  Es bien i dulse de estar kon los ermanos….I kero spesifyar  “ermanos”  en la mas ancha signifikasyon del biervo, Ben Adam, el ijo del Hombre.

A mi entender es el motivo verdadero de 92.  I mozotros, los desendientes de los egzilados de antes kinyentos anyos, puedemos i devemos dar mano a alkansar a este motivo : Una mueva Epoka de Oro para la Humanitad entera.  No !  No es una utopiya si lo keremos reelamente todos endjuntos.

I komo un gesto simboliko i tanto emosyonante, los desendientes de los egzilados sienten, en las varias manifestasyones en el mundo,  reingrasyar publikamente, otr’una vez, los desendientes de akeyos ke dan el bienvinido a los errantes.   En memorya de muestros aguelos, ekspresamos muestra gratitud a los puevlos de Bulgaria, de Fransya, de Inglaterra, de Gresya, de Italya, del Marok, de los Payises Bashos, de Turkia i de la vieja  Yougoslavia.  Fueron kompasivos antes sinko siglos.  Los ke resivyeron los fueron leales, los ayudaron a developar sus payis i salyeron adelantre al nombre del payis ke les avriyo los brasos.   Mozotros, dospues de sinko siglos i establesidos puedeser debasho de otros sielos, les dizimos otra vez  “Munchas grasyas !”.

Durante  las seremoniyas relijyozas Judiyas, en los payizes ande se topan, se va dizir la “Orasyon de los Kohanim” de los saserdoses, para estos payizes.  “Ke el Todo Poderozo vos bendiga i vos proteje.  Ke vos aklare kon la Luz de Su Rostro i seya klemente para vozotros.  Ke Di-o bolte Su Rostro a vuestra vanda i vos de la Paz”.

En 1992, Madrid pensava a selebrar solo el sinkeno sentenaryo de la deskuvyerta de la Amerika por Cristobal Kolombo.

Unos kuantos Judyos Espanyoles kon Mauricio Hatchel Toledano a sus kavesa, indinyados de la interpretasyon de la Histora de un uniko punto de vista, izyeron komprender a sus dirijantes politikos ke 1402  no markava solamente la deskuvyerta del Muevo Mundo ma tambien el  “geroush ”, una desgrasya, la ekspulsyon de los Judyos por el infamo Dekreto de los Reyes nomrados Katolikos.

Mauricio fundyo el Sefarad 92, un komite internasyonal kargada de kommemorar estos evenimientos trajikos, i konvensyo los responsavles de varias kommunitades Judiyas de organizar las kommemorasyones en sus payizes respektevios.

Bruksel fue la mas aktiva kon el autor a la kavesa, dirijando i organizando por mas de un anyo multiplas manifestasyones, konferensyas, ekspozisyones, konsertos, mezas rondas i debatos…

Se empeso kon una seansa akademika   :  Andre Chouraki, Mauricio Hatchuel Toledano i Samuel Pisar fueron los invitados de honor.  Se adresaron a una audiensa de mas de dos mil personas.  Alprimer rango estavan asentados  Louis Toback, el Ministro del Interior reprezentando el Governo Belgio, el Nonce Apostoliko i otros envitados diplomatikos.

Una medalya kommemorativa espesyalmente kreada en Yerushalayim fue remettida en un silensyo solemno a los Embasadores de los payizes ke aviyan avrido sus pueras a los ekspulsados, i entre eyos, el del Rey Hassan II  del Marok.  Esto fue un emotivo gesto de rekonosimiento de la parte de los ijos de los refujiados a sus salvador.

Sefarad 92  se serro en Belgika kon un debate  “La Tolerensya en la Relijyon”  en el kual tomaron parte el Rektor de la Mezkita de Paris,  Dalil Bubaker, el Primat de Gantes, el Kardinal Albert de Courtray i el Grand Rabino de la Konferensya, Rabinos de . el Grand Rabino antesedante de Fransya, Rene-Samuel Sirat.

En komo en Amerika las kommunitades se kargaron de akodrarsen de este evenimiento .  Aviyan ekspozisyones, viajes -el viaje de Toledo esta dayinda gravado en la memorya de los partisipantes-  filmos dokumentaryos,  el kantante Israeliano Yehoram Gaon famozo por su boz kayinte i karesante i ke tuvo un grande sukseso bien meritado en todos los lugares, a parte de las ekspozisyones de Laurence Selzmann je mos emosyono kon su auguro de  “mijorado para munchos i buenos anyos”.

Muevos livros fueron publikados  “Los Judyos de Espagna, la Historia de una Diaspora, 1492-1992”  Edisyones Liana Levi, Paris 1992  por Henry Mechoulan i  “Sepharad 92”, Bruksel 2002, tomado en mano par el autor de estas linyas.

Una seria de TV  intitulado  “Yerushalayim en Espanya”  fue prezentado en Israel, animado de la parte de Isaac Navon, el sinken prezidente del payiz Isaac Navon, el ke todos konosen.  El fue el uniko sefaradi a tener esta karga.

Las kommunitades de Turkiya, kon el appoyo de Ankara, sovresalyeron a justo titro kon la Fundasyon de la  “500. Yil Vakfi Sergisi”, administrado por Jak Kamhi i Naim Guleryuz.  No se tratava mas de kommemorarse del sinken sentenaryo de esta triste ekspulsyon ma de selebrar dinyamente la yegada de los Sefaradim al Emperyo Ottomano.  Se publiko un livro i se organizo una Ekspozisyon  “Los Judyos de Turkiya, Kinyentos Anyos de Harmoniya”.

Estas selebrasyones durante loskualos todas las rikezas del Judaizmo salyeron a la luz, restituaron su orgulyo al mundo Sefaradi i enfin, el mundo rekonosyo la historya i la glorya de esta Epoka de Oro del Judaizmo.  Des de dies anyos por aki, este Judaizmo ke fue tan diskreto, evoluo a ser manko silensyozo i se aze oyir.  El Judaizmo de la Diaspora deve de agora a delantre kontar kon el.

Los puristos afirman ke Sefarad kijyendo dizir la Espanya, los Sefaradis son los desendyentes de los ansestros ekspulsados de Espanya antes sinko siglos, el 31 de Marzo 1492.  Ma los ke komparten esta opinion, se olvidan de las raises de los Judyos ke lavoraron kon los Fenisyanos i los Gregos o ke fueron detras de las armadas Romanas, los deportados de Palestina derrokada por Titus, akeyos ke se aunaron kon las viejas kommunitades del Norte de Afrika, tan serka de las kostas Hispanikas….   Este fenomeno esta muy bien kontado por Helena i Shmuel Trigano en sus introduksyon a  “La Memorya Sefaradi”   – Pardes, Edisyones In Press, Pris 2000, oja  9 –

Portanto, todos los Judyos Romaniyotes establesidos aki aya, siempre se referan a la Gresya, protejando sus raises, sus kehila antigua de tres mil anyos.   Es una de las mas viejas de la Galut, de la Diaspora.   Rechesan de ser yamados Sefaradis i revendikan kon obstinasyon sus estado de desendientes de los Judyos Byzantinos.

I ke dizir de los Judyos Romanos ke se topan en Roma des de vente siglos, tan attados a sus pasado, a sus erensya i a sus raises ?

Unos no mankan de dizir ke akseptar un minhag, un rituel, aze de un Sefaradi un Ashkenazi.  La manera de kanta, tal o tal piyut, elejiya relijyoza en la liturjiya, la manera de pronunsyar el Hebreo, los kategoreriya en un grupo o en el otro.   Yo no so partizano de esta eskola porke munchos Ashkenazes i espesyalmente los de Lubavitch, el movimiento nasido del Hasidizmo popular en Polonya des del siglo 18, estan siempre en bushka de la santitad i kompartyendo kon los Sefaradis, sin tener la pronunsiasyon i los ritos.

Otros sertifiyaron ke lo ke diferesya los Sefarades de los ashkenazes son los servisyos relijyozos.  Los primeros azen sus orasyones de manera ke los biervos se puedan oyir, alora ke los segundos tienen la kostumbre de murmurar la partida esensyal de la orasyon  i de kantar a boz alta solo el empesijo i la fin de la orasyon.

Unos otros afirman ke los Sefaradis son de los kontornos del Mediterraneo, olvidandosen ke entre “las vitrinas de los Judyos Sefaradis”  – para mensyonar la ekspresion tan amada de Henry Mechoulan –  figuran Sefaradis de Amsterdam, de Hamburg i Vienna….

Komo lo konstata el lektor, el debato esta dayinda avyerto….

a kontinuar……

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

Artículo anteriorSaveTheMusic presenta: בת הים הכשרה ~ “La Sirenita Kosher”
Artículo siguienteCapital Imperial: Bella Kyoto
SHAROPE BLANCO en ESTAMBUL (Turquia) Sharope Blanco, economista y profesora de lenguas, administradora y fundadora del Grupo SEFARADIMUESTRO en Yahoo, donde escribe sus poemas, artículos, recuerdos y su novela Almendra. Escritora y poeta de innumerables poemas y artículos en Inglés, en Francés, en Turco y en Judeo-Espanyol, pocos publicados hasta la fecha. Su obra será publicada post-mortem según su deseo, por su hijo Nebil F. Behar, medico residente en Inglaterra.