Kuando en Estambol avlan de las “Adas”, se referan a las maraviyozas izlas en la mar Marmara ke son lugares muy apresiados por los estambollis, i mas partikularmente por la povlasion djudia de la sivdad, ke pasan ayi los mezes del enverano.
Entre las 9 izlas ke ay en esta mar, 4 de las kualas trataremos en este artikolo son las mas konosidas.
La istoria konta ke en la antiguidad, estas izlas fueron atakadas por pirates mas de una vez, durante la epoka del Imperio Romano i ke eyas fueron testigo a terribles trajedias. Munchos fueron los miembros de la famiya imperiala, entre eyos prenses tambien, ke fueron exilados ayi i matados despues ke fueron torturados duramente.
Estas izlas fueron konkistadas por Fatih Sultan Mehmet (Sultan Mehmet el Konkistador) el 17 de Avril 1453, kurto tiempo antes de la konkista de Estambol. En segito a esto, el Imperio Otomano desidio de liberar a los aprezados i djuntos kon eyos traer a la sivdad a los pokos moradores ke bivian ayi.
Durante el reyno del Imperio Otomano estas izlas kedaron vazias asta la metad del siglo 19, i es solamente en 1839, despues de la proklamasion del Ferman del Tanzimat, de las reformas ke fueron echas en diversos kampos del Imperio, ke fue rekonosido el derecho de merkar terrenos en estas izlas a suditos ajenos tambien. Los fransezes fueron los primeros a yegar i a fraguarsen ayi kazas i son eyos ke les dieron el nombre “Les Iles des Princes”.
Una de las ermozas plajas en Buyukada
Kon el tiempo estas izlas, ke tienen una ermozura eksepsional, kon sus boskes, montanyas i kolinas kuviertas de flores en los mezes de la primavera i enverano, i la mar yamada por los turkos “Mavi Marmara”, ke las entorna, se transformaron en sitios de vakansas i rekreasion muy apresiados por los abitantes de Estambol.
Las kuatro izlas son: Büyükada (la izla grande) i kon su nombre antiguo Prinkipo; Heybeliada, yamada Halkis por los gregos; Burgazada, kon su otro nombre Antigoni i la ultima i la mas chika de eyas, Kinaliada ke era yamada Proti. Eya era povlada por gregos i ermenis i el muy renomado istoriador, Prof. Avraam Galante, fue el uniko djudio ke bivio ayi desde 1946 i asta su muerte, en 1961.
El Kal de la Büyükada
Tomando en konsiderasion el grande numero de djudios ke empesaron a vinir a la izla en los mezes del enverano, se konsitio tambien el menester de konstruir una sinagoga. Eya fue fraguada sovre el terreno ke apartenia a Avraam Aslan Efendi ke lo aregalo a la komunidad. En sinyo de apresiasion i rekonosimiento por este djesto el kal fue yamado Hesed le Avraam.
Asta su konstruksion, los djudios de la Büyükada azian las orasiones de shabat en una kaza alkilada, ma el patron de la kaza ke no pudo mas suportar el bruido echo por los fideles durante las tefilot los arondjo de ayi.
La konstruksion de este kal fue realizada grasias a la kontribusion personala de kada uno i uno de los djudios ke vinian a la izla a pasar los mezes del enverano.
La sinagoga Hesed le Avraam fue avierta a los servisios del publiko el primo del mez de Septembre 1904, kon una somptuoza seremonia. La fasada del kal avia sido ornada kon bandieras turkas i su interior kon tapetes de alta valor i kon flores. A la seremonia de aviertura avian partisipado el sekretario del Gran Rabino de Turkia, Moshe Levi, el mayor de izla Necip Bey, miembros del Bet Din ansi ke notables de la komunidad djudia de Estambol.
En esta sinagoga, en desparte de la selebrasion de las fiestas de Rosh Ashana, Kipur i a vezes de Sukot, tienen lugar seremonias de Bar Mitsva i Bat Mitsva tambien.
La Teva i el Ehal del kal
El kal de Heybeliada
Despues ke el numero de los djudios ke vinian a Heybeliada, ya avia pujado kada anyo mas, en el enverano de 1947 fue tomada la desizion, de mizmo ke en la Büyükada, de fraguar un kal. Uno de los abitantes de la izla, Sr. Jozef Bozaldo, avia echo dono del terreno ke avia merkado para este buto ansi ke de 10.000 liras tambien para su konstruksion, Aun ke los abitantes djudios de Heybeli, segun era yamada esta izla en kurto, avian echo fuerte presion para apresurar la konstruksion del kal i terminarla asta las fiestas del anyo sigiente, la sinagoga fue avierta a los servisios del publiko, unos 9 anyos despues, dia de alhad, el 10 de Djunio 1956.
A la seremonia de inaugurasion de este kal ke fue yamadao Bet Yaakov, partisiparon el Gran Rabino de Turkia, Rav Refael Saban, miembros del Komite Exekutivo del Bet Din i notables de la komunidad djudia de Estambol.
El kal de Burgazada
En sus rekuerdos, el Sr. Lemi Hara, ke largos anyos dio voluntariamente servisios a la komunita djudia d’Estambol, avia eskrito, entre otras: “El numero de los djudios ke vinian a Burgaz en los anyos 50 era muy chiko i para las orasiones del shabat eyos se arekojian en una de la kazas. La desizion de fraguar una sinagoga fue tomada entre 4-5 personas, avlando en la kaye, en el mizmo lugar onde mas tadre fue konstruido el kal. A los prinsipios vinian a la izla entre 50 a 60 famiyas para los mezes del enverano.
La konstruksion de la sinagoga se posibilito kuando el numero de las famiyas avia yegado a 360. Es entonses ke fue dado el permiso de konstruksion.”
Este kal tiene 120 lugares, ma en los dias de fiesta el numero de los yehidim ke vienen para las orasiones yega a 140-150 almas i puede ser ke un poko mas, entonses se adjustan siyas.
El dia de Kipur de 2003 esbrocho, en la sinagoga i sus entornos, un fuego ke fue amatado rapidamente sin ke sean kavzados grandes danyos. Los Sifrei Tora no fueron tokados i dinguno de los djudios ke estavan en medio de las tefilot de este dia santo no fue ferido. A la vista ke este fue un nes, un mirakolo de dia de Kipur.
Artículos Relacionados: