La komunidad sefaradi de Viena ke fue en el pasado un importante sentro de vida djudia, onde los sefaradis yegaron a alkanses sin presedentes en el kampo akademiko i en el relijiozo tambien, oy ya no existe mas.
En la Noche de Kristal, en Noviembre 1938, la muy ermoza sinagoga sefaradi, de la kuala traemos aki una fotografia, fue destruida por los nazis. Los sefaradis ke no se avian fuyido a tiempo fueron deportados a los kampos de eksterminasion Treblinka i Auschwitz de onde no tornaron mas. En el mizmo lugar onde fue kreada la Federasion Sefaradi Mundiala, en 1911, oy ya no ay mas sefaradis.
La komunidad sefaradi de Viena fue tambien el sentro de una rika aktividad jurnalistika djudia, ma la istoria se olvido de eya. La revista Aki Yerushalayim i yo mizmo desidimos de romper este silensio. En los numeros 52 i 54 de esta revista ya fueron publikados dos artikolos mios a este sujeto kon los titolos respektivos “La komunidad sefaradi de Viena” i “El jurnalizmo sefaradi en Viena”, i en el No. 84, el artikolo “Los Sefaradis de Viena” por Michael Halevy i Gaelle Collin.
Fachata del kal sefaradi de Viena, antes ke fuera destruido.
El Instituto Ben Zvi tambien publiko la istoria de esta komunidad i la Universidad Ben Gurion de Beer Sheva publiko un artikolo sovre la kultura del ladino en Viena.
Oganyo el Muzeo Djudio de Viena desidio de azer una ekspozision sovre la komunidad djudia de esta sivdad i a esta inisiativa se djunto la embasada turka en la kapitala austriaka.
Durante el periodo en el kual la komunidad sefaradi era aktiva eya gozo de la proteksion de la embasada turko-otomana en Viena. En la sinagoga estavan enkolgadas siempre dos grandes pinturas: la del Kaiser austro-hungaro i la del Sultan otomano. Esta fue, sin duda, la razon por la kuala esta ekspozision fue yamada “Los turkos en Viena – istoria de una komunidad djudia.”
La seremonia de aviertura de la ekspozision tuvo lugar el 12 de Mayo 2010, kon la partisipasion de una muchidumbre de djente. La primera konferensia fue dada por mi mizmo, komo desendiente de una famiya de tres hahamim sefaradis de Viena: Yehuda Leon Arueti, Yaakov Arueti i Yehuda Leon Arueti – padre, ijo i inyeto, ke sirvieron uno detras del otro komo rabinos de esta komunidad.
Le embasada de Turkia se enkargo de la resepsion de aviertura en el muzeo i las autoridades austriakas tomaron a sus karga la sena ofisiala.
Muy emosionante fue de ver el retorno a muestra memoria de la komunidad sefaradi de Viena. Estuvieron prezentes, entre otros, miembros de las grandes i famozas famiyas de esta komunidad komo las de Alchech, Halfon, Galimir, Arueti, Alcalay i munchas otras mas.
La ekspozision es impozante i es un verdadero plazer de ver los esforsos ke fueron echos por las autoridades austriakas, para mostrar al ancho publiko la importansia ke tuvo la komunidad djudia de Viena.
Artículos Relacionados: