EN KE EPOKA MARAVIYOZA DE LA HISTORIA NASIMOS!
JUDIOS !
POR SEGURO KE TUVIMOS MUNCHA SUERTE DE NASER
MA NASER EN TIEMPOS DE PAZ, GOZAR I ENVIEJESER ?
SER LIBRES I DUENYOS DE MUESTRO DESTINO LA FRENTE ALTA
2000 ANYOS DOSPUES FUNDAR ISRAEL ENSIMA DE LA TIERRA SEKA….
“MILAGRO” GRITARON MUSTROS PADRES “LORES AL SIGNOR ”
DOSPUES DE TANTA SANGRE I UMOS PERDIDOS EN LA YELOR !
AUSCHWITZ I TREBLINKA NUNKA SERAN OLVIDADOS
KON LAGRIMAS I LAMENTOS SIEMPRE MOS AKODRAREMOS
OY BIVIMOS SIN ESPANTO MIZMO KE ISRAEL ES CHIKA..
DOREYADA DE MIL ENEMIGOS KE KEREN KE DEZAPARESKA
KADA TSABAR VALE SIEN DE AKEYOS KON SUS KARAS TAPADAS
SOLO DE VERGUENSA POR KERER MATAR MUJERES I KREATURAS..
Los ke nasyeron un poko antes de mozotros tuvyeron ke salvarsen o murir en kondisyones desgrasyadas… Sufriyeron guerras, ambre, hazinuras, dolyos de los keridos, kazas derrokadas, fuegos, se arrastaron en los lugares de loskualos fueron arrondjados, konosyeron progromes, se eskondyeron i lucharon para ganar sus pan. I dospues, se arrebivyeron de las arenas de los deziertos, kon sus manos arankaron las espinas i fraguaron eskolas, moradas i en nada de tiempo un paradizo ke arresive kada uno, judyo i a vezes no, en avriyendo sus brasos komo una madre, alimentando sus kreaturas kon leche i miel !
Ma no es solo esto ! De kualo no gozimos mozotros ?
– Munchas madres fumavan i no se alimentavan kon komidas sanas kuando estavan prinyadas… Ma salimos fuertes i rezyos !
– Komiyan sin pensar dos vezes, los salados, los dulses i el pan sin nunka egzaminar el diabetis !
– Mos aboltavan de boka abasho en muestras kunas i mos durmiyan kon kuvyertas de kolores ke gritavan tan eran ermozas ma ke konteniyan plombo ! Sobrebivimos !
– No teniyamos kaskas kuando ivamos kon las bisikletas i no se aziya attensyon a las serraduras de las botelyas de los medikamentos, a las puertas i a las prizas de elektrisitad… No mos afito nada !
– Kuando eramos kreaturas no mos asentavan en siyas espesyales para los chikitikos en los koches, no se uzava sinturas de sekuritad, no konosiyamos los balones de sekuritad, i los koches no eran siempre perfektos, unos teniyan karruchas i frenos demasyado uzados…
– Asuvirse detras de un pick-up o un kamyon en enverano era keyffffff grande i mizmo kon una vakita o kodreros komo kompanyeros….
– A ken se les dava a bever agua en botellas merkadas ? Ni ke egzistiyan ! La agua kon lakuala se dava agua a las plantas mos arrefreskava mil maraviyas !
– Komiyamos todo lo ke mos davan, manteka, muezes, leche kon asukar i chokolates ma no eramos deltodo godras o godros ! Porke jugavamos en las kayes en las guertas dia entero a vezes ! Teniyamos amigos verdaderos i no “virtuales”. Para muestros juegos no era sufisyente de meneyar el dedo o la mano !!! Deviyamos kaminar i korrer i saltar i fuyir i nadar i asuvir a los arvoles, a los kavayos, a las bisikletas horas enteras. Muestras madres no teniyan de bushkarmos. Dezaparesiyamos ande un amigo o una amiga dia entero !
– Es vedra ! Los ijikos mos fraguavan go-kartes ! Un bolido para abashar de la kaleja abasho i sin frenos. Dospues de eskalavrarmos unas kuantas vezes, se topo el remedyo del freno tambien !
– Por seguro ke no egzistiyan komputadoras (!) juegos sofistikados, no Televizion i radyo muncho mas dospues kon el sinema por los filmos de Walt Disney ! DVD ? CD ? Mars o la Luna ?
Telefones sellulares ? Oyveeeeeeeeeeee trokimos de planeta ?
Matematika kon kalkuladores en la aldikera lollolllllll ?
Makinas de lavar… SI, Neverra…. SI…. Ornos sofistikados SI….
Agua kaynte en kaza Ohhhhhhhhhhh SI….. Makina para barrir SI…
La vida se izo muy muuuuuuy fasil. TV, Telefon, tape, radio etc… SIIIIIIIIIII El privilegio de bivir dospues los 50 ! Diskotekas, salir kon los ijikos i las ijikas, flirtar mizmo (ke es ir al sinema endjuntos !) SI ! Somos muy mazalozoz…. Ademas savemos bivir por muncho tiempo en tomando las 5 vitaminas a tiempo !
Mos ambezamos a bivir sin murir !
Komo ?
B12, Por el korason i las venas, sangre, miente, inyervos.
Komer karne, produktos de leche, pishkado i gueyvos
CALCIUM I FOSFORO, por los guesos, los dientes, los muskulos, rinyones, tomar produktos de leche, almendras, avyanas, vedruras, garvansos i lentejas, fruta sekada, sesamo, pishkados chikos, Kon vitamina D….
OMEGA 3, korason i venas, obezitad, la inflamasyon de las artikulasyones. Komer produktos de mar, olio de pishkado, verduras
ZINGO para la immunologiya, olvido i el alzheimer. Komer karne sin grasa, ilgado, leche, kezos, gueyvos, muncho pishkado, avyanas, muezes, banana, garvansos i lentejas.
I yegar a los 120 komo nada… Ma no olvidar de mover lo mas posivle, kaminar es lo mijor…. Una hora al diya !
El hombre se fue al mediko i le disho : Kero bivir fina los 120 !
[El mediko le demando : Fumas ? Beves ? Tienes una metresa ? Te gusta azer viajes ? Riyes i tomas plazer de la vida ? Tienes hobbies? El hombre le respondyo NO a todo lo ke le demando. El mediko le disho alora : Para kualo keres bivir ? Te vas a aburrir !]
I suerte ? Grasyas al Di-o tenemos muncho kada uno io uno !
No lo savesh ? Divertivos a topar la razon ! Si no por nada POR VER I MUESTROS OJOS ! I a la fin no mankesh de dizir a muestro Padre en los Sielos “Grasyas por todo….”
Kudyavos muncho….
[email protected]
Artículos Relacionados: