Saludos a todos los oyentes de la emisyon Muestra lingua, la emisyon en djudeo-espanyol fundada por el profesor Haïm-Vidal Sephiha i prezentada agora por vuestro servidor Edmond Cohen, kon Philippe en la kabina.
Por empesar, vos akodro ke el proksimo atelye de konversasyon de Vidas Largas se tendra el lunes 16 de marso, de las tres a las sinko, en el Centre Communautaire.
La semana pasada, komo lo aviya anunsyado tener en espanto, no pude azer kualkyera emisyon syendo ke tuve en kaza la semana entera mis inyetizikos de guadrar durante sus vakansas.
La semana de antes, 19 de fevrero, kuando ize mi emisyon sovre el Sapo, de Victor Hugo, no pensi, i en vedra mismo si aviya pensado, no teniya el tyempo de meldarvos la fin de mi emisyon del 5 de fevrero sovre los djudyos de Argentina. Komo se dize en franses, mijor vale tadre ke nunka, i oy, un mes despues, vos tengo de eskapar esta emisyon ke no pude meldar astal kavo porke aviya empesado mi emisyon, ke teniya un teksto bastante largo, kon dos presyozos minutos despues de mi tyempo.
Vos estava dizyendo, avlando de los djudyos de Argentina, ke, a la ora ande vos estava avlando, dainda no se saviya de lo ke iva salir del echo Nisman, este prokurador argentino djudyo asasinado el 18 de janvier. Al diya de oy, solo vos puedo dizir ke el Tribunal de Buenos Aires a diskulpado la Prezidente Kirchner de las akuzasyones de Nisman, ke no esta mas bivo para defenderlas.
Esto dicho, vos teniya dainda de meldar lo ke sige, ke vos meldo agora:
Agora desharemos los antisemites. No se puede avlar de Argentina sin avlar de tango. I kale saver ke los djudyos djugaron un rolo en esta muzika, sea komo muzikantes famozos (komo, por egzemplo, Mario Abramovich ke vyene de morir a fin 2014. Djugava violon en el sexteto Mayor, el mas famozo orkestra de tango en el mundo) sea mismo komo muzikantes azyendo una muzika mas espesifikamente djudiya, komo Norberto Vogel i Victor Murstein, ke krearon el “klezmer tango”.
Agora la komunidad djudiya de Argentina es numeroza i fuerte malgrado los antisemites. Es klaro ke la mayoriya de los djudyos de Argentina son ashkenazim, ama por siguro vos tengo de avlar de los sefaradim de Argentina, akodrandovos ke ay un atadijo entre los ashkenazim i los sefaradim de Argentina grasyas a una mujer lehliya de orijen franseza, Hélène Gutkowski, nasida en Fransya en 1940, salvada de los Almanes por djustos ke la eskondyeron, i ke agora es profesora de sosyolojiya en la Universidad en Argentina ande bive agora. El atadijo kon los sefaradim es su livro Erase una vez Sefarad i tambyen su grande amistad kon el Profesor Haïm Vidal Sephiha.
Por lo ke es de los Sefaradim de Argentina, komo desharvos sin avlar, afillu si ya lo ize en otras emisyones, del CIDICSEF de una parte, i de eSefarad de otra parte?
El Cidicsef (Centro de Investigasyon i de Difusion de la Cultura Sefaradi) fue en 1975 una creasyon de la Fererasyon Sefaradi latinoamerikana.
Este centro es muy importante para la kultura sefaradi. Aya topamos, entre otras i otros a Graciela Tevah de Ryba, Esther Cohen, María Cherro de Azar y Mario Cohen. Yo los konosi por las emisyones de radyo ke pude oir de Fransya grasyas a Radio Sefarad de Espanya…
En kuanto a Marcelo Benveniste i su mujer Liliana, no puedo desharvos sin akodrarvos esta maraviya ke es eSefarad.com, gazeta de Internet ande se topa no solo lo ke se pasa kon los sefaradim en Argentina, ama lo ke se pasa en el mundo entero (inkluyendo mis propyas emisyones…)
Agora ke ya eskapi mi emisyon del mes pasado, puedo pasar a mi emisyon de oy, dia de la fyesta de Purim. I por esto es ke me pensi de azervos una meldadura de lo ke mos konta el Meam Loez sovre Ester la reyna.
Kuando digo Meam Loez, agora no avlo mas de Yaakov Huli, porke el komentaryo de la megila de Ester a sido eskrito en 1864, mas de un siglo despues de la muerte de Huli, por el haham izmirli Rafael Hiya Pontremoli. Ama para dizirvos la vedra, yo lavori sovre la transliterasyon ke izo en 1974 el profesor Pascual Pascual Recuero de la ovra de Pontremoli, syendo ke malorozamente no pude topar sovre internet el orijinal eskrito en rashi, komo era por Bereshit.
Lo ke vos vo meldar oy es el komentaryo sovre el pasuk 8 del kapitulo 2 de la Megila: Vayehi beishama devar ameleh vedato (Y fue en seer oido mandado del rey y su ley). El anyo pasado, a la okazyon tambyen de Purim, vos teniya meldado el komentaryo del pasuk djusto antes, el pasuk 7: Y fue crian a Adassa, etc
Oy mos vamos a interesar al eskojimyento de Ester para el rey. Vos akodro ke el rey estava bushkando una virjen, buena de vista, para ser eskojida por el en vez de Vashti. I agora desharemos la palavra a Pontremoli:
Es avizo ke kuando se sintyo el komando del rey i su sentensya, i kuando estavan bushkando i se apanyaron mosas munchas a Shushan por mano de Hegay, sinklavo del rey, estonses tomo Mordehay a Ester i la eskondyo en su kamareta para ke no la vyeran los pekidim (zabites) del rey. Lo ke no aziyan ansi las ijas del resto de las umot (nasyones), ke kuando pasavan los pekidim del rey, ivan baylando i amostrando sus ermozuras por las ventanas.
I salyeron los sheluhim (embiyados) del rey i apanyaron munchas mosas eskosas (virjenes) a la sivdad de Shushan. I ditos pekidim ya konosiyan a la senyora de Ester i su ermozura; ke aun ke era muy tsenua (kon pudor) i tsadeket (djusta) i se tapava muncho de los ombres i kol she ken (indimas) de los goyim ke no la vyeran, ma las mujeres de los pekidim ke la konosiyan a Ester les kontavan a sus maridos de la ermozura de Ester, ma no la konosiyan ni menos saviyan de kuala uma (nasyon) era. I komo vyeron ke Ester no estava kon ditas mosas, disheron los pekidim uno a otro: -en baldes lazremos a bushkar en sivdades leshanas, syendo se topa aki en Shushan una mosa ermoza mas ke todas las ke trushimos.
I kuando fue bushkada a Ester i no se topo, se lo dyeron a saver a el rey, i en su punto eskrivyo kartas i kito pregoneros ke apregonen dos kozas: La una es ke toda mosa eskosa (virjen) ke se eskondyere de los pekidim del rey sea matada; la sigunda es palavras dulses i afalagamyento i sombaymyento a las mosas, dizyendoles ke la mosa ke alyara (topara) grasya en ojos del rey, alkansara reynado i podestaniya.
I por avizo de esto disho: vayehi beishama devar ameleh vedato (Y fue en seer oido mandado del rey y su ley). Kere dizir ke uvo dos mandamyentos: El uno es devar ameleh (mandado del rey) ke alyando grasya, terna (tendra) dita grandeza; i el sigundo es vedato (y su ley) kere dizir ke, en fuyendo de venir, ahat dato le amit (una su ley para matar).
I kon esto se sombayeron las mosas i se amostraron. I por esto disho detras: uveikabets nearot rabot el Shushan abira (y en seer congregadas moças muchas a Shushan la Metropolitana); ma Ester kedo alkavo, ke si keriya eya salir enprimero antes de todas, por syerto ke alsava grasya, sigun fue ke no toparon mas ermoza ke Ester. Ma el djudesmo ke tuvo Ester le kavzo a no ir eya kon gusto a kazarse kon goy, sino alkavo de todas, entendyendo kisas no la tomara el rey. I si la toma, ke se puvlike ke fue por fuersa, ke ya lazro muncho a eskonderse i no pudo, i la tomaron por fuersa.
I tambyen Mordehay atsadik (el djusto) kuando sintyo dito komando del rey, se espanto muncho i la tomo por fuersa a Ester i la kito en medyo de la plasa, syendo ya saviya ke koza grande va a salir de esto. I lo prevo byen ke no ay remedyo de eskonderla, i kale ke sea del Shem Itbarah, sigun se lo avizaron entre suenyos. I kuando la metyo en la plasa de la sivdad, la mesklo entre todas las mosas para ke no supyeran de ke uma era. I pasaron por ai los pekidim del rey i la tomaron a Ester por fuersa i se la entregaron en mano de Hegay, guadrador de las mujeres. I por esto disho: Va tilakah Ester (i fue tomada Ester), por avizo ke fue tomada por fuersa. I syendo ke vyeron los pekidim i Hegay su ermozura de Ester, se alegraron muncho, i ka yevaron kon muncho koraje a la kaza del rey, ande estava asentado.
I no izyeron a Ester komo resto de las mosas. Ke emprimero las yevavan a kaza de las mujeres i las apanyavan ai enserradas, i eskojiyan la mas ermoza a yevarle ande el rey, syendo no saviyan determinarsen kuala sera reuya lemalhut (digna para el reyno) porke no vyeron diferensya en las mosas para eskojer una mas ke otra. Por esto deshavan la behira (el eskojimyento) en mano de el rey, ke eskojga lo ke le agrada. Ma kuando vyeron a Ester, el luego la yevaron a el rey, ke disheron: – Por syerto ke esta konvyene a enreinar. I por esto la rekomendaron los pekidim a Ester, dizyendole a Hegay: – Avre tus ojos a tener kargo por esta mosa, ke siguro esta es la ke va a enreynar, i mira de la afeitarla muy byen, sigun merese a la reyna.
I por esto disho: Va tilakah Ester el bet ameleh (y fue tomada Ester a casa del rey); syendo tuvo esta maala (grandeza) Ester mas ke todas, ke no la entraron el bet anashim (a casa de las mugeres), syendo ya saviyan por syerto ke iva a enreynar, i la yevaron el bet ameleh (a casa del rey) enderecho.
Pasuk 9: Vatitav anaara beenav (Y plugo – plazyo – la mosa en sus ojos)
Mos aviza ke kuando tomo Hegay a Ester por yevarla a kaza del rey, plazyo la mosa en sus ojos i also mersed delantre de el. Syendo ay mujeres ke estando de leshos amostran la ermozura i parese ke tyenen muncha grasya; ma en aserkandose allado de sus veentes (los ke la ven), no amostra tan ermoza sigun amostrava de leshos. I por esto disho: va titav anaara be enav, va tisa hesed lefanav (y plugo la mosa en sus ojos, y rescivio merced delante el); ke syempre le plazyo, tanto serka komo leshos.
I syendo era taksado del Shem Itbarah ke enreyne Ester, le metyo en korason de Hegay a rejirla a Ester en 2 kozas menesterozas, una tokante al puerpo, otra tokante a la alma.
La de el puerpo es ke, syendo ya vino eya aki, ke no bolte atras en vaziyo sigun tomaron todas las mosas, sino ke alyara (topara) grasya mas ke todas i ke tome el reynado por salvar a Israel. I por esto le izo Hegay provecho grande para el puerpo a rejirla kon muncho kavod (onor) mas de lo ke izo a todas las mosas, ke no les dava Hegay dadivas (regalos) i prezentes, sino los afeites menesterozos para entrar delantre el rey, ke no se pueden pasar sin eyos. Ma a Ester apresuro a darle de kaza de el rey a sus afeytes i sus unturyos por envisyar (dar plazer) la karne, i le ordenava su meza kon komidas buenas por engodreserla. I Ester no kijo komer, sigun avizaremos be ezrat aShem (kon ayudo del Dyo). I mas pujo a darle a sus dadivas i prezentes demazyadamente de resto de las mosas, ke syendo ayo (topo) grasya en sus ojos i supo ke el reynado va a ser para Ester, konpeso a azerle tahsise malhut (uzos de reynado) de akea ora, aun ke ainda no resivyo el reynado asta anyo de syete lemalhuto (del reynado), sigun avizaremos beezrat aShem. Esto es el provecho del guf (puerpo) ke izo Hegay a Ester.
El sigundo provecho ke le izo fue menesterozo a la alma, por sostener el djudezmo de Ester en todo modo de partikular. Ke siendo Ester tan tsadeket (djusta), estava muy triste i pensativle komo sera su vida entre goyim; ke para todo ombre ke esta entre goyim es fuerte de guadrar el djudezmo, ke aun ke sera buen djudyo, ma estando entre eyos, si se olvido de azer minha o de azer alguna mitsva, no ay kyen lo akodre; i mas muncho en el hiyuv (ovligasyon) de guadrar shabath, ke es un pekado grande de hayav sekila (kulpavle por lapidasyon) bar minan. Ke estando entre goyim, no manka ke se olvida i aze alguna melaha (lavoro) asemejante de esto por olvido, i en vezes se averguensa de las umot i no aze la mitsva komo se deve; i ansi en las komidas. I kere muncho akavidado en esto. I syendo ansi, ke setam (ordinaryo) djudyo pena muncho en azer el djudezmo entre los goyim, kol she hen (indimas) para Ester, ke estava muy enkomendada de Mordehay a no deskuvrir a su puevlo, a no amostrarse por djudiya; por esto estava Ester muy triste komo se rejira entre eyos a no deshar el djudezmo. Ke en traendole a komer i bever sus komidas i sus vinos, si no komera, se va amostrar ke es djudiya. I le enbarasava ke no keriya dar a saver su puevlo, sigun se avizo. I mas muncho le embarasava ke, estando ai, se olvidara kual diya es shabat, syendo ai no ay diferensya de shabat a todos los diyas. I esto le doliya muncho a Ester i teniya muncha angustya.
I syendo ke el Shem Itbarah konose los korasones, le metyo en korason de Hegay a remedyarle dito penseryo, ke kuando le trusho a komer a Ester, no kijo Ester sus gizados, dizyendo ke estava uzada a komer legumbres. I Hegay le atorgo a demudarle sus komidas i le dyo legumbres, i no sospecho ke, en no komyendo karne ni bevyendo vino, se aflakara i demudara la kolor de sus fazes, sigun atorgo el meltsar(intendente) a Daniel i sus kompanyeros kuando fueron ande Nebukadnetsar: Ke no kijeron komer de komidas del rey, otro ke legumbres, sigun veresh en Daniel, kapitulo 1. Lo mizmo also grasya Ester en ojos de Hegaya darle legumbres: i este zehut fue kavzante ke se regmyeran Israel por su mano.
El komentaryo de Pontremoli no se eskapa aki, ama yo so ovligado de kedarme porke ya vino la ora de eskapar mi emisyon, i dezeandovos una buena fyesta de Purim kon alegriya, vos digo al djueves ke vyene, si kyere el Dyo!
Artículos Relacionados: