Menashe Ben Israel

Por:
- - Visto 934 veces

Menashe Ben Israel nasio el 24 de Novembre 1604 en la sivdad La Rochelle, en Fransia, a una famiya de konversos ke a kavza de las persigisiones de la Inkizision se avia fuyido de Portugal. En su chikez el fue edukado komo kristiano, kon el nombre de Manoel Dias Soerio, ma su famiya torno al djudaizmo despues de averse aresentado en Amsterdam, Holanda, en el anyo 1610.

El fue embiado a estudiar andel Haham Hayim Uziel, orijinario de la sivdad de Fez, en Maroko, ke era el rabino de la komunidad djudia i de la sinagoga Neve Shalom, en Amsterdam.

Siendo un muy buen elevo, a la edad de 15 anyos el ya dava darushes (sermones) a los yehidim de la komunidad i a la edad de 17 anyos ya avia eskrito su primer livro – “Safa Brura” (Lengua klara). Despues de la muerte de su maestro, el rabino Uziel, en 1622, kuando tenia solamente 18 anyos, el fue nominado komo su suksesor, al posto de rabino de la sinagoga Neve Shalom. Uno de sus elevos fue Baruh Spinoza.


A la edad de 20 anyos el se kazo kon Rahel Soeiro, desendiente de la famoza famiya de Don Yitshak Abravanel. De este kazamiento les nasieron una ija i dos ijos.

Ben Israel no se kontento kon sus estudios rabinikos sino ke ancheo sus konosensias en diversos kampos mas, entre eyos las sensias. El ato buenas relasiones kon intelektuales djudios i non djudios en los diversos paizes de Evropa i eskrivio livros en diversas lenguas, entre eyas el ebreo, latin, espanyol, portugez i inglez. Sus livros fueron imprimidos en la primera imprimeria ebrea ke el avia fondado en Amsterdam, en 1627. A lo largo de los anyos la sivdad de Amsterdam se transformo en uno de los sentros mas importantes para la publikasion de livros de las komunidades djudias en la Diaspora.
En 1632 el rabino Ben Israel publiko la primera parte de su ovra maestra, “El Conciliador”, ke fue eskrita en espanyol – lengua latina ke podia ser entendida por munchos, prinsipalmente por la iglezia. El buto del livro era de aserkar el mundo kristiano al djudaizmo, bushkando de esta manera de yegar a un entendimiento, i provar a menguar la enemistad kontra los djudios. La segunda i tresera parte del livro fueron publikadas en 1641 i 1651.

Este livro gozo de un grande sukseso, fue tradusido a diversas lenguas i el fue visto en una luz muy pozitiva. En segito a esta reushidad Ben Israel empeso a dezvelopar relasiones de amistad i a interkambiar letras kon eruditos del mundo kristiano i tambien kon autoridades de alto nivel, komo la reyna Cristina de Suedia ke kijo konvenserlo a ke aksepte de krear una komunidad djudia en su paiz.

El famozo pintor Rembrandt tambien fue uno de sus amigos i el no manko de adjustar el portreto de Ben Israel a sus ovras.

Un testimonio del grande onor ke le fue dado en el mundo, en segito a la publikasion de “El Conciliador” es la letra ke le fue embiada por un saserdote:

“Aun ke tu relijion es diferente de la mia, serviremos al Kriador i biviremos en paz. I ke sean tu saviduria i la mia respektadas en todo lugar. Esta es mi kreensia. Todo el tiempo ke bivire sere kristiano, i tu bive asta la eternidad djudio.”

En segito a trokamientos ke tuvieron lugar al seno de la komunidad djudia de Amsterdam, el pedrio su posto komo shefe i rabino de esta komunidad i en su lugar fue nominado el rabino Shaul Mortera. Ben Israel fue nominado al posto de dayan (djuzgador) en la korte rabinika.

A kavza de malentendidos ke avian desbrochado entre el i la komunidad, en 1638 Ben Israel desidio de partir a Brasil i djuntarse a su kunyado, Efraim Soeiro Abravanel. Durante su estadia ayi kumplio el posto de rabino de la yeshiva de la komunidad djudia de Brasil, i en 1642, desidio de retornar a Amsterdam.

Uno de los mas importantes alkanses de Ben Israel es atado a los esforsos ke el izo para el retorno a Ingletierra de los djudios ekspulsados de este paiz, en 1290.

Entre los anyos 1655-1657, el governo inglez enkavesado por Oliver Cromwell, empeso a tratar de los derechos del ombre i de la libertad de kulto, entre otras en lo ke toka a la kestion de los djudios kon relasion a sus relijion.

En el mez de Disiembre de 1655 se reunio en Ingletierra la komision Whithall ke trato de la kestion del retorno de los djudios ke avian sido ekspulsados de ayi 343 anyos atras, i si kalia darles derechos de sivdadinos rekonosidos por el governo.

El rabino Ben Menashe fue envitado por Cromwell a partisipar a esta komision komo reprezentante del puevlo djudio. Djuntos kon el yegaron a Ingletierra su ijo Shmuel i el rabino Yaakov Sasportas. En este muy importante enkontro Ben Israel meldo delantre de Cromwell sus demandas para el retorno de los djudios a Ingletierra. Aki vos traemos algunas de eyas:

“Estas son las grasias i favores ke, en nombre de mi nasion ebrea, yo Menashe Ben Israel, demando de Vuestra Serenisima Alteza, al ken el Dio aga prosperar en todas sus emprezas, komo vuestro umilde servidor espera i dezea:

La primera koza ke demando de Vuestra Alteza es ke muestra nasion ebrea sea resivida i admetida a esta poderoza republika, basho proteksion i guardia de Vuestra Alteza, komo sus propios sivdadinos. I para mayor seguridad en tiempos venideros, supliko a Vuestra Alteza ke aga djurar, si lo tiene a bien, a todos sus shefes i jenerales de la armada, ke mos defenderan en toda okazion.

Ke plazga a Vuestra Alteza de permetermos de tener sinagogas no solo en Ingletierra sino ke en todo otro lugar ke konkistara. Ke mos permeta de tener un simeterio afuera de la sivdad para enterrar a los muertos.

Ke si ay leyes kontra la nasion djudia, anularlas afin ke podamos bivir en paz i seguridad en este paiz.

Menashe Ben Israel termino sus palavras kon la sigiente orasion:

“Si vuestra Serenisima Alteza akseptara todas estas kozas kedaremos siempre muy agradesidos i sera por siempre muestro dover de rogar al Dio para la prosperidad de vuestro paiz. Rogo al Dio de dar un feliz exito, de dar alegria i reushidad a Vuestra Serenizima Alteza, Amen!”

Aun ke Ben Israel no logro imediatamente la reushidad ke el dezeava, malgrado las largas konversasiones ke tuvo kon Cromwell, kurto tiempo despues de este enkontro los djudios resivieron el derecho de vinir a bivir en Ingletierra, pratikar sus kulto i enterrar a sus muertos en sus propios simeterios. La Korte Suprema de Ingletierra tambien yego a la konkluzion ke la ekspulsion de los djudios, en 1290, fue illegala desde su prinsipio i ke por konsekuensa, no avia dinguna resktriksion, en konformidad kon la ley, de permeter a los djudios de tornar a Ingletierra. En 1698 fue rekonosida ofisialmente la libertad de kulto de la komunidad djudia.

Los alkanses mas importantes de la kreasion de muevo de esta komunidad yegaron despues de la metad del siglo 19, durante el periodo ke el governo inglez fue enkavesado por Benjamin Disraeli, ke era de orijin djudia.

El rabino Menashe Ben Israel murio el 20 de Novembre 1657, en la sivdad de Middelburg, kuando estava en kamino para enterrar en Amsterdam a su ijo Shmuel, segun se lo avia prometido antes ke muriera, durante sus estadia en Ingletierra.

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.


El tamaño máximo de subida de archivos: 300 MB. Puedes subir: imagen, audio, vídeo, documento, hoja de cálculo, interactivo, texto, archivo, código, otra. Los enlaces a YouTube, Facebook, Twitter y otros servicios insertados en el texto del comentario se incrustarán automáticamente. Suelta el archivo aquí

Artículos Relacionados: