El, un inmigrante nasido en Estambol ke, mizmo ke Gardel, ayegó a Buenos Aires en un vapor desde Marsella, Fransia, siendo una kriatura. La suerte no le dio la voz i la fama de Gardel, i mizmo la mizeria de la famiya izo ke deshara la skola primera a los 9 anyos para lavorar asta los 18 anyos en el kampo, solo i leshos de sus keridos. Era un enamorado del tango, un grande bailador i djunto kon mi mamá, “Clarita”, nazida en Polonia i arivada a la Ardjentina aynda en un vapor, a la edad de 4 anyos, azian una luzia kuple (pareja) de bayladores de tango en bayles populares i también en fiestas de amigos i parientes.
Eya savia kantar munchos tangos de Gardel i de otros, i los kantava enmientres lavorava alimpiando la kaza o kuando gizava. De eya, kon sus voz ermoza i klara, es de ken me ambezé a kantar los primeros tangos i me enamori de eyos para siempre.
Isaac, “el turko”, komo le dizian todos en el kuartir, solo se ambezo a meldar en sus kurtos anyos de skola, ma en su vejez, era lo ke mas le dava gusto de azer. Sus grande pasion, mizmo ke le gustava todo el tango i munchos otros buenos kantadores, era Carlos Gardel, i en sus dalkavos anyos, asta agosto de 2010, adjuntava istorias, i kantes, i fotos de este grande i afamado kantador.
Tengo daynda en un kashon de mi kamareta, un sovre kon rekortes i fotokopias de livros i revistas, ke el estava adjuntado para azer kon mi ayuda un “lavoro de investigasion sovre Carlos Gardel para emprimir”, ansina me dizia.
Es por esto ke vos do a konoser aki un poko de la istoria de este grande kantador de tangos Carlos Gardel.
CARLOS GARDEL – EL REY DEL TANGO ARDJENTINO
Nasió en 1890 en Toulouse, Fransia- Murió 1935 en Medellin, Kolombia.
Este grande i afamado kantador fue konosido komo “El Zorzal Criollo” (El pasharo kantador Ardjentino). La karrera artistika de este kantador nasido en Fransia ampesó djusto kon el dezvelopamiento del Tango: la múzika, el kante i el bayle de los “arrabales”, los kuartieres alejados del sentro de la sivdad ande moravan las djentes proves o de klase media de lavoro.
Carlos Gardel nasió en Toulouse, Fransia kon la alkunia de Charles Romuald Gardés el 11 de disiembre de 1890, ijo de Berthe Gardés de 27 anyos i de padre deskonosido, dunke eya dizia ke era vivda. Eya fue ke lo trusho a Ardjentina, yego en un vapor, de kriatura kon dos anyos i tres mezes. En su muevo pais i asta el anyo 1913 era konosido komo Carlos Gardés o Gardéz, ma esto se trokó en el nombre artístiko de Carlos Gardel kon el ke fue konosido por el resto de su vida.
Carlos Gardel en primero, por ganar unas monedas para ayudar a su madre, lavoró en kaves, en lugares ande el puvliko era de basha kondision sosiala.
En estos kaves azian su espektákulo los “payadores” (se dize: pashadores. Eran kantadores de las tradisiones del kampo ardjentino) i ke tambien lavoravan en sirkos i tavlados. De eyos es ke se ambezó los primeros saveres de la ekspresion vokal i a tanyer la gitarra.
Ansí fue ke tornaron a yamarlo “el morocho del Abasto” (morocho=preto – Abasto es el nombre del kuartier ande morava). Su fama se izo kada vez mas grande en Buenos Aires, una sivdad ke no era kolay de konkistar. La simpatía i la majia de su voz ya lo azia distinto a los otros kantadores i la djente se fue enamorando de su kantar, esto lo yevó en kamino al eksito.
Para la epoka del sentenario de la Revolusion de Mayo (1910) era el numero artistiko de O’Rondemann, un afamado kave de Buenos Aires. En 1911 se adjuntó kon otrun emportante kantador, José Razzano, i por doze anyos kantaron endjuntos una grande kantidad de kansiones populares kon el nombre de ” Duo (kuple) Nacional Gadel-Razzano” viajando por todo el pais. Por estos diyas su repertorio no tenía tangos sino kansiones del folklore ardjentino.
Gardel estreno el kante “Mi noche triste”, el tango-kansion, en 1917, ke vendió 100.000 diskos i se izo popular en supito en los paizes de Latinoamerika. Desde este punto es ke empeza a kantar tangos. Komposó 770 kansiones i de estas, 514 fueron tangos.
La grande popularidad ke tuvo komo interpretador de las baladas melankolikas del tango lo izieron lavorar en importantes klubes nokturnos i pelikulas.
El púvliko se ponia en pie para batir palmas por el, i mizmo komo yegó a Buenos Aires, un vapor lo tornó a Evropa a konkistar a las djentes de ahí también.
En primero Madrid, Barselona i despues Condal, una sivdad a oriyas del Mediterráneo, le puzo la korona de Rey del Tango, mizmo pazando las murayas de las linguas. En sigundo, su grande eksito lo yevo a Paris i mas tadre a Nueva York.
Al verlo, las karas de las mujeres se ilumniavan maraviyadas i sus djestos novles i amistozos lo aserkavan daynda a los ombres.
Tanto grande yegó su fama i su eksito ke se izieron munchas estampas i mataseyos para posta, aki vos do algunas.
La karrera artistika de Gardel fue kortada en supito en 1935 kuando pedrió la vida en un aksidente de avion en Medellin, Kolombia, el 24 de djunio de 1935 i fue enterrado en el Semiterio de “La Chacarita” en la sivdad de Buenos Aires.
El ultimo tango ke el kantó fue “Tomo y Obligo” (Bevo i Ovligo) i fue para la radio de Kolombia. Este tango tenia muzika suya i letra de Manuel Romero.
A este punto fue ke Gardel se tornó inmortal i siempre djoven, i su fama kreó el dicho “Gardel kada diya kanta mijor”, mizmo en sinyo de nombre familiar, se lo yama “Carlitos” i ansí nasio el mito ke fue trasmetido de jenerasion en jenerasion i todavía vive entre las djentes de Buenos Aires i de Ardjentina toda.
Liliana Tchukran de Benveniste
Co-Editora de www.eSefarad.com
www.lilianabenveniste.com.ar
Publikado en EL AMANESER Nº 75 – Mayo 2011
Artículos Relacionados: