Dezgrasya de gripa ! Me se tomo el lado, mi nariz se bolto a ser un chorro, me duele todo i me siente komo un stufa ke kayinta la kaza entera ! Los inyervos los tengo en “coletta” i no se mas komo la trato “sin palavras” la amigita de mi ija ke le pego estos mikrobes ke me oskuresen la egzistensya !!! Kero yorar !
Supas, te, naranjas, kurikas no me ayudaron oy ! Nada !….
Tenemos una meza en el salon ke no tuvo mazal kon mis gatikos ke saltan ariva a la biblioteka i de la biblioteka a la meza… I no ay de ser sorprendido de ver ke la meza aze “ting ting” de la derecha a la siedra i de la siedra a la derecha…. Hehehe… No es fasil de supartar este bruido kon gripa ! Bushki una “kozika” para meter debasho de este pye…
No tuve pasensya i desidi de dublar una gazeta por agora… fina ke vamos a desidar ke azer kon la meza “firyida”….
Arazgi una oja de la gazeta i la dubli. Metyendolo debasho del piye me se fue el ojo a la fotografiya ke vide ensima del papel ! Atyo santo ! Ni mas ni manko de mi kerido Trump ! Trump dezmazalado ke iva ser pizado por el pye de la meza ke rompyeron mis adoravles gatikos ! Ke destino triste !
Me vino una riza loka ! Komo eskapan las gazetas ke avlan de kozas tan seryozas en vezes i tan importantes, a vezes tan trajikas i tan enteresantes eskapan para emburujar pishkados ke se vendyeron en el merkado !!!!
I no solo esto….
La vedra es ke no me plazeriya del todo ser nombrada en una gazeta ke dospues, un arabo va servirse para alimpyarse….. Oy ve !
Me tiene afitado, en vedra, de meldar un koza ke topi enteresante en el jurnal ke empleyaron para embolver el buketo de prishil o de sevoya freska…I no importa ke seya un poko mojado !
Mizmo gazetas nesesitan “suerte”, mazal bueno !
Gmar hatima tova a todos….Ke Dio este kon mozotros, se apiyade i ke tengamos sus bendisyones… Amen !
[email protected]
Artículos Relacionados: