Diario Judío México - Los Himbas….. Una de las tribus las mas primitivas de Afrika

Ohhhhh.. si si mi kerido Mickey ! No tengo dinguna duda ke me entendites perfektamente komo te entyendo yo a ti i es muy justo todo lo ke dizes tu i lo ke digo yo. Mis byervos no son tornados a estos tribus bivyendo en la jungla en kualkiera rejyon de muestra planeta, no, deltodo ! Eyos biven sus mundos/vida komo lo keren i komo lo saven des de sieglos atras i sus progreso en la sivilizasyon, pormodo de inkontables razones, okurre de manera muy lenta. Diremos ke es parte de la ermozura de la natura ! Ermozura o interesante o egzotiko….

Sus habitat se estrecha de en diya en diya i las kondiyones de vida les rende la vida imposivle… Demasyados mikrobes, polusyon, ambre, sed.. I guerras entre eyos ! Mueren desmasalados i disparesen kon tiempo.

De una parte estos i de otra parte una sosyetad ke no toma plazer mas de nada…. Porke tiene todo, bushka mas plazeres, mas konsumos, mas fantaziyas, bushka la immoralitad, las drogas i todo lo ke kaye debasho de la mano por konoser los limitos, apezar una kuryozitad en direksyones yerradas, ayegar, si keres,
a la eksperyensya de la edad madura muy mansevo, en olvidandose la kapasitad mentala i fizika del humano.

Ken save…. Son kozas inevitavles ma todos de una sierta edad te diran ke sus tiempos eran muncho mijor de agora, ma kuando yo era manseva, los grandes, nonas nonos i los aedados mos miravan kon envidya i se selavan disyendomos ke tenemos muncho mazal de bivir en una epoka de oro de la humanitad…. Dospues de las
guerras dezgrasyadas, tiempos de abundansya i de libertad en los justos limitos, tiempos de respekto i amor verso los hombres i entre los dos seksos, tiempo de novitades i teknolojiya fasilitando la vida en todo i mas i mas…

Avlo de los “golden sixties” ! Yo estava salyendo de la chikez por ser una madmuazelika maraviyoza ! Oy ? Ke mundo vos estamos deshando ? Para kualo mas kazarse i azer kreaturas ? Un mundo egoisto i malsano. El interes i el plazer, la haraganut i la irresponsavilitad tronando en todo lugar… Las difikultas sosyales, ekonomikas, de sekuritad, ekolojikas i geografikas, la mundyalizasyon ke en realitad no trusho ke kompetensya i mas lavoro, i mas chikos saleryos para algunos i rikezas kolosales
opresadoras i injustas para otros. La teknolojiya ke mato la sosyetad en azyendolos obezes porke son atados a sus
komputadoras, a la TV o a la “wheel”, el stress atakando el korason i muevamente el “immune system”/el sistemo de defensya del humano, koza ke no se teniya oyido antes anyos ! Allerjias ke no egzistiyan i ke oy matan ! La vida en kontra allargandose kon los pregresos en la medisina.. En los payises rikos i sosyetades ke pueden alkansar a la medisina sofistikada
por seguro ! Ke va ser kuando los poles se vana derritir
enteramente ? Kuando no va aver mas nieve ? Los rios no se van a alimentar … Ni kero pensar a los trokamientos ke en serka vana okurrir ! No ! Es lokura de engrandeser kreaturas i kazarse por divorsiar 6 mezes despues !

El amor no es muncho tiempo ! No egziste mas kuando no
tienne baryeras ! Es la amistad i el respekto i la estima ke toma su lugar. Si estos no estan ????? El amor se alimenta del imposivle ! Mas kere bien la persona ke no puede alkansar a su bienamada/o en entera libertad. !!! I el amor no tyene limito ! La muerte es su limito ! Ma nunka nunka entre kazados !

Te inchi la kavesa ! Ouffffffff porke eskrivi todo esto !
Ke te sali a ti de lo ke penso i ke me sale a mi de todo lo ke eskrivi a esta edad !!!!

Olvidate de todo ! So una vieja loka !
Te abraso kon karinyo mi kerido Mickey !

[email protected]

Las opiniones expresadas aquí representan el punto de vista particular de nuestros periodistas, columnistas y colaboradores y/o agencias informativas y no representan en modo alguno la opinión de diariojudio.com y sus directivos. Si usted difiere con los conceptos vertidos por el autor, puede expresar su opinión enviando su comentario.

SIN COMENTARIOS

Deja tu Comentario

A fin de garantizar un intercambio de opiniones respetuoso e interesante, DiarioJudio.com se reserva el derecho a eliminar todos aquellos comentarios que puedan ser considerados difamatorios, vejatorios, insultantes, injuriantes o contrarios a las leyes a estas condiciones. Los comentarios no reflejan la opinión de DiarioJudio.com, sino la de los internautas, y son ellos los únicos responsables de las opiniones vertidas. No se admitirán comentarios con contenido racista, sexista, homófobo, discriminatorio por identidad de género o que insulten a las personas por su nacionalidad, sexo, religión, edad o cualquier tipo de discapacidad física o mental.